SABURI 86
86
Kyiterevo kya Itaramo
1Woi Nndumi Iruva, kusheevetye kuri kushirouwe,
Mashika yeny ni nkiva na mfwafwa.
2Kutirishe muu wakwa mashika shikwiindyaa.
Kushikire yeny nndundi wafo shikukusirye.
3Yewe ni Iruva wakwa,
Naasa kushilyillya,
Mashika mmbo shikee ikufuuya nsanyin moose.
4Kuufurise nrima wakwa yeny nndundi wafo,
Mashika fiterewo fyakwa mmbo shikee
Ifirongisa kwafo, Yewe Nndumi Iruva.
5Ee-da Nndumi Iruva, Yewe mmbo kukee nsha na nsari,
Kwava na ulyilyi wiingyi kwa yewo vakuterevaa.
6Woi Nndumi Iruva kwaarannyi fiterewo fyakwa;
Kwaarannyi unyanga lwa fiterewo fyakwa.
7Nkonu wa ukiva shishekuvaangaa
Mashika kusheshiirikyaa.
8Nndumi Iruva, nnang'ani a maruva nnyefo ungyi sha Yewe-fo,
Nta mashora avakye afo-fo.
9Vandu va masanga kulevaumba, mmbo
Vashaa ikufiirya-ndi Yewe Nndumi Iruva,
Mmbo vashearafumaa irina lyafo.
10Mashika yewe mmbo kukee nniini
Yewe mmbwe mwitana fya wende
Nyewe kumuni kukee Iruva.
11Woi Nndumi Iruva kushiloshe ekyo kukundye shikyitani
Mmbo shikwindyaa na waarya!
Ngoo yakwa ifure iindya irina lyafo
12Yewe Nndumi Iruva wakwa nkwaarafumaa
Na ngoo yakwa shoose
Mmbo nshaarafumaa irina lyafo llung'anu.
13Mashika ulyilyi lwafo ni lwiingyi nnu uwe yakwa
Mmbo kuleshikira ufuny
14Woi Iruva, vandu vatiri nrya mmbo vakee ishisheya;
Iroda iriiti mmbo lyikundye ishiwaa,
Mmbandu valakwiishi Yewe
15Indi Yewe, Nndumi Iruva, ni Iruva mwisarya na mwikiiya
Mwisisirya, nkukee wa ilyillya na usumanu
16Kushiindukye kushisarye
Kushiniinge finya tafo yeny nndundi wafo,
Kukyire mwana wa kishinga kyafo.
17Kushoore wende lwa usha lwafo
Valya vashisuyee walollye vasuke
Mashika Yewe Nndumi Iruva mmbo kwansheekya na ishivirya muu.
Currently Selected:
SABURI 86: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
