SABURI 31
31
Kiterewo Kyeekusirya Iruva
1Kwafo, ee Nndumi Iruva mwitorya, ni kirishyony kyakwa;
Nta kulashire shisuke,
Kushikire yewe wa usumanu.
2Shilootya kaarwi, kushikire swany;
Kwafo kushisurumi
kuleefo kindo kishiidimaa ishipaana.
3Ee, yewe ni isimsmba na finya yakwa.
Kyeendwa ni ikunda lyafo,
Kushoore na ishitetera.
4Shuuta efo nreiyony,
Kushivike ando kusha.
5Maakony afo sharambikya-fo muu wakwa.
Kushikire woi Iruva-Mwitorya,
Iruva wa dede.
6Shisuuye yewo veiindya maruva a wongo.
Kya yeny ni yewe shikuvikye nsia,
Ee, Iruva-Mwitorya.
7Shirumishaa na yaamba kya mitannyi yafo,
Yewe mmbo kulollye ukiva lwakwa
Kwamanya na mikaaye yakwa.
8Nkuleshira shitirwa ni nkiduva-fo
Kwashiniinga uleke, shikweengye kundo shikunndye.
9Shilillya woi Iruva-Mwitorya.
Shikee ukiveny
Shammiiya na miso akwa amfumba.
Finya takwa toose tammisya.
10Finya ta muu wakwa tammariswa mfyoova;
Yee myaaka yakwa myoose
Nyama tikashushuka kyeendwa ni yaatarika.
Naakwa ni mafua nawo akalwaa.
11Vakiduva vakwa vakashiila
Kwa vandu va nnyanu shava sha ifwanu.
Mbuya takwa vakashiilla vakaereya,
Vakakwaanannya na yeny vakashirisha.
12Woose vakashirekywa sha nndu alemmefwa,
Shavaka kirashi.
13Sheeta vandu vereraa kiviri-viri,
Fyereso taari shoose.
Na ivika firembo fya wo ngata,
Naambo vakooye ntambo wa ishiwaa.
14Kya indi ni yewe shikuvikye nsia, ee Iruva-Mwitorya.
Shaamba, “Yewe ni Iruva wakwa!”
15Muu wakwa ni maakony afo ukai Nndumi Iruva
shikira na vakiduva vakwa,
Shikira na yewo vakeeshilamya.
16Kushille yeny ishinga lyafo.
Kushisarye na ishikira.
17Shakutereva woi Iruva-Mwitorya,
Kulashitiiye shisuke.
Kya indi valyamari vasuke;
Vafike-si yefo kwa varumu.
18Raya kana kya yewo vatiri wongo,
Vandu mbafu ewo vakushoba
Yewo veiila vandu vasaari.
19Mesha afo mmbo ailanyi,
Yoo kusurummyi vandu vafo.
Nawoose mmbo veeshi ikunda lyafo,
Na mbora kwa yewo vakuvikye nsi.
20Kwavavika kufii na yewe,
Andu kwaasha na vandu yewo,
Veetana fya ukasha.
21Iruva-Mwitorya narumishwa,
Eto aleshoora isarya lyakwe,
Kyeeri shileringitwa na ikapwa.
22Na yeny shaereya,
“Shakusara mmbo anshira!”
Kya indi kyeeri shilemfuuya
Kaita kiiyo kyakwa.
23Kundeny Iruva-Mwitorya,
Yeni vandu vasaari!
Iruva-Mwitorya akunndye vandu va dede
Kya indi asuuye ewo vatiri kiila
Nawe ashevakapaa ndesa kikwaani.
24Kufingeny kyuumi na ikaarya ngoo
Yeni moose, mukusirye Nndumi Iruva!
Currently Selected:
SABURI 31: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
