Imbombo zya Vapositili 16
16
UTimoti akulandatana nuPavuli mu-Lisitila
1Ahafiha mu-Delibe na mu-Lisitila, mwʼahamwaga wokʼumusundikwa wʼali wʼuTimoti izina, wʼunyina ali muYuda umwitisi nuyise ali muGiliki. 2Avamwavo va mu-Lisitila nava mw-Ikoniyo vahamuyangʼuvwinza. 3UwenʼuPavuli ahati nkumusenda nkuvala nawo. Ilelo pʼahamuvolʼuvuvolwa, shʼavaYuda vali vinji munsʼila, havili vonti vamumanyilʼukuti uyise muGiliki. 4Ilelo lwe vakupanguzya munkaya zyonti, pe vahavalajizyʼilya kuti: Muzilandate inkomelezyo zye vahomelezizyʼavapositili navasongo ava mu-Yelusalemu. 5Pʼiṿivanza ṿihagoma namaha mulwitiho, nukuṿula vahaṿula amanda gonti.
Uvulendo vwa Pavuli mw-Asiya
6Pe vahajenda munsi ya mu-Filigiya niya mu-Galatiya, shʼuMupepʼuMufinjile avagalusizye lwe vakuti tuziyanje namw-Asiya inongwa. 7Ilelo lwe vafiha mu-Misiya, pe vahalinga ukuvala mu-Bitiniya, nkandʼuMupepo wa Yesu ahavagalusya. 8Pe vahatuha mu-Misiya, vahiha ukuvala mu-Tiloya. 9Pʼishitushizya shihamwagʼuPavuli pavusiku, umuntu wa mu-Makedoniya ayimiliye pupo, akumulambilizya akuti: Ulambe uyinze nakumwitu ku-Makedoniya, ututule. 10Ilelo lwʼashiwenyʼishitushizya shinishi, pe luvilo luvilo tuhasungwa ukuvala ku-Makedoniya, tuhamanyʼukuti atuvilishiyʼuMulungu ukuvakumusizyʼintumʼinyinza. UPavuli akulambʼukuvala mu-Makedoniya: Mu-Filipi 11Pe tuhalambʼusumbi ukufuma mu-Tiloya, tuhagoloha ukuvala mu-Samotilake. Havili shandavi tuhafiha mu-Neyapoli. 12Ukufuma umu tuhafiha mu-Filipi, ye nkayʼintanzi kuluvazu lwa mu-Makedoniya, inchintizi ya vaLoma. Ilelo pe tuhadila mumwo amanda gamo. 13Ilelo pisiku lyʼisabati tuhafuma munkaya ukuvala kwijenje, she tuhatinji kwe vakuputilʼavene. Pe tuhatendama nukuvapanjilʼavantanda ve vavungine. 14Numwantanda wumo, wʼizina lyakwe ali wʼuLidiya, umukazi wa menda amashemamu, wʼafumile munkaya ya va mu-Tiyatili, wʼahamunyilagʼuMulungu, ahatejelezya wope. WʼuMulungu ahamwigulʼumwoyo, ahasiva zyʼahayangagʼuPavuli. 15Ilelo lwʼayozilwʼuwene poka nava nyumba yakwe, pʼahatulambilizya ahati: Inga mumbwenyi ukuti imwitisilʼuMwene, pe mwinze munyumba yane, mwe mudile. Ahatusinjilizya.
16Ilelo pisiku limo lwe tukuvala pe vakuputila, pe tuhahomana numulindu woka wʼali nimpepo ya ṿilago, wʼavaloncheyʼishumʼishinji avapiti vakwe niṿilago ṿwakwe. 17WʼahamulandatʼuPavuli niswe, ahavilishila ahati: Avantʼiva vanyamata va MulungʼuMulusyi, ve vakuvakumusizyʼimwe idala lya vuposhi. 18Ahahonzya vovulo amandʼaminji. Zyʼahaṿitwʼu-Pavuli, pʼahashevela, ahayanga kumpepo yinino ahati: Nkukuvuzya mwizina lya Yesu Chilisiti ufumaje mumwakwe. Pʼihafuma pahavalilizyo he hala.
