SEKARIA 1

Iruva Avaanga Vandu vakwe Vammbuiye

1Kwikee mwiiri wa nyanya, mwaaka wa kavii, kyeeri Dario ekee mangyi ya Persia, irero lya Nndumi Iruva lyikasheya Sekaria, mwana wa Berekia nshuku wa Ido lyikaamba, 2Yeny Nndumi Iruva, mmbo shilenyafukwa nnu, kimaruma kya vande vany. 3Kweekyo, enda kundevavia; Nndumi Iruva muni matorito mmbo aamba, Wuyeny kwakwa, na yeny shishemuwuuya, ni yeny Iruva muni matorito shaamba. 4Mulasheeva sha vande vany, valya vevavaswa mmbakisuku va-mbee. Sheelyi Nndumi Iruva muni matorito aamba, “Ukeny efo meengyeny na mashoreny any makasha, mukooye iwuuya Iruva, indi-lyo valakunde ishaaran ya nta yaalashika. Ni Nndumi Iruva muni matorito aamba.” 5Vande vany nkwi efo vakai? Amwi na vakisuku vawo, mmbo vakaa indo llung'anu? 6Vande vany, mmbo valekooya ngapo kimaruma kya ilema mavavaso na wiikimbi shilevarummya varundi na vakisuku vakwa? Kyeeri kilya valekurya na yaalashika, mmbo valeamba Nndumi Iruva, mmbo eekunndye ilukapa kyeendwa ni mitannyi yeeru. Niindo ngata enkudeesya imutannya.?

Usukukkyo lwa frasi ta mbee

7Kwiike nkonu makumi avii na kaana, mwiiri wa ikumi na lyimwi, wikee nto mwiiri wa Shebat, kyeeri kya mwaaka wa kavii na ushilyi lwa Darius, irero lya Nndumi Iruva, lyikasheya Sekaria mwana wa Berekia nshuku wa Ido, we nkisuku, kaamba. 8Kwikee kio, mmbo shilelollya nndu eesaammye frasi idodorye. Nndu eto mmbo eesalalyi imungony nnag'ani ya miri ya mihadasi. Numa yakwe kweifo frasi tingyi tidodorye, na tingyi ta ifu, na tingyi tefwani shaa. 9Naasa shaamba, “A nkyoki ekyi Nndumi wakwa?” Nsu ulya alerera na yeny, kashivia, Shikoora yewo mmbaki. 10Naasa nsu ulya esalalyi alya nnang'ani ya miri ilya ya mihadasi kashivia, frasi eti mmbo tarumwa ni Nndumi Iruva isalallya ulana. 11Nawo vakarouwa nsu ulya wa Iruva esalalyi kulya nnang'ani ya miri, mmbo lusheeye isalallya na ilola ulana, lukakooya ni kya dede, ulana ni usha, mmbo lumalallyi sau.

12Nalyo nsu ulya wa Nndumi Iruva, kaamba, “Ale Nndumi Iruva muni matorito mmbo kufikaa-kwi kwisuuye indo kya muri yeu wa Yerusalemu; na miri ya uruka yelu lwa Yuda, yei kusuuye kya-vayo ulaalu ando a myaaka makumi mfungare?” 13Nawe Nndumi Iruva, karouwa nsu ulya, kwa marero mesha atiri nsia. 14Naasa nsu ulya alerera na yeny, kashivia, vaanga na unyanga waasha, kwaambaa ule, “Nndumi Iruva muni matorito, mmbo aamba indi, ‘Nrima wakwa mmbo wiishwe ifura kya muri wa Yerusalemu na ifumbu lya Sioni. 15Indi mmbo shisuuye kya masanga yoo ekeefura, na ikushela kya Vaisraeli shasua kyaangu, llyo masanga alya akavaengerya ngapo.’ 16Kweekyo yeny Nndumi Iruva mmbo shawiiya muri wa Yerusalemu, mmba yakwa ya iterevya ipooka itanwa na muri wa Yerusalemu upooke itanwa-se kwa wiiya?” 17Naasa nsu ulya wa Iruva, kashivia-se kapa weele, kwaambe, “Nndumi Iruva muni matorito, mmbo aamba indi, Miri yakwa mmbo ishevikywa mbora lyingyi, yeny Nndumi Iruva, shishefweerisa lyingyi muri wa Sioni, na yeny Shimuni shishekaa yaa Yerusalemu.”

Usukukkyo lwa Wombe

18Naasa shatarammbwa miso shalollya mbembe yiinya. 19Naasa shavesa nsu ulya, ekeerera neeny, “A mbembe yeti mmbo taamba-ki?” Nawe kashirouwa, kashivia, yaa ni masanga alya atiri finya enyanyata vandu va Yuda, Israeli na Yerusalemu.”

20Numa, Nndumi Iruva kashoora veekapa minya vaana. 21Neeny shammbesa, “Vandu eva mmbo vasha itana-ki? Nawe kashivia, ‘Vandu eva mmbo vasha naambo vashekooya ikora mbembe ta vandu valya venyanyata Vayuda, naambo kulashekwiipo-fo lyingyi nndu ashenyanyata-se Vayuda.”

Currently Selected:

SEKARIA 1: MAS2

Highlight

Compare

Copy