Imbombo zya Vapositili 14
14
UPavuli nuBalinaba mu-Ikoniyo
1Namw-Ikoniyo vovulo vahinjila musinagogi ya vaYuda, pe lwe vayangʼinongwa nkani, impugʼimpiti ya vaYuda navaGiliki vahitiha. 2Avene nyenʼavaYuda ve vahazyilaga, vahasonjelezyʼamoyo ga vakunzi nukugahalazya kuvamwavo. 3Pe vahadila mumwo amandʼaminji, vahayangʼapazelʼinongwa mumaha ga Mwene, wʼahasimishizya izwi lya vwila vwakwe, ahavapʼamamfindango namayele ge gahapelwaga ninyove zyavo. 4Ilelo pʼavantu vamunkaya vahatapunkana pahati, vamo vahava navaYuda vamo navapositili. 5Pe navakunzi navaYuda navasongo vavo lwe vakuti tuvavushile, tuvizizye nukuvatinza namavwe, 6pe lwe viṿwa vahashimbilila munkaya zya mu-Likayonya, mu-Lisitila, namu-Delibe, namunsi yonti mwʼizyunguluye. 7Mwe vahadila nukukumusyʼintumʼinyinza.
Mu-Lisitila
8Ilelo mu-Lisitila mwʼali wokʼumuntʼumuyeyevazu iṿinama, wʼahatendamaga, shʼalemaye mwe muhati mwa nyina, wʼatajenzite nalumo. 9Wʼahiṿwa zyʼahayangaga UPavuli. Uwenʼahamutontomela, ahaga ali nulwitiho lwa kupona, 10pʼahayangʼizwʼipiti ahati: Vuhaga, ugoloshe uyimilile niṿinama ṿwaho. Pʼahadovela nukujenda. 11Pʼimpuga zyonti lwe vawenyi zinizi zyʼapezilʼuPavuli, pe vahavusyʼamazwi gavo, vahayanga shi-Likayonya vahati: Amalungu gayipezilʼukuva vantu nukwiha mumwitʼumu. 12UBalinaba vahamutaha ilya Zeyusi, nuPavuli ilya Helimesi, shʼinongwa shima ahaziyangaga wuyo. 13Pʼuwashiputo wa Zeyusi wʼitempeli yakwe yali kushikwilo sha nkaya kunzi, wʼahaletʼinkambaku nuvwezyʼuvuzinje fwe nkata ahavala navwo kushikwilo ukuti afinjile nimpuga yonti. 14Ilelʼavenʼavapositili uBalinaba nuPavuli lwe viṿuye zinizi, pe vahazepulanyʼinkanzu zyavo, vahafuma kunzi nukwinjila mumpuga, vahavilishila 15vahati: Mwe vayaya, shonu she mukuhonzya vovulo? Naswe swe vantu fwe mwemwe. Tukuvakumusizyʼintumʼinyinza ukuti mugaleshe amalungu ga shahʼiga, mumupindushilʼuMulungu umulanzi, wʼapezile kumwanya ninsi nusumbi naṿwonti ṿwe ṿili mumwo. 16Uwene mumaha ga lulwo ge gapitiliye pʼahati inkolo zyonti vajendaje amadala gavo veka. 17Nkandʼuwene atasovelilwe nuvwahome shʼavomṿilʼizya shikuku, ahavatonyelezya nimṿula ya kumwanya, ahavapa namaha ga mboto, pe muhikuta niṿintu nuvusansamusu mumoyo ginyu. 18Ilelo pope nashenga vahayangaga zinizi, kuvantu pahasyala pansi ukuvagojelʼimputile.
19Nkandi vahafiha avaYuda ve vafumile mw-Antiyokiya namw-Ikoniyo ve vahasonjelezyʼavantu, vahamutinza namavwe UPavuli, vahamudendemulila kunkaya kunzi, vahatinji afuye. 20She vamuzyunguluye mwonti avasundikwa, uwenʼahavuha ahinjila munkaya. Ilya ndavi ahafuma poka nuBalinaba ukuvala mu-Delibe.
Ukugaluha mu-Antiyokiya
21Ilelo pe vahavakumusizyʼintumʼinyinza munkayʼino nkuvavuzya avasundikwa ve vinji, vahagaluha ukuvala mu-Lisitila namw-Ikoniyo namw-Antiyokiya, 22vahajimṿwʼamoyo ga vasundikwa amaha, vahavalambilizya ukusyelemetela mulwitiho nilya kuti tuhondeye ukwinjila mushinamwene sha Mulungu mwidala lya mayimbʼaminji. 23Vahavasavula avasongo avahataṿivanza, vahaputa nukufunga, vahavalajizizya kwa Mwene we vamwitisile, 24vahapanguzya niya mu-Pisidiya, vahafiha mu-Pamfiliya. 25Vahayangʼizwi mu-Pelige, pe vahiha ukuvala mw-Ataliya. 26Ukufuma mula vahalambʼusumbi, vahavala mw-Antiyokiya, mwe vavisilwe muvwila vwa Mulungu kumbombo zye vahamalilizya. 27Ilelo lwe vafiha pe vahavunganihʼishivanza shonti, vahavavuzya zyonti zyʼuMulungu avomṿile navo, havili ukuti ahavigulila navakunzi ishilyango sha lwitiho. 28Pe vahadila navasundikwa amandʼaminji.
Currently Selected:
Imbombo zya Vapositili 14: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
