TITO 3
3
Mikaaye ya Kikristo
1Kumbura vandu yewo ikunyiisya yewo vatiri wiidimi na ushilyi, vavaindye, neekunda itana mashora mesha; 2valave vearara vandu, valave veruuya myaandu, vave vasaari, vaore urilalyi lwawo kwa vandu woose. 3Mashika elyo mbee naakwa ni yese llweetiri urango-fo, mmbo lwekee varavi, lukalembika, lwiirundyaa lango sheesi ta wo ngata, lwiisindaa uraviny na ukasha neesuvana na vengyi. 4Kyaindi kimaruma kya usha lwa Iruva yeu akee Mwikira weeru, na ukundi lwakwe kwa vandu yelo luleorwa paa kalukira; 5nshi kimaruma kya mashora mesha luletana yese-fo, nkimaruma kya ilyillya lyakwe, luleona llya luleirwa lya kavii na ivikwa wiiya kyuuka na Mumuyo Mweele. 6Yeto luleirityo shapu kyeendwa ni Yesu Kristo Mwikira weeru; 7naambo elyi lukee ekennywa usumanu kyeendwa ni isarya lyakwe, lukooye ivikwa veni ding'u ya muu wa llung'anu, shaasa iirikyo lyeru lyikai. 8Ni irero lya iirikyo dede; na mbony yeto mmbo shikundye kutaambe na ukaari, naambo valya valeirikya Iruva vakummbwe ikaa na mweendo nsha. Efyo mfisha nafyo fitiri mbusha kwa vandu. 9Kyaindi lyo marero a ulai kukwiise nang'u na ng'anu-ng'anu, na myaandu, na ulai lwa mbony toorokye. Mashika efyo mfitiri mbusha-fo nta urango-fo. 10Nndu wa urere, kwammwiikimba lyimwi, kavii, llemi. 11Kwammemanya nndu sheeto mmbo eevekye katana ulyamari neekuutya uvingo we muni.
12Elyi shirumaa Artema ao Tikiko kwafo kutakure isha kwakwa kunu Nikapoli; mashika mmbo shikundye ikaa kunu kyeeri kya mbeo. 13Ruma Zena ulya mwivavara mbony, na Apolo kwa ifura deny, valaanguyo nta nkindo-fo. 14Vandu veru vakuloshe itira maako neetana findo fisha naambo valave sha vandu valavikaa ndunda.
15Yeva woose shikee nawo vakwiidikira. Lwiidikirye valya valukundye efo iirikyony. Isarya lyimukaye yeni moose.
Currently Selected:
TITO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
