SEFANIA 3
3
Ulyamari lwa Yerusalemu
1Woshiny lwafo Yerusalemu. Muri eto nravi, ukava kilemi, muri ufotaa vandu va vayo. 2Mmbaleirikye Nndumi Iruva nta isara shia takwe-fo. Nta mmba kivikye Nndumi iruva nsia-fo, nta intereva ngarami-fo. 3Vaniini vavayo mmbo vavakye miiso tidinaa. Na veerumbwa myaandu vawo vakavaka makite a ngoroshony atirwa nshaa, nalaraa-u nta iffwa kukye. 4Vakisuku vawo valasaraa kindo, vakava valembi, Vakohani vawo vakatefusa findo fyeele, na mavavaso a Nndumi Iruva vakaafullwa vaambe ekyo kivasennyaa wo veni.
5Kyeendi Nndumi Iruva aiyo. Mmbo atana ekyo kya usumanu kyeni. Wo nkonu mmbo eengye vandu vakwe efyo fya usumanu. Kyeendi lyo yewo varavi vakeengera itana fya uravi nta valalollyaa sony.
6Nndumi Iruva mmbo aamba indi, “Shammaa-fo vandu va masanga woose. Shammamita miri yaawo shara-fo masimamba afikye-fikye. Miri mmbo ilyamarikye, ilatiri vandu. 7Kimmbe indo shakusara vandu vakwa mmbo vashitirya vio neesora shia yakwa, nta vare valarekywa kilya vandu vengyi valetannywa. Llya yeni vakatana uravi uniini mwaasi.”
8Nndumi Iruva aamba, “Sye irisheny mullole nkonu yeto nshederaa na vandu va masanga. Mmbo nshevaaumbya ando amwi na vamangyi vashelollya unyafi lwakwa. Ulana loose mmbo lusheyaa murony kyeendwa ni unyafi lwakwa.
9“Kyeeri ekyo mmbo nshaalashaa kishomu kya vandu. Shivedimisye irera kishomu kyorokye naambo vashivaange yeny Iruva Mwaafinya, na ishiindya kwa ngoo imwi. 10Fika na vandu vakwa vanyanyakye kwaasha na mira kulya Esopia mmbo vasheshuutyaa firaso. 11Kyeeri ekyo eni vandu vakwa nta mmushekitirwaa nsony mashika elyi muleshilyamarya-fo. Neeto moose mwikurosa akee nravi mmbo nshe-dovaa-u. Llyo neeni mulakishilyamaryaa-se alya ifumbuny lwakwa yeele. 12Alya mmbo nsheraa-u vandu vakunyiise, vamamiri, vashiruyaa. 13Vandu yewo va Israeli vasaafo mmbashetannyaa nndu uravi-fo, nta yaamba wongo-fo, nta ilemba-fo. Mmbo vashekukayaa urilalyi, vavikyo mbora, valasheereya nta nndu.”
Kyiimbo kya Ifura
14Imba kukoomi na ifura, ewe Israeli!
Kyesa na nrima wafo moose ewe Yerusalemu!
15Nndumi Iruva amaa yuuta-u ngapo yafo.
ammuumbuta vakiduva vafo.
Nndumi Iruva mangyi wa Israeli akee neewe.
nta kulakyeereye-se-fo.
16Kyeeri kiifo kishaa elyi vasheviaa Yerusalemu
“Kulairyee-se, ewe Sioni.
Kulaviire maako mungo.
17Nndumi Iruva wafo akee neewe
finya yakwe yakweengye ivinga.
Nndumi Iruva ashefuraa neewe
nashekuwonisya muu mwiiya efuraa,
18mushefuraa sha vandu valya sukukuu.”
Nndumi Iruva aamba,
“Shamma yuuta-u urumato
shaangata-u sony tafo.
19Fyeeri fiifo fishaa,
Nshekapa yewo veekufota
Nsheauwa valemwa woose
Shiviire yewo vanyanyakye kyeny.
Na usutu lwawo lushealashwa luve nnduma
Nang'u masanga moose nashevarumisha
20Fyeeri fiifo fisha,
Vandu vafo yewo vanyanyakye vashe kyeny
Nshemuniinga nnduma masangeny koose
mushewuya isenywa-se.
Ni Nndumi Iruva arera indo.”
Currently Selected:
SEFANIA 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
