Imbombo zya Vapositili 15
15
Avachilisiti avafuma muvakunzi ninkomelezyo zya Mose
1Pe vamo vahiha ukufuma mu-Yudayi, vahavasambilizyʼavamwavo ukuti inga mutakuvolwa, inza shʼalʼumwiho wa Mose, pe mutangapokwa. 2PʼuPavuli nuBalinaba vahadalinkana navo vamo amadali amapiti, pʼavene vahamusogozyʼuPavuli nuBalinaba navamwavo vamo ukuzuva ku-Yelusalemu kuvapositili navasongo kuzya madalʼiga.
3Pʼishivanza shihavasindishila. Vahajenda lye litusile mu-Foyinike namu-Samaliya, vahapempula izya lupinduho lwa vakunzi, vahavapelelʼavamwavo uluseshelʼulupiti. 4Ilelo lwe vafishe mu-Yelusalemu, pe vahaposhelwa nishivanza avapositili navasongo. 5Pe vahavuha vamo muhatapunkano ha vaFalisayi ve vitisile, vahayanga vahati: Pakuti vavolwaje uvuvolwa, zyonti ninkomelezyo zya Mose tuvavuzye vazilandate.
Uluhomano lwa vahombe mu-Yelusalemu
6Pe navapositili navasongo vahavungana ukuzisivililʼinongwa zinizi. 7Lwe vakudalinkana nkani pʼuPeteli ahavuha ahavavuzya ahati: Mwe vayaya mwe vamwitu namwe mumanyilʼukuti lulwʼuMulungu asavuye kulʼimwe ukuti mwilomu lyane mwʼavakunzi viṿwilaje intumʼinyinza nukwitiha. 8Ilelo pʼuMulungu umumanyamoyo ahavahomeshezya lwʼahavapʼuMupepʼuMufinjile inza shʼatuhonzezizye. 9Zitalipo izya kuti naswe navuvo tuli payo shʼazelufizye amoyo gavo mulwitiho. 10Ishi lelo pe mukumulinga shonʼuMulungu nukuvavegazya ikoli ili pansingo zya vasundikwa lye lyavapositʼukunyatulʼavatata vitu naswe vovulo? 11Nkandi tukusuvilʼukupulumushila mwe muvwila vwa Mwene Yesu, inza she vahonzizye vope.
12Pe vonti mwe vavaliye vahapuma, vahatejelezyaga lwʼuBalinaba nuPavuli vakuvavuzyʼinongwa namamfindango namayele gʼuMulungu ahavapelelagʼavakunzi munyove zyavo. 13Lwʼavene vapuma, pʼuYakobu ahamula ahati: Mwe vayaya, mwe vamwitu muntejelezye. 14Atuvuzizye zila uSimeyoni zye zyatalisile lwʼuMulungu ahenyaga navakunzi ukuyisendela vamo ava kuva vʼizina lyakwe. 15Ilelo gope namazwi ga vakuvwi gajendeye mumwo ge gasimṿilwe gakuti:
16Ulwa pisinda pe ndigaluha havili,
pe ndizenga havili inyumba ya Davidi yʼimongosile,
namapwahala gakwe ndivuyizyʼukugazenga ndiyandula,
17vontʼavantu ve vasyaye pakuti vamwanzʼuMwene,
navakunzi vonti vʼizina lyakwe litasilwe kuli vuvo.
18ṾwʼakuyangʼuMwene wʼakuzimanyisya zinizi ukufuma he hali.
19Mwe mumwo nkusiva nkuti tutavayimṿwaje vala ve vafumile kuvakunzi ukumupindushilʼuMulungu, 20tuvasimbilʼukalata ukuti nkandi vafupuhaje kuvuhandamanu vwa malungu, nakuzya luvembu, nakunyama zye vabuzite nakumavanda. 21ShʼuMose ayanzile hali, valipo shima ve vakumuyanga munkaya zyonti, lwe shima pisabati akuyangwa mumasinagogi.
Ukalata wʼasimyilwe kuvachilisiti avafuma kuvakunzi
22Pe vonti navapositili navasongo nishivanza shonti vahasiva ukuti he hinza inga tukuvatumʼavantu ve tuvasavuye avakufuma kumwitu ukuvala mw-Antiyokiya poka nuPavuli nuBalinaba: UYuda we vahamutahaga nilya Balisaba nuSila she vali vapiti mushivanza. 23Vahavapʼukalata munyove zyavo uwa kuti: swe vapositili navasongo avamwinyu tukuvalamuha mwe muli mw-Antiyokiya namu-Siliya namu-Kilikiya, mwe vamwitu mwe mufumile muvakunzi. 24She twiṿuye ukuti vamo vafumile kumwitʼuku vavagandusizyʼimwe namazwi gavo, ve vavaṿwanginyʼamoyo ginyu, ve tutavatumilʼiswe. 25Pe lelʼiswe twitinkine ukuti tusavule vamʼavamwitu, tuvatume kumwinyu poka nuBalinaba nuPavuli avankundwa vitu, 26avantu ve vwope nuvulanzi vwavo vavutazile pizina lya Mwene witʼuYesu Chilisiti. 27Pe lelo tuvatumilʼuYuda nuSila, ve vakwe vavavuzye kwilomu zyenezyo. 28She zimuhozilʼuMupepʼuMufinjile naswe vovulo ukuti tutavonjezyajʼimwʼumuligo, nkandi huho he pakuti havombwaje: 29Muzilajʼimputile zya malungu, namavanda ninyama ye vabuzite, nizya luvembu. Inga muzilesile zinizi pe munonelezizye. Mulandile lumi.
30Pe vahavasogozya. Avene vahajendʼukufiha mw-Antiyokiya. Pe vahavunganihʼavantu ve vinji, vahavapʼukalatʼula. 31Ilelʼavene lwe vavazizye, pe vahaseshela kulusansamusyo lula. 32PʼuYuda nuSila, she vope vali vakuvwi, vahayangʼaminjʼamazwi aga kuvasuvizya naga kuvajimṿwʼamaha avamwavo. 33Ilelo lwe vadiliye, pʼavamwavo vahalagana navo muvwihalo, ukuti vavale kuli vuvo ve vavatumile. 34UwenʼuSila nyene ahasungwʼukusyala. 35UwenʼuPavuli nuBalinaba ve vahadila mw-Antiyokiya, vahavasambilizya avantu, havili navamwavʼavinji vahakumusyʼintumʼinyinza ya Mwene.
UPavuli nuBalinaba vakulehana
36Ilelo lwe vadiliyʼamanda gamo, pʼuPavuli ahayanga nuBalinaba ahati: Tugalushe, tuhavenyʼavamwitu ve vasamiye munkaya zyonti mwe twavavuzizyʼinongwa zya Mwene, ṿwe vakutendama. 37UwenʼuBalinaba ahati tuvale nuYohani, we vahamutahaga nilya Maliko. 38UwenʼuPavuli ahenya ukuti, umuntʼuno shʼavalesile mu-Pamfiliya, shʼatavazile navo kumbombo, wʼatahondeye ukuvala nawo. 39Pe vahadalinkana nkani ukufiha pala, pe vahalehana. PʼuBalinaba ahamusendʼuMaliko, ahalambʼusumbi ukuvala mu-Sipelesi. 40UwenʼuPavuli ahamusevʼuSila, ahavala nawo lwʼavamwavo vamulajizizye muvwila vwa Mulungu. 41Pʼahatuha mu-Sili na mu-Kilikiya, ahaṿijimṿwʼamaha iṿivanza.
Currently Selected:
Imbombo zya Vapositili 15: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
