Imbombo zya Vapositili 7
7
Imbila ya Sitefani
1Pʼuwashiputʼumupiti ahayanga ahati: Amwe vuli she zili vovulo? 2Uwenʼahati:
Mwe vayaya, mwe vamwitʼimwe, namwe vatata, mutejelezyaje. UMulungu umuhatavupiti amwitushizizyʼuAbulahamu utata swenti, lwe suti ali mu-Mesopotamiya, lwʼashili ukusamba mu-Halani, 3ahamuvuzya ahati: Yepaga namunsi yahʼumu namwe muvujenzi vwahʼumu, uvale munsi ye ndikusontela. 4Ilelo pʼuAbulahamu ahepa munsi ya vaKalidayi, ahasamila mu-Halani havili lwʼafuyʼuyise, pʼuMulungu ahamwefwa pala ahamusamizya munsi mwe musamiyʼimwe shinishi. 5Ahasita nukumupʼuvupwano navumo mula, nga vupapa vwa lwayo, nkandi ahafingana nawo ukumupa ukuti ivanje yakwe wuyo niya mbeyu yakwe mwisinda, nashengʼashili ukuva numwana. 6Vovulo inza shʼayanzilʼuMulungu ukuti imbeyu yaho ilishintila munsi yimʼinjeni, mwe valiyikonzya nukuyizizya amaha 400. 7Izyenʼinkolo zya vantu zye vakuzivombela muvuzya, ndizilonga nene. Havili ulwa pisinda, pe valifuma mumwo valimbombela panapa. 8Pʼahamupʼilagano lya vuvolwa. Ilelo pʼuAbulahamu ahamupapʼuYisikaka, ahamuvola pisiku lya munana, nuYisikaka wope vovulo kwa Yakobu, nuYakobu vovulo kuvatata avasekulu vitu ishumi navavili. 9Avenʼavasekulu vitu lwe vamugulumwʼu Yosefu pe vahamukazya mw-Egipiti. UwenʼuMulungu nyene wʼahava nawo. 10Ahamupoha muvupotwe vwakwe vwonti, nuvwankundwa ninjele kwa Falayo umwene wa mw-Egipiti, ahamupʼuvupiti mw-Egipiti namunyumba yakwe yonti. 11Ilelo pʼihagwʼinzala munsi yonti ya mw-Egipiti namu-Kanani nuvupotwʼuvupiti. Avatata vitu vahasova niṿwa kulya. 12PʼuwenʼuYakobu ahiṿwʼukuti impumba zilipo mw-Egipiti, pʼahatumʼavatata vitu ulwa kwanda. 13Lwe vavazile ulwa vuvili, pe vahamumanyʼuYosefu avamwavo. Pe wope nuFalayo ahalumanyʼuluho lwa Yosefu kwʼafumile. 14PʼuYosefu ahatumʼavantu ava kumwitʼuyise nava luho lwakwe vonti, ve vali 75. 15PʼuYakobu ahihʼukuvala mw-Egipiti. Ahafwa navatata vitu vwelele. 16Amaṿimba gavo vahagatwala kuSekemu vahagaviha mumbipa yʼuAbulahamu akazile nimpiya navana-Hemoli mu-Sekemu.
