SABURI 34
34
Irumisha Iruva kya ilyillya lyakwe
1Mmbo shirumishaa Nndumi Iruva kyeeri kyoose.
Kyeeri kyoose mmbo shishaamba usha lwakwe.
2Mmbo nshiitikisaa Nndumi Iruva;
Na woose vakewonnyo veete vafure.
3Rumisheny Nndumi Iruva lusasangyi amwi;
Loose lusange amwi luitikise irina lyakwe.
4Shiletereva Ndumi Iruva, nawe kashaarannya,
Kashuuta werei lwakwa loose.
5Alukkyeny Iruva, mukooye ifura;
Tusu, mmukooya isuka-fo.
6Nndu nkiva alefuuya Nndumi Iruva, nawe kamwiirikya,
Nalyo kantarama makiva akwe moose.
7Woose vamwiindya vakaringwa ni vasu va Nndumi Iruva,
Na ikirwa efo nrengeny.
8Manyiny muveni ndesa Nndumi Iruva akee nsha.
Ngoma ewo verishya ukiro kwakwe!
9Indyeny Nndumi Iruva eni vandu vakwe;
Na ewo vemwiindya kavawonisya fya muu wawo.
10Nakwaa ni miiso tifulukywaa na itirwa nshaa,
Indi ewo veindya Iruva vatiri wo kindo.
11Oshony, yeni vakoo, musheshaarannya,
Na yeny shimuloshe iindya Nndumi Iruva.
12A ndesa kukundye mikaaye ya ifura,
Kukundye mbora na muu mwaasha?
13Naasany ra itana makasha!
Nta yaamba wongo!
14Lakana na makasha kuruye mesha.
Lalakya na iruuya ufoo.
15Nndumi Iruva mmbo alolaa vandu vasaari;
Na yaarannya fiiyo fwawo.
16Indi veetana makasha kavakapa mungo;
Kavauta yaa ulaniny nta valakikumbuwaa-se.
17Vandu vasaari wo vakafuuya Nndumi Iruva.
Mmbo avaarannya,
Na ivatarama makiva awo moose.
18Nndumi Iruva akee kufii;
Na valya vafiiye nrima
Kakyira na valya vemme yuuta-pa.
19Maataro a nndu nsaari ni meengyi,
Indi Nndumi Iruva we kankapannya.
20Nndu nsaari mmbo aringwaa ni Iruva
Kulaifo nta iffwa lyakwe lyimwi lyifishwaa!
21Ukasha mmbo lurumataa vandu vakasha,
Na ewo vasuuye vandu vasaari vashekapwaa.
22Nndumi Iruva ashekiraa vandu vakwe,
na ewo vekenrishya mmbashekapwa-fo.
Currently Selected:
SABURI 34: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
