Imbombo zya Vapositili 18
18
Mu-Kolinti
1Ulwa pisinda pʼuPavuli ahepa mw-Ateni ahavala mu-Kolinti. 2Mwʼahamwagʼumuntu umuYuda wʼali wʼuAkwila izina, apafilwe mu-Ponti, wʼafumile mw-Itali mumanda ge gala numushi wakwe uPilisikila, shʼuKilavudi ahomelezizye ukuti vontʼavaYuda vepaje mu-Loma, pʼahafiha kuli vuvo, 3ahadila kumwavo she vali mumbombo yoka yene nawo. She vali vahovamahema mumbombo yavo. 4Shima pisabati ahayangaga musinagogi, ahavahopelezyagʼavaYuda navaGiliki.
5Ilelo lwe vafishe avaSila nuTimoti ve vafumile mu-Makedoniya, panongwa zihamulemenkanya nkani. Pʼahavasimishizya nkanʼavaYuda ukuti uYesu we wʼuChilisiti. 6Ilelo lwe vakumwila nukutonʼamatona, ahakunyuntʼamenda gakwe ahati: Amavanda ginyu gavinzilaje mwenemwe pamatwe ginyu. Ine ne muzelu. Ukufumʼishi nakuvala kuvakunzi. 7Pʼahepa pupo ahavalʼukudila munyumba ya muntu woka wʼali wʼuTiti Yusiti izina, wʼahamunyilagʼuMulungu, wʼinyumba yakwe yali inchinji yoka nisinagogi.
8PʼuKilisipi, umupiti wa sinagogi, ahamwitihʼuMwene poka ninyumba yakwe yonti. Vope navaKolinti avinji vahitiha lwe viṿuyʼinongwa nukwozelwa. 9Uvusiku vumo uMwene ahamuvuzyʼuPavuli munjozi, ahati: Utatetemajʼiwe, yangaga, utapumaje, 10she ndi nawe. Numʼumuntu atalikuhalalushila nukukwizizya, she ndi navantʼavinji munkayʼino. 11Pʼuwenʼahadila mumwʼumwaha woka namezʼumutanda, ahavasambilizyʼinongwa zya Mulungu.
UGaliyoni nuPavuli
12Ilelo lwʼuGaliyoni ali musungansi mw-Akaya, pe vontʼavaYuda vahamuvupila poka UPavuli, vahamudendemulila pilonjelwi, 13vahati: Umuntʼuno akuhopʼavantu ukuti vamuvombelajʼuMulungu amiho ge gatali munkomelezyo. 14UwenʼuPavuli lwʼakuti avusyʼilomu ayanje, pʼuGaliyoni ahavavuzyʼavaYuda ahati: Ingʼumuntʼuno amananzile zimo ingʼatazilʼumulandʼumupiti, pe nkandi zye zya kutejelezyʼine. 15Nkandi inga madali ga zya nongwa namazina ninkomelezyo zyinyu, pe muzimalilizye mwenemwe. She ntakasimʼukuzilongʼine. 16Pʼahavashimbizya pilonjelwi. 17Pe vonti vahamulemʼuSositeni, umupiti wa sinagogi, vahamuhoma pe pilonjelwi. UwenʼuGaliyoni ahasita nukuvenya.
UPavuli akugaluha mu-Sili
18Ilelo lwʼadiliye pupo nkani UPavuli, pʼahalagana navamwavo. Ahalambʼusumbi ukuvala mu-Sili, poka nuPilisikila nuAkwila. Mu-Kencheleya mwʼahavegulʼinsisi zyakwe shʼalafilʼishilapo. 19Vahafiha mw-Efeso, mwe ahalehana navo. Uwene nyene ahinjila musinagogi, ahayangana navaYuda. 20Lwe vakumulambilizya ukuti adile nkani pʼuwenʼahahana. 21Ahalagana navo ahati: Ndiyinza havili kumwinyu ingʼuMulungu akwitiha. Pʼahepa mw-Efeso ukulambʼusumbi. 22Ahafiha mu-Kesaleya, ahazuvʼukulamuhʼishivanza, pʼahishila mw-Antiyokiya. 23Lwʼadiliyʼamanda gamo, pʼahepa ahatuha munsi ya mu-Galatiya namu-Filigiya mwe zilandatine. Ahavajimṿwʼamaha vontʼavasundikwa.
UApolo mw-Efeso
24UmuYuda woka wʼali wʼuApolo izina, wʼapafilwe mw-Alekizandeliya, umuntʼumusilimusu, ahafiha mw-Efeso. Amanyile nkani avakalata. 25Wuyo nyene asambiliye idala lya Mwene, amupemṿilʼuMupepo muhati, mwe mumwo ahayanga nukuvasambilizya inongwa zya Yesu mwe zivaliye, nashenga amanyile ulwozyo lwa Yohani lweka. 26Uwene ahandʼukuziyangʼapazelu inongwa musinagogi. UPilisikila nuAkwila lwe vamwiṿuye, pe vahamusenda ukuvala nawo kumwavo, vahamulanganizya lyontʼidala lya Mulungu inza mwe lyavaliye nalyoli. 27Ilelo lwʼakuti mbale mw-Akaya, pʼavamwavo vahamutula, vahavasimbilʼavasundikwa ukuti vamuposhele. Pe lwʼafiha ahavatula nkani vʼuvwila vwa Mulungu vwavapiyʼulwitiho. 28Shʼuwenʼahavamenelezyaga nkanʼavaYuda lwe vakutejelezya vonti. Ahasenda mwa kalata izya kuvasimishizya ukuti uYesu we wʼuChilisiti.
Currently Selected:
Imbombo zya Vapositili 18: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
