Imbombo zya Vapositili 17
17
Mu-Tesaloniki
1Lwe vatusile ilya mw-Amfipoli nilya mw-Apoloniya, pe vahafiha mu-Tesaloniki, mwe yalʼisinagogi ya vaYuda. 2PʼuPavuli ahinjila inza shʼahonzyaga shima, kumasabati gatatu ahayangana navo izya muvakalata. 3Ahavapanjila nukuzisimishizya ukuti uChilisiti pakuti afwanje nukuzyuha kuvafwe, nilya kuti uYesu uno we nkuvakumusizyʼimwe we wʼuChilisiti. 4Pe zihavahola vamo, vahasangana navaPavuli nuSila, vope navaGiliki ve vahamunyilagʼuMulungu impugʼimpiti, vope navantanda avamuhamupiti ve vali vinji, 5avenʼavaYuda nyene vahavagulumwa. Pe vahasonjelezya gamʼamantu amavivi aga mumasolo, vahagavunganihʼahapuga, vahapelʼahalanga nago munkaya, vahayizinganilʼinyumba ya Yasoni, vahasungwa ukuvatwala kumpuga ya vantu. 6Lwe vazile navamo, pe vahamulemʼuYasoni navamwavo vamo, vahavadendemulila kuvapiti va nkaya, vahavilishila vahati: Avantʼiva ve vakupelʼahapaka munsi yonti mwe vasamiyʼavantu, vinzile namumwitu, 7uYasoni avaposheleye. Zyonti zye vakuvomba zikulasana ninkomelezyo zya Kesali vakuti alipʼumwenʼuwunji uYesu. 8Avantu vonti navapiti munkaya vahatentwa lwe vakwiṿwa zinizi. 9Lwe vaposheleye kwa Yasoni iṿwa kupinjiha pe vahavatavula.
Mu-Beloya
10Pavusiku vuvwo avamwavo vahavasogozyʼavaPavuli nuSila ukuvala mu-Beloya. Ilelʼavene lwe vafiha pe vahinjila musinagogi ya vaYuda. 11Avene nyene vali vatehamu ukulusya kuvala ava mu-Tesaloniki. Vahaziposhelʼinongwa numwoyo wonti, shimʼamanda gonti vahenyaga muvakalata ukuti vazimanyinsanye inga ṿwe zyali. 12Pʼavene ve vitisile valʼavinji, navantandʼavaGiliki avashindamu navanaṿuli avinji. 13Avene nyenʼavaYuda va mu-Tesaloniki lwe viṿuye ukuti UPavuli akumusizyʼizwi lya Mulungu namu-Beloya, pe vahamulandata kukwo, vahavasonjelezyʼavantʼimpuga yonti nukuvayumṿanya. 14Pavenʼavamwavo vahamusogozya nzilʼuPavuli ukuti afisile kwa sumbi. AvenʼavaSila nuTimoti vahasyala mwe mu-Beloya suti. 15Avene ve vamusindishiyʼuPavuli nukumufisya mw-Ateni, vʼahavalajizya ukuvavuzya avaSila nuTimoti ukuti vatahave ukumulandata. Pe vahavwela.
Mu-Ateni
16Ilelʼumu mw-Ateni lwʼuPavuli akuvagulilila, pʼumwoyo wakwe ahaṿitwa shʼayazilʼinkaya yizuyʼiṿiholanyo ṿwa malungu. 17Pʼahayanga navaYuda nave vahanyilagʼuMulungu musinagogi, napamusolo navonti ve vahavunganaga pupo amanda gonti. 18Pe vamo avEpikuli navaSitoyiki avasungwanjele vahamuvupila, vamo vahati: Amwʼumulongwʼuno akwanzʼukuyanga zyonu? Vamo vahati: Ali fwe ngati akukumusyʼamalungʼamajeni. Shʼuwene ahamukumusyagʼuYesu nukuzyuha. 19Pe vahamusenda, vahavala nawo pahatununtu he vatili pe pa-Aleyopago, vahati: Amwe ungatuvuzya lizwi vuli ijeni munsambilizyo zyʼuyanzile? 20She njeni zyʼulesitʼiwe mumakutwi gitu, ishi tukwanzʼukumanya kwe zyenyizye. 21She vontʼavAteni navajeni vonti ve vadilaga mumwo vatali naho nahamʼahanji aha kuyenyezya, nkandi heka aha kuyanga naha kwiṿwʼutunongwʼutupwa nkani.
Imbila ya Pavuli pa-Aleyopago
22PʼuPavuli ahimilila pahati pa-Aleyopago ahati: Mwe vantu va mw-Ateni, mwonti mwe nenyizyʼine nazile mulusizyʼukunyilʼamalungu. 23She lwe nkuzyungula ukuti nzimanye zye mukuzinyila, pe nkashagʼishifinjilo she musimṿile pupo mutili: sha Mulungu umusitakumanyiha. Uno we mwamumwamisile shisitakumumanya, we wuyo nkuvakumusizyʼimwe. 24ShʼuwenʼuMulungu wʼapezile insi yonti naṿwonti ṿwe yili mumwo, she wʼuMwene wa kumwanya napansi, atakudila mumatempeli amazenje ninyove, 25navovulo atangavombelwa ninyove zya vantu, shʼatasovelilwe nahamo. Shʼuwenʼakuvapa vonti uvulanzi numwuyu naṿwonti. 26Havili apezile inkolo zyonti izya vantu ukutaliha numuntu woka, atalisilʼukupelʼumuntu woka mwe zifumile inkolo zyonti izya vantu ukuti vavanje mwonti munsi, ahahomelezya nzila gontʼamaha gavo nimpaho zyavo izya kupelela mumwʼukuzenga, 27ukuti vamwanzʼuMulungu nukumwaga nashenga vakupulumba, shʼuwene atalʼukutali kuli woka woka mwe tuvaliye. 28She muli wuyo tukulandila, tukuvungana nukuva mumwakwe, inza she vayanzile vope navatanyimbo vinyu vatili: She swe va luho lwakwe. 29Ilelo she swe va luho lwa Mulungu, pe tutahondeye ukusiva ukuti uvulungu vuholine nahantu ha sahabu pamo naha feza pamo nahavwe hʼumuntu avinzile nukupukuta pavuyevesi vwakwe. 30Ilelo amaha gala gʼavantu vatazimanyinsinye nazimo, gʼuMulungu agalesile atakwenya. Nkandi shinishi akuhomelezya kuvantu vonti mwonti ukuti vapindushe. 31Shʼalulumiye nzilʼisiku ilya kwinzʼukulongʼinsi yonti muvugolosu mumuntu woka wʼamwimisile nzila, wʼahavatelamishilʼavantu vonti ulwitiho lwʼahamuzyusya kuvafwe.
32Avene lelo lwe vakwiṿwʼilya kuzyuhʼavafwe, pe vamo zihava zya nseho, vamo nyene vahati: Tuhatejelezyʼulunji havili zinizi. 33Ilelo pʼuPavuli ahavaleha pupo, ahasogola. 34Vamo nyene vahasangana nawo, vahitiha. Woka ali wʼuDyonisi uwa pa-Aleyopago numwantanda woka uDamali izina navanji pupo.
Currently Selected:
Imbombo zya Vapositili 17: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