UPavuli nuSila vakwigalilwa mujela nukwigulilwa
19Ilelʼavayise lwe vazile hafumile he vahahasuvilaga ukulonchela mumwo, pe vahamulemʼuPavuli nuSila, vahavakwesela kuvahombe pamusolo. 20Vahavatwala kuvahatankaya vahati: Avantʼiva vakupelʼahapaka munkaya ino she vaYuda. 21Vakukumusyʼamiho ge swe vaLoma mwiho ukugaposhela nukugalandata. 22Pʼavantʼimpuga yonti vahavavushila. Pʼavahatankaya vahavazulʼamenda kumulaha vahati: Muvasyempe nimfwimbo. 23Vahavasyempʼimfwimbʼinyinji, pe vahavigalila mujela, vahamulajizyʼumusungajela ukuti avenyelezye nkani. 24Uwene lwʼayiṿuye ululajizyo lunulu, pahava viha mujela kwiziho, niṿinama ṿwavo ahaṿikunga mwipampa.
25Pavusiku pahati lelo, pʼuPavuli nuSila vahaputa nukwimbʼulwimbo ulwa kumutinihʼuMulungu. Avakungwa vonti vahiṿwa. 26Ilelo pʼinsi yihayinga nkani. Pe nulwalo lwa jela luhayinga ninyiji zyonti zihiguha apashezi, namanyololo ga vonti gahalagala pansi. 27Ilelo numusungajela lwʼadamuye, pʼahaga inyiji zya jela zyigusile. Pʼahakulʼishipanga shakwe ahati njilase, shʼasiṿile ukuti avakungwa vashimbiye. 28PʼuPavuli ahavilishilʼizwʼipiti ahati: Utahayiṿulazye she tuli munumu swenti. 29Pʼuwenʼahalavʼinyale, ahadovʼukwinjila, ahatetema, ahayitaga kuṿinama ṿwa Pavuli nuSila. 30Ahavafumwa kunzi, ahati: Mwe vamwene, amwe pe pakuti mbombaje zyonu ukuti mpokwaje nane? 31Avene vahati: Umwitihaje uMwene Yesu, pʼukupokwa iwe ninyumba yaho yonti. 32Pe vahamuvuzyʼinongwʼa zya Mwene poka navonti ve vali munyumba yakwe. 33Pʼahavasenda uvusiku vuvwo, ahavava-ndʼamaṿimṿi gavo, ilelo pʼahozelwa wuyo navantu vakwe vonti pe pala. 34Ilelo pʼahavala navo munyumba yakwe mwʼahavatelamishilʼiṿwa kulya, pʼahaseshela nkani she vonti ava nyumba yakwe vamwitisilʼuMulungu.
35Ilelo lwe kushiye pʼavahatankaya vahavatumʼavasikali vavo ukuti vavatavule avantu vala. 36Pʼumusungajela ahamuvuzyʼuPavuli amazwʼiga, ahati: Avahatankaya vantumiyʼintumi ukuti imbatavulʼimwe, ishi fumaji, mujende lumi. 37UwenʼuPavuli ahavavuzya ahati: Vatuhomile apazelu shisitakutulonga, nashenga swe vaLoma, vatwigaliye namujela. Havili shinishi pe vakwanzʼukutufumwa kukwilu? Ndali, valeshe vinze vatufumwe vuvo. 38Pʼavasikali vahavavuzyʼavahatankaya amazwʼiga. Avene vahatetema lwe viṿuyʼukuti vaLoma. 39Pe vahinza, tuhavatontela, vahavafumwa, vahavalambilizya ukuti vepe munkayʼila. 40Pʼavene vahafuma mujela, vahavala kwa Lidiya, vahavenyʼavamwavo nukuvajimṿwʼamaha, pe vahepa.
Currently Selected:
Imbombo zya Vapositili 16: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