17Ilelʼumwaha lwʼapalamiye uwa kwinzila zizyo zyʼuMulungu afingine nuAbulahamu, pe vahaṿulʼavantu, vahavʼavinji mw-Egipiti, 18vahafiha pupo pʼalolesilʼumwenʼuwunji wʼahatema mw-Egipiti wʼatamumanyilʼuYosefu. 19Wʼahalutilinga nishifumbo uluho lwitu lwonti, ahavizizyʼavatata vitu, shʼatili vatagajʼutwana twavo utucheche, ukuti vatalandilaje. 20Pupo nyene pʼahapapwʼuMose, wʼalʼumwinza kwa Mulungu. We vahamusunga munyumba ya yise amezi gatatu. 21Ilelo lwe vamutazile, pʼahamulombolʼusamwene wa Falayo, ahamulela ukuti avanje mwana wakwe. 22Pe vahamulanganizya zyontʼinjele zya vEgipiti. Nazyʼahavombaga nazyʼahayangaga zyontʼahalolesyʼamaha. 23Ilelo lwʼamazilʼamahʼamashumi gane, pʼahakumbuhʼuwene mumwoyo wakwe, ahati: Imbale mbenyʼavamwitu avana-Yisilayili. 24Ilelo pʼahamwaga wumo akuhomwa umusitamalandu. Pʼahamutula, ahamulandulila uvugolosu vwakwe ula we vamulevenzizye, ahamuhomangʼumwEgipiti. 25Uwenʼasiṿile ukuti ingavanga avamwavo vamanye ukuti kumuhono wakwe uMulungu akuvapa uvuposhi. Avene nyene vahasitʼukuzimanyinsanya. 26Shandavi pʼahaloleha kuli ve vahalwanga vuvo vatupu, pʼahati mbatanzye ukuti vakundane, ahayanga ahati: Mwe vantu, mwe vana muntʼimwe, mukulevenzanya shonu? 27Ilelo pʼuwene wʼamulevenzizyʼuwamwavo ahamubunchila ahayanga ahati: Unanu wʼakuvisilʼukuva we mupiti numulonzi kumwitʼiswe? 28Ingavanga ukwanzʼukungoga nane inza she wamagozilʼumwEgipiti mavwila. 29PʼuMose ahashimbilʼizwʼili, ahashintila mu-Midyani. Mwʼahapapʼavana vavili avanaṿuli. 30Ilelo lwe gashilinkine amanda amashumi gane, pʼahamwitushizya mulwangwa lwa kwigamba uSinayi uhavizya mumwilo wa mwoto mulwugwa. 31UwenʼuMose lwʼawenyi pʼahasukumila nkani kushitushizya shinishi. Ilelo lwʼakupalamila, lwʼakuti nchimanye nkani, pʼizwi lya Mwene lihiṿwiha lihati: 32Nene ne Mulungu wa vaso, ne Mulungu wa Abulahamu nuYisikaka nuYakobu. PʼuMose ahatetema nkani, ahanyila nukwenyelezya. 33PʼuMwene ahamuvuzya ahati: Zulagʼindyato zya muṿinama ṿwaho, she pupo pʼuyimiliye pe pansʼimfinjile. 34Nenyizyʼine mbawenyi ukuyimba avantu vane mw-Egipiti, ninkuta yavo yope niṿuye pe nisile ukuti mbaposhe. Nzagaga lelo nkukutuma mw-Egipiti wenewe. 35We wʼuMose wuyo we vamuhanile vahati: Unanu wʼakuvisilʼukuva we mupiti numulonzi?—WʼuMulungu ahamupelʼukuva we mupiti numuposhi ahamutuma numuhono wa havizya wʼamwitushizizye mulwangwa. 36Wʼahavafumwa lwʼapezile namamfindango namayele mw-Egipiti namwa Sumbi uMushemamu namulwugwa amahʼamashumi gane. 37We wʼuMose ula wʼavavuzizyʼavana-Yisilayili atili: UMulungu alivavusizyʼumukuvwi muvamwinyʼumu wʼali fwe nene. 38We wuyo wʼalipo mushivanza mulwugwa poka nuhavizya wʼamuvuzizye pigamba uSinayi, wʼahayanga poka navatata vitu wʼaposheleye ninongwʼindanzi izya kutuvuzyʼiswe. 39Avene nyenʼavatata vitu vahamwila, vahamusufwa namoyo gavo vahenyezya mw-Egipiti havili. 40VahamuvuzyʼuAloni vahati: Utumatilʼamalungu aga kumongola, shʼuMose uno wʼatufumizye munsi ya mw-Egipiti, we tutamanyile zye zimwazile. 41Pe vahamatʼinkambaku mumanda gugo, pe vahalitwalilʼilungu lyavo iṿwa kufinjila, pe vahadovela nkani kuhantu he vapezile ninyove zyavo. 42PʼuwenʼuMulungu ahavagunjila. Ahavaleha ahati fwane vazivombelʼimpuga zya kumwanya, inza she lisimṿilwe mwa kalata wa vakuvwi lye likuti:
Amwe muhangojela inyama, amwe mwandeteye nga ṿwa kufinjila, lwe mwali mulwugwa mula amahʼamashumi gane, mwe vana-Yisilayili imwe?
