SEFANIA 2
2
Kiterewo Kya Ipara Ulyamari
1Apaa vandu valalollye usutu, marukyeny-te mukusanyire, 2kulore mwambivitwa makurikwa sha muulu, kulore unyafi lwa Nndumi Iruva lwamuusheya namoore urumato. 3Wuiyeny Nndumi Iruva yeni moose va ulana mukunyiisye, mukeendya mavavaso akwe. Taniny efyo fisumani, mukunyiise efo kwa Nndumi Iruva. Kulokooye musheturunyaa unyafi lwakwe nkonu yeto Nndumi Iruva asheoraa unyafi lwakwe.
Urumato lwa Vandu va Masanga
4Efo muriny wa Gaza nnyashekiaa-fo nndu-fo. Na Ashikelon mmbo ushenyanyatwaa. Vandu va Ashdod mmbo vashekamarwa na lyimwi kulore kwamiila. Na vandu va Ekron-da, vaumbutwa muriny wawo 5Yeni Vafilisti mwandengwa, yeni va mbai ya yeeve. Nndumi Iruva ammuutya uvingo. Mmbo mushemamitwa kure kulakia-u nta nndu. 6Uruka lwanya lukee mbaambaa ya yeeve mmbo lushevaa nrapu, mmba tilatiri vandu, neeto ta moonri tive irama-da. 7Vandu va Yuda yewo vasherewaa-u, wo mmbo vasheningwaa uruka lwany. Kusheva kundu kwawo kwa iisa moonri na mmba ta Ashikelon tive tawo. Nndumi Iruva waawo mmbo ashevakaya varwe na uwe vatire-se finya.
8Nndumi Iruva muni matorito kawuya yaamba, “Mmbo shileeta vandu va Moabu na Vaamoni vashiing'ashaa vandu vakwa nevaarara, vakavekushoba vai mmbo vavasokaa uruka lwawo. 9Ni kya dede shaasa shikee Nndumi iruva wa Israeli, nkuti Vamoabu na Vaamoni vashelyamarwa sha vandu va Sodoma na Gomora. Uruka lwawo lusheva kundo kweraa shumbi na mmbala, kuve nrapu ngorosho deny, vandu vakwa yewo vasaafo mmbo vashetiraa uruka elo lwawo.”
10Niindo vandu va Moabu na Vaamoni vashelyamarwaa kimaruma kya elyi valemina vandu va Nndumi Iruva nevaarara. 11Nndumi Iruva mmbo ashevautaa. Na maruva a ulana elu ashevaa ruu. Na vandu va ulana woose vashemwindyaa, wo umwi ando akai.
12Nndumi Iruva ashemamitaa na vandu va Esopia.
13Nndumi Iruva ashemamitaa na Siria. Nasheallwa Ninavi nrapu, kuve kasa koomu. 14Na findo fyeevikya na mafisi na ndeye fishakaa-fo. Na mafururu nashesawuya-fo. Na makururu nasherua-rua-fo. Na myaango yaawo ya mapoo a maawongu vasheiluwa-fo. Ni indo kishevaa kya muri eto uvikye itumbe lyavayo nsia ukalollya naasa nkiifo, kivapanaa-fo. 15Vandu vavayo nawo vakakusara nto muri ukee torya ulaniny koose. Apaa shaasa efo, kushelyamarikaa, mafisi a ngoroshony asheallwa kwa vayo kwekaa! Wo nndu ashelollya-fo mmbo asheaukwaa mmuu!
Currently Selected:
SEFANIA 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
