USUKUYONY 7
7
Wende kwa vandu 144, 000 va Israeli
1Numa ya efyo shalollya vasu vaana vesalalyi taariny iinya ta ulana, vesiika ngyuraato iinya, naambo uraato lulavivite yaa urukeny nta efo yeeveny, nta lulashevivita miri. 2Shalollya nsu ungyi asaama auka taari ya ngama, arye muuri ya Iruva yeto muni muu, karerya vasu valya vaana na unyanga waasha mmbo valya valerambikywa ikapa uruka na yeeve, 3kaamba, “Mulakape uruka nta yeeve-fo, nta miri-fo, kutani elyi lushemaa ivika mashinga a Iruva wende efo fisanguny fyawo.” 4Sheeta marina a yewo valevikwa wende va ngyufyari ta Israeli vafikye vandu fiku iyana na makumi aana na fiina:
5Va ufyari lwa Yuda, fiku ikumi na fivii;
va ufyari lwa Ruben, fiku ikumi na fivii;
va ufyari lwa Gadi, fiku ikumi na fivii;
6va ufyari lwa Aseri, fiku ikumi na fivii;
va ufyari lwa Naftali, fiku ikumi na fivii;
va ufyari lwa Manase, fiku ikumi na fivii;
7va ufyari lwa Simion, fiku ikumi na fivii;
va ufyari lwa Levi, fiku ikumi na fivii;
va ufyari lwa Iskari, fiku ikumi na fivii;
8va ufyari lwa Sabuloni, fiku ikumi na fivii;
va ufyari lwa Yosefu fiku ikumi na fivii;
va ufyari lwa Benyamini, fiku ikumi na fivii.
Ironda Iniini lya Vandu
9Numa ya efyo shalollya ate kwiiyo ironda iniini nnu kulaifo nndu ashiidimaa ilyeekyeena, vandu va wo isanga na wo ufyari na mmba na kishomu, vesalalyi-u mbee ya kitima kilya kya itumbe, na mbee ya Ngurana ya Iruva, veerye soori shaa pyai, varye na maramba a myaangashi maakony awo. 10Vakafua na unyanga uniini vakaamba, “Ukiro ni lwa Iruva weeru yeto akee rembo kitiminy kya itumbe na lwa Ngurana ya Iruva.” 11Na vasu woose mmbo vekee rembo veringyitye kitima kilya kya itumbe taari toose, na mbee ya vamiku yewo na valya vatiri muu vaana, nawo vakawa si kifulufulu yoo mbee ya kitima kilya kya itumbe, vakaindya Iruva. 12Vakaamba, Amen, Mbora na usuri na waarya na fyaanu na wiindi na wiidimi na finya mfya Iruva weeru fika llung'anu na llung'anu. Amen.
13Umwi wa vamiku valya kashirouwa kaamba, “A vandu yeva varee soori shaa indo ni wo vakyi? Nawo nkwi wooka?” 14Na yeny shammbia, “Woi Nndumi wakwa, ni yewe kwiishi.” Nawe kashivia, “Yewo mmbo valya valemmuuka ngatareny ilya ing'ani, nawo mmbo valensangya soori tawo vakaeelyisa na samu ya Ngurana ya Iruva. 15Naasany ulaalu mmbo vakee mbee ya kitima kya itumbe kya Iruva, nawo mmbo vakendundya kio na nsanyiny efo mmba yakwe, na yeto akee rembo yoo kitiminy kya itumbe mmbo ashevavikyaa nruve na yeema lyakwe. 16Nta mmbashekitirwaa nshaa nta nyura-fo, nta mwi ivakora nta nrike-fo. 17Mashika Ngurana yeyo ya Iruva akee nnang'ani ya kitima ekyo kya itumbe, mmbo asheveesaa, nawe mmbo ashevateteraa yeengya ngyusoka titiri mura wa muu, na Iruva mmbo asheangata misoru myoose efo misony awo.”
Currently Selected:
USUKUYONY 7: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