43Nkandi nihema lya Moloki muhajenda nalyo nuluzota lwa mulungu winyu uLomfani ṿwe ṿiholanyo yila ṿwe mwavinzile iṿwa kuṿisugamilila. Ndivashintizya ukuvapitilizya namu-Babeli.
44Ilyenʼihema lya vwahome lye vali nalyo avatata vitu mulwugwa mula, inza shʼalajizizye wuyo wʼayanzile nuMose ukuliyananya inza she ishiholanyo shʼashiwenyi. 45Lyʼavatata vitu valiposheleye pe vahinza nalyo poka nuYoswa pala pe vakonzizyʼinsi ya vakunzi, vʼuMulungu avefizye kusheni sha vatata vitu, ukufiha kumanda ga Davidi. 46Wuyo nyene wʼahagʼuvwankundwa kuminso kwa Mulungu, ahalava ahati: ImwanzilʼuMulungu wa Yakobu apavuyo. 47UwenʼuSolomoni wʼahamuzenjelʼinyumba. 48UwenʼuMulusyi nyene wʼatakudila munzenje ninyove. Inza shʼumukuvwi akuyanga akuti:
49Iya kumwanya she shitengo shane sha vumwene, iya pansi nyene he hatengo ha ṿinama ṿwane.
Ye nyumba vuli ye mukuti munzenjelʼine, zyʼakuyangʼuMwene pali kwoshi apa kutuzyʼine?
50Amwe te muhono wane wʼazipezile zyonti zinizi?
51Mwe vagomʼihsingo imwe, mwe vasitavuvolwa mumoyo namumakutwi, mukumwila shimʼuMupepʼuMufinjile. Inza she vahonzizye avaso vinyu, vovulo. 52Mukuvwi vuli we vatamuṿwimilʼavaso imwe? She vahavagogaga vonti ve vahaziyangaga izya kwinza kwa Mugolosu, wʼimwe shinishi mumwambiliye nukumugoga. 53Muposheleyʼinkomelezyo zye vavaposhelezizyʼavahavizya, nkandi mutahazilandata.
Ukufwa kwa Sitefani
54Ilelo lwe viṿuye zinizi, pe zihavalasa mumoyo, vahayilumaluma. 55Uwene nyene shʼayizuyʼuMupepʼuMufinjile, pʼahatontomela kumwanya, ahenyʼuvupiti vwa Mulungu, ahamwenya nuYesu lwʼayimiliye kumuhonʼumulilo wa Mulungu, 56ahati: Yenyi, mbwenyi kumwanya kwigusile, wope nawe Mwanamuntu wʼayimiliye kumuhonʼumulilo wa Mulungu. 57Avene pe vahapongomohʼizwʼipiti, vahadindʼamakutwi ninyove, vahamuvushila vonti fwe ngati valʼumwoyo woka. 58Pe vahamubunchilizya, vahamufumwa munkaya, pe vahamutinza namavwe. Avenʼavahome vahavihʼamenda gavo kuṿinama ṿwa mulumendo we vahatinji uSavuli. 59Pe vahamutinza namavwe uSitefani. Uwenʼahaputa ahati: We Mwene Yesu, poshelagʼumupepo wane. 60Ilelo pʼahasugamila pansi, ahavilishilʼizwʼipiti ahati: Mwene, utahavalanduzyʼumulandʼuno. Ilelo pe lwʼayanzilʼizwi linili, pʼahakatʼutulo twa vufwe. UwenʼuSavuli wope ahazyenya ukuti nyinza izya vufwe vwakwe.
Currently Selected:
Imbombo zya Vapositili 7: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
