SABURI 81
81
Imbeny Fiimbo Fyeefura
1Kapeny Iruva wa Yakobo ukoru.
2Oniseny kiimbo kya ifura, kapeny ngoma.
Kapeny sese na fivale fya unyanga usha.
3Kapeny tarumbeta imanyisya ifuma lya mwiiri
Na elyi mwiiri wasimbika kyeeri kya sukukuu tany.
4Elo lo uramba kunu Israeli;
Elyo lyo ivavasyo lya Iruva wa Yakobo.
5Alenniingya vandu va Israeli ivavasyo elyo
Lya alekapa uruka lwa Misri.
Shiitye unyanga shilakee ilumanya nisha lushambaa,
6“Yeny mmbo shilekurwa Mario afo meeveny;
Shakuuta matofari kwerye maakony.
7Kwekee ukiveny kuleshivaanga, neny shakukyira;
Shelekurouwa shikusurumyi efo iruruminy.
Shilekweesa kulya mureny wa Meriba.
8Yeni vandu vakwa aranyiny wiikimbi lwakwa,
Woi Israeli, a nkyema kweshiiranyaa!
9Kwafo kulashekaa-fo iruva yeny-fo;
Nta kulasheindya iruva lyingyi-fo.
10Yeny mmbwe Nndumi Iruva, Iruva wafo,
Shilekuuta kulya urukeny lwa Misri,
Tarambwa kana shikuniinge shoonga.
11Kya indi vandu vakwa mmbaleshaaranya-fo.
Israeli nyaleshikunda deny-fo.
12Naasa shavara vasae na nriya wawo,
Valatye mbony tawo veni.
13A nkyema vandu vakwa veshaaranyaa!
A kyema Israeli elatya shia takwa!
14Mmbo shevinga vakiduva wawo uviny!
Mmbo sheorwa woko shikape vakiishi vawo!
15Yewo vashisuuye mmbo veshifirya ndi kwa werei;
Na ngapo yaawo ive ya llung'anu.
16Indi yewe mmbo shilekulela na nganu shisha.
Mmbo shekuvuutisa na ukyi lwa mbakony.”
Currently Selected:
SABURI 81: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
