SABURI 27
27
Kiterewo Kyeyaarafuma
1Nndumi Iruva mmbwe saa yakwa
Na mwikira wakwa,
sheereya-vi?
Nndumi Iruva mmbwe turuve ya muu wakwa,
Mmbovi shimwereyaany?
2Vetana makasha vekishifikya
Naambo vashirumate
Vetuurwo na vakiduva vakwa,
Mmbo valerendeya vakawa.
3Nakwaa shasengetyo mmatorito;
Nshishereyaa-fo;
Nakwaa shashingillyo mmisa
Nshifwaa nrima-fo.
4Nndumi Iruva, kindo kyimwi shatereva,
Kyimwi-nsi nakyo shikyiruuyaa,
Ni ikaa efo mmba kwa Nndumi Iruva,
Nikonu myoose ya muu wakwa,
Shilole usha lwa Nndumi Iruva
Na ikunda iteterwa efo mmba yakwe.
5Fyeeri fya makiva mmbo asheshisurumaa,
Yefo mmba yakwe, nashivike-fo na ufoo,
Nashaallwe lleke alya uwe ya isimamba.
6Na yeny mmbo shivingaa vakiduva vakwa
Ewo vashiringitye, shishemba kilewa efo mmba yakwe,
Nkapaa weele shirumishe Nndumi Iruva
7Aranya woi Nndumi Iruva;
Aranya unyanga lwa kiiyo kyakwa,
Kushaaranyi na ishitarama.
8Llya kuleamba Ruuyeny usangu lwakwa,
Nrima wakwa ukakwalukya shaamba, Nndumi Iruva,
Usangu lwafo llo shiruya.
9Kushille na ikunda lyafo
Kulashilemi kyeendwa nngoo,
Yeny nndundi wafo,
Yewe mmbo kukee ngyarami yakwa kyeeri kyoose
Kulashire nta ishirekywa,
Woi Iruva mwikira wakwa.
10Naakwaa ni elyi nde na ma wakwa vanshira,
Nndumi Iruva mmbo ashiwarya kwakwe.
11Woi Nndumi Iruva shifunda shia tafo,
Na ishitetera efo shieny ya usumanu,
Mashika vakiduva vakwa ni veengyi.
12Kulaseiye vakiduva vashitannyi
Ndesa vakunndye.
13Shivikye nsia shilollyaa
Ikunda lya Nndumi we Iruva;
Efo kwa vandu vakee na muu
14Vera Nndumi Iruva,
Kaarya, nta kulautepa
Vera Nndumi Iruva.
Currently Selected:
SABURI 27: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
