SABURI 33
33
Kiimbo kya Irumisha Nndumi Iruva
1Kapeny Nndumi Iruva mindoro,
Eni vandu va dede,
Rumisheny eni vamirima ikunyiisye.
2Kapeny fivale mwarafumi Nndumi Iruva,
Mwimbieny na kinanda kitiri nruu ikumi.
3Mwimbieny kiimbo kiiya;
Kapeny fivale nisha na ndooro.
4Irero lya Nndumi Iruva ni lya dede,
Na mitannyi yakwe myoose ikavikwa nsia.
5Nndumi Iruva mmbo akunndye fya usumanu;
na ikunda lyakwr lyikaishura ulana loose.
6Kwa ushilyi Nndumi Iruva kaumba ngina,
Kaamba tive-fo, nkyeere, mwiiri, na nyinyiri.
7Kaumbya mura myoose andu amwi,
Na yeeve katifingya andu kumwi.
8Oshoreny Nndumi Iruva ulana loose,
Mwiindyeny eni vandu woose va uruka.
9Mmbo alerera uruka lakatanyika!
Kwa ushilyi lwakwe wo kindo kikautika.
10Nndumi Iruva mmbwe afuluta mirumbuye ya masanga,
Na makusaro awo kaasasammbwa.
11Mirumbuye ya Nndumi Iruva ni ya llung'anu;
Na mitannyi yakwe ni ya fyeeri fyoose.
12Ngoma isanga elyo Iruva akee Nndumi Iruva waawo,
Ngoma valya alevasauwa vakava vandu vakwe.
13Kuuka iruveeu Nndumi iruva kalola sumbai
Nafo kalollya vandu woose.
14Kuuka kitiminy kyakwe kya ushilyi,
Kalola woose vakee kunu ulaniny.
15Mmbwe aumbye makusaro a vandu woose,
Nawe kamanya wo kindo vaketana.
16Mangyi nnyavingaa fira kimaruma, kya mamwiingyi wa vekapana-fo.
Nta mwikapana nnyakooya ivinga, kyeendwa ni finya takwe-fo.
17Frasi ikakooya ivinga nshi kindo-fo
Finya takwe shiingi ntishiidima ikira nndu-fo.
18Nndumi Iruva mmbo alolaa ewo veemwiindya,
Vandu ewo vakusirye isarya lyakwe.
19We mmbwe avakira ifwa
Na ivalela kyeeri kya shaa.
20Nndumi Iruva mmbwe lummbikye nsia,
We mmbwe ngyeekya na ngao yeeru.
21Mmbo lufurye kimaruma kyakwe,
Na ikusirya irina lyakwe yeele
22Woi Nndumi Iruva, isarya lyafo lyikae neese,
Kimmba yese lukusirye na yewe.
Currently Selected:
SABURI 33: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
