USUKUYONY 12
12
Nka na shoka
1Naasa wende uniini lukalollyo iruveu, nka aree nkyeere na mwiiri ukakaa yo si ya marende akwe, na nrweny wakwe ureto lwa nyinyiri ikumi na ivii. 2Nawe mmbo ekufingye, effwaa elyiwaa ni usu lwa mwana. 3Lukalollyo wende lungyi iruveu, shoka niini idodorye, itiri mirwe mfungare na mbembe ikumi, na efo mirweny ya vayo ikaraa ngyureto mfungare. 4Na nkya wa vayo wirufwaa laura ya nyinyiri ta iruveu, netituula ulaniny. Na shoka ilya ikasalala mbee ya nka ulya akeelyiwa ni usu lwa mwana, naambo elyi aniingwaa mwana ilye mwana yeto wakwe. 5Nawe mmbo aleningwa mwana wa kyuumi, nawe mmbo asheesaa vandu va masanga woose na nsengye wa minya. Na mwana wakwe karukwau kafitwa kwa Iruva, yoo kitiminy kyakwe kya itumbe. 6Nka ulya karishya kasa, nakooye ando akee nsongosye ni Iruva, naambo nalalollyo-fo ando a mikonu 1260.
7Naasa kukakaa-fo fira efo iruveu. Mikaeli na vasu vakwe vakakapana na shoka ilya, na shoka yeyo nayo ikakapana nawo na vasu va vayo. 8Lyo mmbalevinga-fo, nta ando vekai nkulekilollyo-se efo iruveu-fo. 9Shoka yeyo ikafwallyo si, shoka yeyo shiniini, shoka nguu, ivaangwaa Nkumbi na Satana, yeto mwireta ulana loose, keerwa ulaniny, na vasu vakwe ando amwi nayo. 10Sheeta unyanga uniini iruveu lwishaambaa, “Ulaalu ukiro lwambonika, na finya na umangyi lwa Iruva weeru, na ushilyi lwa Kristo wakwe, mashika nkumbi wa vanavamaye veru ammeerwa si, yeto ekeevakumba kwa Iruva weeru kio na nsanyiny. 11Nawo vakambinga na samu ya Ngurana ya Iruva na irero lya ukureekyi lwawo, nawo mbalelanga muu wawo-fo, fika ifwa. 12Naasa, kyeseny, yeni va iruveu na woose va efo. Oshiny lwa uruka na yeeve! Mashika nkumbi yeto mmbo ammooloka kwany etirwa ni unyafi uniini, eishi sheelyi ni fyeeri fyaangu-da atiri.”
13Na shoka yeyo kyeeri ilelollya yammerwa ulaniny ikaing'asha nka ulya aleira mwana wa kyuumi. 14Nka ulya kaniingyo maaru avii a uviri llwa uniini naambo narumbuke neende ando akwe efo kasa, yoo akeelelwa ando a myaaka iraru na kyenga, nakee kwaasha na shoka yeyo. 15Shoka yeyo ikauta mura-mfongo nniini efo kaniny ka vayo ukasha yoo numa ya nka yeto naambo umweete! 16Ulana lukaekya nka yeto, ulana lukatarambwa kana ka vayo lukamira mura ulya moose uleuka kaniny ka shoka yeyo. 17Shoka yeyo ikasua nka yeto, ikeenda naambo indekapa fira na vana va nka yeto yewo valesaau, yewo veringa mavavaso a Iruva 18netira ukureekyi lwa Yesu, nayo shoka ikasalala yoo nsangeny mbai ya yeeve.
Currently Selected:
USUKUYONY 12: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
