USUKUYONY 9
9
1Nnsu wa karaanu kakapa iranda, shalollya nyinyiri yeeluka iruveu, ikawa ulaniny. Nawe kaniingywo ufunguo lwa irina lya kwa vafu. 2Karua irina lya kwa vafu, nsu ukarwa wuuka kulya irininy, uvakye nsu wa nguminy niini, nkyeere na ngyina fikava ireema kimaruma kya nsu yeto wauka efo irininy elyo. 3Nrie tikauka kulya nsuny ulya tikawoya uruka, nato tikatira finya sha finya ya nguluva yoo uteeriny. 4Tikavio tilashepaana mooro wa uruka, ao nta kindo kyoose kyikee kivisi, nta nri, lyo tilye vandu yewo valakee vavike wende lwa Iruva efo fisanguny fyawo. 5Tikavavaswa tilasheevawaa lyo tivatuurwe ando a miiri iraanu. Na mavavyo awo akava sha uroi lwa nguluva elyi yamaara nndu. 6Nalyo kyeeri ekyo vandu mmbo varuuyaa ufu lyo valalulollyaa. Nawo mmbo valanga ifwa, lyo ufu luvarishe. 7Na ngata ya nrie yeto mmbo yekee sha ya frasi tikudeesye kya fira, na mirwe yaawo ikava sheelyi iree ureto lwa saabu, na fisangu fya vayo tikavaka kisangu kya nndu. 8Nato mmbo tetiri fii tivakye ta vaka. Na mayoo a vayo mmbo evakye mayoo a miiso. 9Na yoo mbafuny tikaraa firinga-mbafu fivakye fya minya. Na unyanga lwa maaru a vayo lukava sha lwa makari a frasi shiingyi tikeerishya fireny. 10Nato mmbo titiri minkya sha nguluva, na miinga, na ifo minkyeny ya vayo mfo kweekee finya yeyo yeetuurwa vandu ando a miiri iraanu. 11Nato mmbo titiri mangyi yaawo mmbwe nsu nka wa si kwa vafu, na irina lyakwe kwa Kiebrania ni Abadoni, na kwa Kigriki ni Apolioni.
12Oshiny lwa mbee lulemmaa iira. Lla-te kuseeri-fo oshiny tingyi ivii tishaa numa. 13Nnsu wa karindaru kakapa iranda, shaita unyanga lumwi lwauka efo mbai ya kitara kyeerasya kilya kya saabu kyikee yoo mbee ya Iruva, 14lwiiviaa nsu ulya wa karindaru etiri iranda, “Porommwa na vasu valya vaana vakee vafingye kulya mureny ulya nniini to Frati.” 15Vasu yewo vaana vakaporomuwa, na mmbo yewo ven-deesyo kimaruma kyeeri ekyo na nkonu na mwiiri na mwaaka, naambo vawaa kyenga kya kararu kya vandu. 16Na yeekyena lya maronda a vasikari va frasi efikye fiku makumi avii ka fiku ikumi; llyo yeekyena shileeta. 17Ni indo shilelollya frasi eto efo myooryeny akwa, na yewo vetisaamyi, vetiri findo fyeeringa mbafu, sha fya muro, na ta buluu, na ta kibiriti, na mirwe ya frasi eto nsha mirwe ya miiso, na efo mirweny yaawo kukauka-fo muro na nsu na kibiriti. 18Kyenga kya kararu kya vandu kikawaawa nngapo eto isaru, nto muro eto na nsu eto na kibiriti ekyo mfyo fileuka efo kaniny kyawo. 19Mashika finya ya frasi eto mmbo yuukye efo kaniny kyawo, na efo minkyeny yaawo, mashika minkya ya vawo mmbo ivakye shoka, mmbo itiri mirwe, nato mmbo tituuwa nayo. 20Na vandu yewo valekkya kulaore valewaawa ni ngapo yeto, mbalekurya kya mashora a maako awo, vare valaindya vambishwa, na mafwanu a saabu na a fesa na mawe na miri, yoo alalolaa nta iita nta yeenda-fo. 21Nta mmbalekurya kya uravi lwawo, nta usavi lwawo, nta utuusi lwawo nta unyinyi lwawo-fo.
Currently Selected:
USUKUYONY 9: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
