Imbombo zya Vapositili 19
19
Avasundikwa va Yohani umwozyi mw-Efeso
1Ilelo lwʼuApolo ali mu-Kolinti, pʼuPavuli ahatuha munsi ya kulutala, ahafiha mw-Efeso. Mwʼahavaga vamʼavasundikwa. 2Vahavavuzilizya ahati: AmwʼuMupepʼuMufinjile mwamuposheleye pala pe mwitisile? Avene vahati: Tutiṿuye nukwiṿwa ukuti alipʼuMupepʼuMufinjile. 3Uwenʼahayangʼahati: Mwozilwe lwozyo vuli? Avene vahati: Twozilwe lwe lwa Yohani. 4PʼuPavuli ahayanga ahati: UYohani wʼahavozyagʼulwozyo lwa lupinduho, ahavuzyagʼavantu ukuti vamwitishe wuyo wʼakumulandata mwisinda, we wʼuYesu. 5Ilelo lwe viṿuye zinizi, pe vahozelwa mwizina lya Yesu uMwene. 6Ilelo pʼuPavuli ahavavihʼinyove, pʼuMupepʼuMufinjile ahavishila, pe vahayanga mumilʼimpwa, vahakuvwa. 7Avenʼava-naṿuli vanava valʼishumi navavili.
UPavuli mw-Efeso
8Pʼuwenʼahinjila musinagogi, ahayangʼinongwa shisitakuzyiha. Kumezi gatatu ahayangana navantu nukuvahopelezya izya vumwene vwa Mulungu. 9Vamo nyene vahagahomefwʼamoyo gavo, vahalaluha, vahalisamulʼidala ili lwe vakwi-ṿwʼavantu. Pʼuwenʼahavaleha, ahavasavulʼavasundikwa, ahavavuzyʼavantʼinongwa shima munyumba ya Tilani iya kusambilila mumwo. 10Ahahonzya vovulo amaha gavili. Pe vontʼavantu navaYuda navaGiliki ve vasamiye mw-Asiya vahiṿwʼinongwa zya Mwene.
11Gope namamfindango gʼumuntu atakugalola, gʼuMulungu ahagapela munyove zya Pavuli. 12Navavinu vahavatwalilʼutwenda twa kusyumulilʼamatwinsi natwe twafumile ukupalamana numuvili wakwe, ilelo pe nimpungo zihepa nimpepʼimbivi zihavafuma. 13Pe vamʼavaYuda avavingampepʼimbivi ve vahazyungulaga munsi, vope vahalinga vahalitashila pavantu ve vali nimpepʼimbivi izina lya Yesu uMwene vahati: Nkukuvinjila mwizina lya Yesu, wʼuPavuli akumukumusya. 14Avene lelo ve vahavombaga zinizi vali vanʼavanaṿuli vasano navavili ava Sikeba uwashiputʼumupiti wa vaYuda. 15Iyene nyenʼimpepʼimbivi yihamula yihati: UYesu wʼimumanyile nuPavuli vwelele, nkandʼimwe mwe vonu? 16Ilelʼumuntu wʼali nimpepʼimbivi ahavadomoshela, ahayipasa navo, ahavagwisya pansi vavili mumpuga yavo, ahavaṿulazya, pe vahashimbila munyumba mwe vali nakuzwala. 17Zye vahiṿwa vontʼavaYuda navaGiliki ve vasamiye mw-Efeso. Ishitetemwi shihavagwila vonti. Ilyenʼizina lya Yesu uMwene lihamwama. 18Pe vahayiṿumbula ve vinji ve vitisile nukupempula zyonti zye vavomṿile. 19Vamʼavinji ve vavomṿile izya vutambo vahavunganihʼavakalata vavo ava vutambo, vahavapemba mumwoto lwe vakwenyʼavantu. Ilelo lwe vakuvazyʼuvugomu vwa vakalata vanava, pe vuhaga vufisile pa mpiya 50,000. 20She lihahonzya vovulo izwi lya Mulungu nukuyuta nukusimpa mumaha ninguṿu.
