USUKUYONY 13
13
Mafisi avii
1Naasa numa ya vayo shalollya ifisi lyikeyuuka efo yeeveny lyitiri mbembe ikumi na mirwe mfungare, na uwe ya mbembe eto ni ngyureto ikumi na efo mirweny yeyo ni marina a vearara. 2Na ifisi llya shilelollya mmbo lyevakye nyamandu, na marende a vayo akavaka a ngare, na kana ka vayo sha ka miiso; shoka yeyo ikaniingya ifisi elyo finya ya vayo na kitima kya vayo kya ushilyi na wiidimi uniini. 3Llya shilelola nrwe wa vayo umwi ukava sheelyi utiri itiinga lya ufu, na ngapo ya vayo ya ufu ikashia. Ulana loose lukaawukwa kimaruma kya ifisi elyo. 4Vakee indya shoka yeyo mashika nnyo ileniinga ifisi elyo finya ya vayo, nawo vakawuya iindya ifisi elyo, veshambaa, Ni viiny avakye ifisi elyi? Na lyingyi ni vi ashiidimaa ikapana nalyo? 5Nalyo lyikaniingwa wiidimi lwerera marero maniini a fyaararo. Lyikaniingwa na wiidimi lweerunda ando a miiri 42. 6Lyikatarambwa kana ka vayo naambo lyaarare Iruva, na yaarara irina lyakwe, na ando akwe, na yewo vakee iruveu, 7Lyingyi lyikaniingwa mwaanya wa ikapa fira na veele naambo vavavinge, lyikaniingwa wiidimi uwe ya wo vandu na kishomu na mmba na isanga lya vandu. 8Na vandu woose va uruka mmbo vashelyifiryaa ndi, yeto moose irina lyakwe lyilakee ireiye efo kyitabuny kya muu kya Ngurana ya Iruva, ulya aleshishwa uka llya ulana luleumbwa. 9Nndu atiri kuri naveita. 10Nndu mwitirwa mfingwa, nkuti ashetirwaa mfingwa. Nndu mwiwawa na usu nkuti ashewawaa na usu. Yaa ng'u usisiryo lwa veele lukai. 11Numa shalollya-se ifisi lyingyi, lyisamaa lyuuka ulaniny, nalyo mmbo lyetiri mbembe ivii tivakye Ngurana ya Iruva, lyikarera sha shoka. 12Nalyo mmbo lyirye wiidimi loose lwa ifisi llya lya mbee. Nalyo mmbo lyikeallwa ulana na woose veefo vafiirye ifisi lya mbee ndi, llya itiinga lya vayo lya ufu lyileshia. 13Nalyo mmbo lyiketana ngyende shiingyi, kutani lyeengye muro ukaoloka wuuka iruveu ushe ulaniny vandu velollye. 14Nalyo lyikareta valya vakee ulaniny, kyeendwa ni ngyende tilya lyileniingwa wiidimi lwa itoora mbee ya ifisi llya, vakavia valya vakee urukeny vasongosye ifwanu lya ifisi llya lyetiri itiinga lya usu lyo lyikakaa na muu. 15Lyikaniingwa wiidimi lwa ivika ifwanu llya mumuyo, kutani ifwanu yelyo lyarera, na yeengye yewo woose valashiindyaa ifwanu yelyo vawaawa. 16Nalyo lyivavasye woose vavikwa wende vadu na vaniini; masimba na vakiva, valeke na mashinga, vavikwa wende yoo wokony usha ao yoo fisanguny fyawo. 17Naambo nndu moose nalaidimi ikumba ao yuura, kuuta ulya atiri wende yelo, llyo irina lya ifisi llya ao yeekyena lya irina lya vayo. 18Yoo ng'u ntambo ukai. Yeto atiri urango, naruuye yeekyena lya ifisi elyo, mashika ni yeekyena lya kivandu. Na yeekyena lya vayo ni 666.
Currently Selected:
USUKUYONY 13: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
