Imbombo zya Vapositili 12
12
Ukuṿwimilwa nuHelodi: UPeteli akutoloha ukufuma mujela
1Pe pamwaha wuyo pʼuHelodi umwene ahavalema vamo avashivanza ukuti avizizyaje. 2Ahamugoga nishipanga uYakobu umukulu wa Yohani. 3Ilelo lwʼayazile avaYuda vakuseshela pʼahonjezya ukumulema nawe Peteli. Mwali mwe mumanda ga makati amasitanyambo. 4Ilelo lwʼamulemile pʼahamwigalila mujela, ahaviha utuvukuto tune twa vasikali vane vane ukuti vamusungaje. Uwenʼakasime ukumufumwa kuvantu lwʼuPasa apitilila. 5Pe vahamusunga mujela. Ishene nyenʼishivanza shihayikungula ukumuputila kwa Mulungu.
6Ilelo lwʼuHelodi asiṿile ilya kumufumwa, pe muvusiku vuvwo uPeteli ahakatʼutulo pahati pavasikali vavili, akunzilwe namanyololo gavili. Kwope nakushilyango vali kukwo avasunzi vavili avakusungʼijela. 7Pʼuhavizya wa Mwene ahamwimilila papipi, nuvuzelu vuhahozya munyumba. PʼahamuhomʼuPeteli kuluvazu, ahamuyinzya, ahati: Vuhaga luvilo luvilo. Pe namanyololo ga munyove gahalagala. 8Pʼuhavizya ahati: Fungagʼilamba lyaho nindyato zyaho uzwalaje. Uwene ahahonzya vovulo. Pʼuhavizya ahamuvuzya ahati: Usumbilʼumutote waho ingʼundandate. 9Pʼahafuma kunzi ahamulandata. Uwenʼatazimanyile ukuti zyʼavomṿile nalyoli uhavizya, uwenʼahati ingavanga nkulota njozi. 10Pe vahapitilila pahavukuto ahatanzi naha vuvili vovulo, vahafiha kulwiji lwa shijela ulwa kusogolela munkaya, lwe luhavigushila lweka. Lwe vafuma pe vahajendʼigulumo lyoka pʼuhavizya ahamuleha. 11Ilelo pʼuPeteli ahayimanya ahati: Ishi pe namanya nalyoli ukuti uMwene antumiyʼuhavizya wakwe, amposile munyove zya Helodi namuli zizyo zye vanenyezyagʼavantu avaYuda iva. 12Ilelo lwʼamanyinsinye zyonti, pʼahafiha kunyumba ya Maliya unyina wa Yohani, we vahamutahaga nilya Maliko. Mwe vavunginʼavinji avakuputa. 13Ilelo pʼuwene ahahonyonsya kulwiji lwa shilyango, pʼumulindu wa mbombo wʼali wʼuLode izina ahavalʼukutejelezya. 14Pʼahamanyʼizwi lya Peteli, ahaseshela ahasita nukwigula kushilyango, ahashimbilila munyumba, ahavavuzya ukuti uPeteli ayimiliye kushilyango kunzi. 15Avene vahamuvuzya vahati: Uli nishipena. Uwene nyene ahumishizya ahati: Nalyoli wuyo. Pʼavene vahati: Fwandi wʼuhavizya wakwe. 16UwenʼuPeteli ahonjezyʼukuhonyonsya. Pe vahigula vahaga wuyo, pe vahatentwa nkani. 17Pʼuwene ahavahandanizya numuhono ahati: Pumaji, pʼahavapanjila ṿwʼuMwene amulongoye ukufuma mujela. Ahati: Zye mumuvuzyʼuYakobu navamwitu. Ilelo pʼahafuma ukuvala kunsi iyinji.
18Ilelo lwe kushiye shandavi, pe kuhasova kuloleha avasikali, vahati: Amwʼavazile kwʼuPeteli? 19UwenʼuHelodi lwʼamulondola apotwa, pʼahavavuzilizya nkanʼavasunzi, pʼahalajizya ilya kuvagoga. Pʼahepa mu-Yudayi, ahiha ukuvala mu-Kesaleya.
Ukufwa kwa Helodi
20Vwamupatiye nkanʼuvulugu vwʼalʼalwanje navamu-Tili namu-Sidoni. Pe vahitinkana, vahavala kwʼali, vahamanyana nuBalasiti umutengashitala sha mwene, vahalavʼuvwihalo. Shʼiṿintu ṿwe vahalyanga munsi yavo ṿihafumaga munsi ya mwene. 21Ilelo pisiku lyoka lye lyaseṿilwe pʼahazwalʼinkanzu ya vumwene, ahatendama pashitengo sha vulonzi, ahavilʼimbila. 22Pʼavantu vahavilishila vahati: Lye lizwi lya Mulungu linili, lite lya muntu ndali. 23Pʼuhavizya wa Mwene ahamuhoma panapo, shʼahasitagʼukumushindihʼuMulungu. Pe zihamulyʼi-mṿinyu, ahafwa.
24Ilyenʼizwi lya Mulungu lihaṿula lihakwila mwonti. 25UBalinaba nuSavuli vahavwela nohavili ukufuma mu-Yelusalemu, lwe vamalʼimbombo yavo vahinza nawʼuYohani we vahamutahaga nilya Maliko.
Currently Selected:
Imbombo zya Vapositili 12: NYi1965
Highlight
Share
Compare
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
