USUKUYONY 6
6
Ngurana ya Iruva yafisha muuri
1Naasa shalollya kyeeri Ngurana ya Iruva aleporommwa muuri umwi ya ilya mfungare, sheeta umwi wa valya vatiri muu vaana eshambaa, “Osho!” Unyanga lwakwe lukavaka iruruma. 2Shalollya frasi shaa, na yeto aisaamyi etiri ura, kaniingyo ureto nawe kauka-u, evingaa naambo navinge lyingyi. 3Llya aleporomwa muuri ulya wa kavii, sheeta ulya atiri muu wa kavii ashambaa, “Osho!” 4Ikasomuka-fo frasi ingyi, idodorye nnu, na yeto aisaamyi kawonisa mwaanya wa yuuta urilalyi urukeny, naambo vandu vakuwaa veni na veni, nawe kaniingyo usu uniini. 5Llya aleporomwa muuri wa kararu, sheeta ulya atiri muu wa kararu eshambaa, Osho! Naasa shalollya frasi shuu, na yeto aisaamyi erye mesa a yeesa wokony lwakwe. 6Sheeta unyanga lwava sheelyi lukee yuuka nnang'ani ya yewo vatiri muu vaana, lwiishaambaa, Kibakuri kya nganu nshilingyi, na fibakuri fya nganu shuu ni shilingyi, nta kulalyamare mafura na mfinyo-fo.
7Na llya aleporommwa muuri wa kaana, shaita unyanga lwa ulya atiri muu wa kaana eshambaa, Osho! 8Naasa shalollya frasi ifwani ifu, na yeto aisaamyi mmbo avangwaa Ufu, na kwa Vafu, keenda nawe. Nawo vakaniingwa ushilyi uwe ya kyenga kya kaana kya uruka, vawaa na usu na shaa na ndwari shiroo na mafisi a uruka.
9Kyeeri aleporommwa muuri ulya wa karaanu, shalollya yoo kwasi ya kitara kyeerasya mimuyo ya valya valenshishwa kimaruma kya irero lya Iruva, na kimaruma kya ukureekyi lwawo. 10Vakafua na unyanga waasha vakaamba, Woi Nndumi Mweele, muni Dede, mmbo kufikaa indii kulashuutaa uvingo, nta iniinga samu teru usumanu kya yewo vakee ulaniny? 11Wo umwi waawo kaniingyo soori shaasha, shaa vakavio vengere ifura-se ando a kirambo, kutani yeekyena lya veakana nawo na vanavamaye vawo lyafikya, mmbo yewo vashemamitwaa ando amwi nawo. 12Na yeny shalollya kyeeri aleporommwa muuri wa karindaru, kukasha kidinasi kiniini, nkyeere ukafwana muu sha fii shuu, mwiiri nato ukava sha samu. 13Nyinyiri tikaangara sheelyi mkuu utulaa mapora a vayo kyeeri wavivitwa ni uraato lwa finya. 14Iruveeu kukakweete sheelyi nndu alema karatasi, na wo ifumbu na kyuuruka fikasamiswa ando a vayo. 15Na vamangyi va ulana, na vaniini, vaniini va fira, na masimba, na vaafinya, na wo ishinga, na yewo valeke, vakoovya mbangeny na ifo si ya mawe a mafumbu, 16veviaa mawe na mafumbu, luwoyeny, lusikyeny, lulalollyo ni yeto akee rembo kitiminy kya itumbe, na unyafi lwa Ngurana ya Iruva. 17Mashika nkonu yeto nniini, urye unyafi lwawo wansha, a mmbi yeto ashenkyaa?
Currently Selected:
USUKUYONY 6: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
