SABURI 144
144
Mangyi aana Iruva elyi alevinga fira
1Nndumi Iruva neetikiswa, yeu akee isimamba lyakwa.
Yeu aleshilosha shaasa shikabanaa.
2Kukee mwishisarya na mbanga yakwa.
Isimamba lyakwa na mwiikira wakwa,
Ngawo yakwa shilekurishya,
kwavevika vandu vakwa si yakwa.
3A nndu nkyoki Nndumi Iruva kutani kwallola,
Na nndu wa vandu kutani kwamweekya?
4Nndu wa vandu nruu deny;
Suku takwe nsha kirishe kishiira veru.
5Nndumi Iruva fuma efo kukai kushelweekya.
Kubaane mafumbu oote nsu,
6Kweende fimwii vanyanyake!
Kuvaase na mife yafo vasava-e!
7Koorwe woko lwafo luuka efo uwe kushikire;
Kushuute ndilyiny yei, maakony a veny.
8Kana kyawo mmbo kyarera findo filavaa;
Vakatana fya wongo.
9Woi Iruva wakwa nshekwimbyaa kimbo kiiya!
Shikwiimbye na kinanda kya ura kya nruu ikumi.
10Yeto aniinga vamangyi ukiro!
Kaveauwa nsero wakwa Davidi nalashewaawa noosu.
11Shikirandwa mbee kushaauwe maakony a vandu veny!
Kana kyawo mmbo kyarera findo filavaa, vakavetana fya wongo.
12Vana veru efo ukoony lwawo mmbo vavake mooro umyaa
Neewo va kyika vavake ngo teefo mbai
Yeto tikee shishobe naambo titokobe mmba ya Iruva.
13Fisike fyeru fishwe shoonga ta-wo ngata
Na moonri eru afwarike afyaa fiku na makumi fiku efo ngyureny teru
14Nato ng'umbe teru tifwarike kulaifo ngatara,
Nta tilasamiswa samiswafo, nta kulakaefo mwiitikunung'unnya-fo.
15Ngoma nnya yewo vashevaa indo!
Ngoma ni ya yewo vatiri Nndumi Iruva kava mmbwe Iruva waawo.
Currently Selected:
SABURI 144: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