ZyʼuPavuli azilulumiye
21Ilelo pe lwe zyasila zinizi, pʼuPavuli ahasiva mumwoyo ahati nkwe njende ilya mu-Makedoniya nilya mw-Akaya ukuvala ku-Yelusalemu. Ahati inga nafiha mumwo pe pakuti nkenye namu-Loma. 22Pʼahavatuma mu-Makedoniya vavili ve vahamuvombelaga, uTimoti nuElasito. Uwene suti ahasyala mw-Asiya.
Ahapaka mw-Efeso
23Pupo pe hahatupuhʼahapaka ahapiti aha pIdala linili. 24She wokʼumusyani uDemeteli izina ahasyanagʼutwatempeli twa feza twa Atemi, wʼavapukusi vahalonkaga nkani kukwakwe, 25vahavavunganiha poka vanava navanji ve vahavombaga yiyo, ahayanga ahati: Mwe vanaṿulʼimwe, mwenti mumanyilʼukuti uvulonsi vwitu vwonti vukufuma mumbombo yinino, 26mukwenya havili mukwiṿwa UPavuli uno amazile namw-Efeso umu, pasyaye pansi ukuti amalʼinsi yonti ya mw-Asiya, mwontʼakuvasongʼavantʼavinji, ve zikuvahola zyʼakuyanga ukuti, ge gate malungu agene, gʼavantu vakusyana ninyove. 27Nkandi te mbombo yitu yeka yʼikwisupe ndali, wope nutempeli wa Atemi umulungu witʼumwantanda we mupiti valisiva ukuti te hantʼahadamusu, nuvupiti vwakwe vwelele vulisupa, vwe vakuvushindiha mwonti mw-Asiya namunsi yonti mwʼizyunguluye. 28Ilelo lwe viṿuye linili, pe vahaṿitwa nkani, vahavilishila vahati: Mupiti uAtemi wa vEfeso! 29Ilelo Pʼahalanga hanaha hahakwilʼinkaya yonti. Avantu vonti vahakululuha ukuvala kuluvungano lwa kwenyelezyʼutulumbe, vahadendemulilʼuGayo nuAlisitaliko, ava Makedoniya ve vajenzite nuPavuli. 30UwenʼuPavuli lwʼakutʼavale mwe vavunginʼavantu, avasundikwa vahamugalusya. 31Navapiti vamo ava mw-Asiya, ve vamanyine nawo, vahamutumilʼizwi ilya kumusoha ukuti atahayitumpishe muluvungano lwa tulumbe. 32Ilelo vamo vahavilishilʼizinji, avamwavo izinji. Shʼuluhomano lwonti lwaṿulungine. Avinji vatazimanyile zye vavunganiye. 33Pe vahamukwesa mumpuga uAlekizanda shʼavaYuda vamubunchilizizye. PʼuwenʼuAlekizanda ahavahandanizya numuhono ukuti ayanje zimo izya vutuli. 34Uwene nyene lwe vamwazile ukuti muYuda, pe vonti valiavilishilʼizwi lyoka kutuvalilizyo tuvili shisitakutuzya vahati: Mupiti uAtemi wa vEfeso! 35Uwenʼumusimbankomelezyo munkaya, wʼahavapumilizya avantu ahati: Mwe vamwitu mwe vEfeso imwe, amwʼunanu wʼatayimanyile inkaya ya mw-Efeso ukuti yikusunjilila nutempeli wa Atemi umupiti nishiholanyo shakwe she shilagaye ukufuma kumwanya? 36Ilelo she numo atakuzihana zinizi, pe pakuti mutehame mutashushutʼukuvomba nahamʼahamwamu. 37Shʼavantʼiva ve vamulesitʼipa vate vapumaṿintu ṿwa mwa tempeli ndali, wope numulungu witu vatamutonilʼamatona. 38Apene nyene uDemeteli navavomṿi vakwe inga vakwanzʼukumulonjelelʼumuntu, pʼamalonjelwi galipo navasungansi, kwe valongaje. 39Havili inga mutunjiye zimo izinji, pe Zyope zikulongwa muIuhomano lwa vimishilwa. 40She tungalonjelelwa pazya hapaka hanaha ahʼilelo he hatahondeye, havili tungapotwʼnkuyinonelezya kuluhomano. 41Ilelo lwʼayanzile linili pʼahasavalizyʼuluhomano.
Currently Selected:
Imbombo zya Vapositili 19: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
