Imbombo zya Vapositili 8
8
Ukuṿwimilwa nukusampana kwa vachilisiti
1Ilelo pumusanya wuyo pe vuhandʼuvuṿwimilwa uvupiti uvwa kuṿwimʼishivanza sha Yelusalemu. Pʼavashivanza vahasavalila, vahavala mwonti munsi ya mu-Yudayi niya mu-Samaliya. Ve vapositili veka ve vatahashimbila. 2UwenʼuSitefani vahamusyila vamo ve vahamunyilagʼuMulungu. Vahamulosezyʼilosyʼipiti. 3UwenʼuSavuli ahashiṿwalanganyʼishivanza, ahinjila munyumba zyonti mwe zilandatine, ahavadendemula navanaṿuli navantanda, ahavigalila mujela.
UFilipu mu-Samaliya
4Avene nyene ve vasavaliye, vahapanguzya vahakumusya intumʼinyinza. 5UwenʼuFilipu ahavalʼukufiha munkaya mu-Samaliya, mwʼahavavuzyʼavantu izya Chilisiti. 6Avenʼavantu va mumwo vonti poka vahatega nkanʼamakutwi, vahatejelezya zyʼahayangagʼuFilipu, vahenya namamfindango gʼahapelaga. 7She nimpepʼinkandamanu zihakuta nkani lwe zikuvafuma ve vapenile, avinji ve valemayʼiṿwambi nave vahadyogolelaga, vahazuzuvuha. 8Pe vahaseshela nkani munkaya yila.
USimoni umutamho
9Ilelo munkaya yiyo mwʼalʼumuntu wʼali uSimoni izina, wʼahelehaga nukuvasukumizyʼavaSamaliya, ahati ne shitʼulive ne mupiti. 10We vahamwumishizya vonti avansi navapiti, vahati: Uno we maha ga Mulungu ge vakuti ge Mapiti. 11Vahamwumishizyaga shʼayanzite he hali ukuvasukumizya ninyeleho zyakwe. 12Apene nyene lwʼuFilipu avavuzya intumʼinyinza ya vumwene vwa kumwanya niyʼizina lya Yesu Chilisiti, pe vahitiha, pe vahozelwa navanaṿuli navantanda. 13Pe wope nuSimoni ula ahitiha. Ilelo lwʼayozilwe pʼahamwumishizyʼuFilipu, ahasukumila lwʼakwenya namamfindango namayelʼamapiti gʼahapelagʼuwene.
UPeteli nuYohani mu-Samaliya
14Avene nyenʼavapositili mu-Yelusalemu lwe viṿuye ukuti iSamaliya yiposheleyʼizwi lya Mulungu, pe vahavatumʼavaPeteli nuYohani kuli vuvo, 15ve vahihʼukuvala nukuvalavilʼuMupepʼuMufinjile ukuti vope vamuposhelaje. 16Shʼashili ukuvishila inga woka mwe vavaliye nkandi kwe kwozelwa kwe vozilwe mwizina lya Yesu uMwene. 17Vahavavihʼinyove, pe vahaposhelʼuMupepʼuMufinjile. 18UwenʼuSimoni lwʼawenyi uMupepo akwinza lwʼavapositili vakuvavihʼinyove, pʼahavatwalilʼimpiya, 19ahati: Nane mumpanjʼamaha ganaga ukuti wenga nkumuvihʼinyove aposhelajʼuMupepʼuMufinjile. 20PʼuwenʼuPeteli ahamuvuzya ahati: Valaga nimpiya zyaho kuvutupulwa, shʼusiṿilʼukuti iṿikunjilwa ṿwa Mulungu imṿikale nimpiya. 21Ute nishigavo nashimo nga vupwano navumo munongwʼino, shʼumwoyo waho atagolosile kwa Mulungu. 22Upinduhaje kumbivi zyaho zinizi, ulambilizyaje kwa Mwene kuti ingavanga pʼuswilwaje insivo zya mumwoyo waho. 23She nkuwenyʼiwe ukuti uli munyongʼinkali namunkusa zya vugombanu. 24UwenʼuSimoni ahamula ahati: Simundavile mwenemwe kwa Mwene ukuti zitahanaje nazimo zye muziyanzile. 25Avene lwe vahomeshezizyʼizwi lya Mwene nukuliyanga, pe vahavwela ukuvala mu-Yelusalemu lwe vakukumusyʼintumʼinyinza munkayʼinyinji zya vaSamaliya.
