SABURI 92
92
Kyiimbo Kya Irumisha
1Ni kindo kikwaani yaana Nndumi Iruva,
Na iimbya irina lyafo, ee-da, Kukee ando A uwe.
2Ivambisa usha lwafo ngama,
Na usaari lwafo kyeeri kya kio
3Kwa fiimbo fya sese na kinanda
Na kwa unyanga lwa kinubi.
4Mashika yewe Nndumi Iruva kuleshifurisa!
Nshikapaa ndoro,
Kimaruma kya mashora a maako afo.
5Ee, Nndumi Iruva mashora afo mmaniini nnu!
Makusaro afo ni maroo nnu.
6Nndu nrungani nnyamanyaa efi-fo!
Nta itondo llimanyaa-fo.
7Vandu valakee vasumanu immya sha mare,
Naakwa mmbetana makasha vakainina,
Indi mafurunyony varumatwa llung'anu.
8Indi Yewe, Nndumi Iruva.
Kukee na Nng'anu kwafika llung'anu.
9Ee, Nndumi Iruva, mashika vakyiduva vafo;
Ewo vakyiduva vafo vasherekaa
Na yewo vetana makasha mmbo vashenyanyakaa woose da.
10Indi finya takwa kwating'anisa sha ta mboo ya ngoroshony.
Kwashaamba mafura a ifura!
11Iriso lyakwa lyalollya vakyiduva vakwa vammaa ivingwa;
Kuri kyakwa kyamiita kiiyo kya vetana makasha.
12Nndu wa usumanu mmbo ashiininaa sha nsenefu
Mmbo ang'anaa sha miri ya Lebanoni.
13Yewo vakee vavaakye efo nnang'ani a mmba ya Nndumi Iruva.
Mmbo vashiinaa efo mmbeny ya Iruva weeru.
14Mmbo vavikaa ndunda kufike ukuuny;
Mmbo vavaa miri itiri finya.
15Vavambise sheelyi Nndumi Iruva atiri ilyillya!
Mbanga yakwa, nnang'ani ya vayo kulaifo wafinya!
Currently Selected:
SABURI 92: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
