SABURI 71
71
Kiterewo kya nndu nkuu
1Woi Nndumi Iruva, mmbo sharishya ikusuruma kwafo;
Kulashire shikooye isuka.
2Yewe kukee wa usumanu shitarama kushikire.
Kushilootye yaarwi lyafo neeshikira.
3Kuve mmbanga yakwa yeerishya,
Na turuve yakwa yeshikira,
Mashika yewe mmbwe mbanga na turuve yakwa.
4Woi Iruva wakwa, shikira kwashuuta efo maakony a vandu vakasha,
Kushuute efo ngyaleny ta vaafinya na veewaa.
5Mashika yewe Nndumi, mmbwe shikuvikye nsia.
Yewe Nndumi Iruva mmbwe shikuvikye nsia ukya shikee mwana nkoo.
6Shakuvika nsia ukya nkonu shewonika;
Yewe mmbwe kushuutye nsangeny wa maye-akwa,
Mmbo shikurumishaa mikonu myoose!
7Veengyi mmbo vakeshilola vakaereya,
Indi yewe kwava turuve yakwa itiri finya.
8Kana kyakwa mmbo kyikeerumisha irina lyafo,
Na itumbe lyafo nkonu piti.
9Kulashere sakyeny kyeeri kya ukuu lwakwa,
Nta kulashitiiye kyeeri shatura finya.
10Mashika vakiduva vakwa mmbo vakeerera makasha uwe yakwa;
Mmbo vakeevika kirisi, yewo vakunndye ishiwaa.
11Mmbake yaamba, “Iruva alemmwisityo-u;
Llatyeny mukandentira,
Mashika nkwiifo mwinkira-fo!”
12Woi Iruva, kulakee kwaasha neeny-fo.
Woi Iruva wakwa angusya naambo kukooye ishitarama.
13Vakiduva vakwa woose vasutwa na imamitwa,
Yewo vakunndye ishaafinya vasuka na yiipalwa.
14Indi yeny mmbo nsheengera ikuvika nsia;
Sheengere ikurumisha yewe kya mmwasi na mmwasi.
15Kana kyakwa mmbo kishaamba mitannyi yafo ya usumanu;
Na mashora afo a ukiro nkonu piti,
Naakwa ni efyo kutannyi fyammiilannya urango lwakwa.
16Kwa mitannyi ya Iruva itiri finya.
Mmbo shishaa shaambe yewe mmbwe nsumanu-nsi.
17Ewe Iruva mmbwe kushiloshye ukya shikee n-du,
Kweekyo mmbo nshaamba kya mashora afo maniini.
18Naakwa shakkwa na fii tikamya myaasa,
Kulashire-fo Iruva wakwa kutani shavia ngyeeri ishaa numa finya yafo.
19Usumanu na finya tafo, ewe Iruva.
Mmbo tisaamye tikafika iruveeu.
A mmbi ungyi akuvakye yewe Iruva,
Katana findo fing'ani indi.
20Kwanshengye shalollya ngatara shiingyi shuumu,
Indi kushiviirya muu lyingyi;
Kushuuta efo sumbai ya uruka, kundesaamisa lyingyi uwe.
21Mmbo kusheshiindya
Na ishiviirya muu lyingyi.
22Mmbo shishekurumishaa na fivale,
Kimaruma kya ilyillya lyafo yewe Iruva wakwa,
Shishekwiimbya na sese yewe kukee mweele wa Israeli.
23Kwa ifura lying'ani,
Shikwiimbya yewe yeny na muu wakwa moose,
Mmbo nshiimbaa mashika ni yewe kuleshikira.
24Mmbo shireraa kya usumanu lwafo nkonu piti,
Mashika valya veekunndye ishaafinya mmbo valesutwa na yiipalwa.
Currently Selected:
SABURI 71: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