UFilipu numwEtiyopi
26Pʼuhavizya wa Mwene ahamuvuzyʼuFilipu ahati: Vuhaga valaga kumuhonʼumulilo uhafishe pʼidala lye lyafuma mu-Yelusalemu lyisile ukuvala mu-Gaza, lye liṿumiye. 27Pʼuwenʼahavuha ahavala. Pʼahamwagʼumuntu wa mw-Etiyopi umupase, umuhombe wa Kandake wa mwenʼumwantanda wa vEtiyopi, wʼahasunjililagʼishuma shakwe shonti, wʼavazile mu-Yelusalemu ukuputa. 28Shinishi pʼahavwela kuhaya, atendime pʼigeleti lyakwe, ahavazyagʼukalata wa mukuvwi uYesaya. 29PʼuMupepo ahamuvuzyʼuFilipu ahati: Palamilaga kwigeleti linili, ulilandate. 30PʼuFilipu ahapimpila ukuvala kukwo, ahiṿwʼakuvazya mumukuvwi uYesaya ahamuvuzilizya ahati: Amwe uzimanyinsinye zinizi zyʼukuvazya? 31Uwenʼahati: Pe nzimanyinsanye vuli inga numo uwa kundanganizya? PʼahamulambilizyʼuFilipu ukuti azuve atendame poka nawo. 32Izyenʼinongwa zyʼahavazyaga pakalata zye zino:
Vavazile nawo kuvuvolelo fwe ngati ngʼonzi,
inza shʼahagonzi hakupuma mwa lwʼahalemilʼumutenda—
vusepe, shʼahonzizye wopʼuwene akusitʼukwinulʼilomu ukuyanga.
33Mwe mulwisyo lwakwe isunde lyakwe lihasila.
Unanu wʼangapanga izya luho lwakwe?
Shʼuvulanzi vwakwe vusompolilwe ukufuma munsʼumu.
34Pʼumupase ahamuvuzilizyʼuFilipu ahati: Mbuzya weya, akumutahʼunanu umukuvwi panapa? Amwʼakuyitaha wuyo, ingavangʼuwunji? 35PʼuFilipu ahandʼukuvusyʼilomu, ahataliha mwakalatʼula ukumuvuzyʼintumʼinyinza iya Yesu. 36Ilelo lwe vakujenda mwidala pe vahafiha pijenje limo. Pʼumupase ahayanga ahati: Yenya, igʼaminzi. Amwe shonu she shingandindila ukwozelwa? 37[PʼuFilipu ahati: Ingʼuyitisile numwoyo waho wonti, pe nashimo. Pʼuwenʼahamula ahati: ImwitisilʼuYesu Chilisiti ukuva we Mwana wa Mulungu.] 38Pʼahalajizyʼukuti igeleti lyimilile. Ilelo pe vahiha ve vavili muminzi, nuFilipu numupase, ahamwozya. 39Ilelo lwe vafumile muminzi, pʼuMupepo wa Mwene ahamusompolʼuFilipu. Ilelo umupase ahapotwa nukumwaga nakumo, uwene nyene pʼahajendʼidala lyakwe nuluseshelo. 40UwenʼuFilipu we vahamwaga ali mw-Azoto. Kwʼahapanguzya nukukumusyʼintumʼinyinza munkaya zyonti, ahafiha nazyo namu-Kesaleya.
Currently Selected:
Imbombo zya Vapositili 8: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
