SABURI 119
119
Mavavaso a Nndumi
1Ngoma yewo shia tawo tisumani,
Vakakaa veelatyaa mavavaso a Nndumi Iruva.
2Ngoma yewo vasora ukireeki lwakwe
vakannduya na nrima moose.
3Yee mmbaletana fya kiila-fo,
Mmbo vakesora shia takwe.
4Yewe mmbo kuleloora shia yafo,
Naambo lusore.
5Mmbo shilangye shia takwe tisumani
Naambo shisauwe mavavaso afo!
6Llyo nsheraa shilasuka
Shiilolaa efyo kuvavasye.
7Mmbo nshekwaanaa na nrima nkesi,
Elyi shammanya usumanu lwafo.
8Mmbo nsheindyaa mavavaso afo,
Naambo kulasheeshira!
Iindya mavavaso a Nndumi
9A niinda mwana nkoo asangyaa shia yakwe?
Neendye na eelatya irero lyafo.
10Mmbo shilekuruuya na nrima wakwa moose
Kulashire sheende mbai na mavavaso afo.
11Mmbo shilevika irero lyafo nriminy wakwa,
Naambo shilashekulyamarya.
12Woi Nndumi Iruva mmbo kukee nnganise;
Shiloshany mavavaso afo.
13Kana kyakwa kashaambaa
Kya usumanu lwa ekyo kushambaa.
14Mmbo shifuraa na shia tafo,
Sha ifura na masaa meengyi.
15Mmbo nsheswaanyaa kya ufundo lwafo
Shivelola shia tafo.
16Mmbo nshefuraa na mavaaso afo nnu,
Nta nshisherekyoo irero lyafo-fo.
Ifura lyikee mavavasony
17Woi mmbee tannya nsero wafo mesha,
Shikie nnu elyi shalatya irero lyafo.
18Shitarambwa miso akwa naamboshilollye
Findo efyo finiini fyuukye efo mavavasony afo.
19Yeny shikee muny kunu urukeny;
Kulashiime mavavaso afo.
20Nrima wakwa mmbo wakurya
Na ilanga mavavaso afo kyeeri kyoose.
21Mmbo kwakyeemya yewo vatiri kiila,
Neewe veera mavavaso afo vakava vadenge.
22Shuuta kiila na ikununguna
Kimmba shanringa irero lyafo.
23Vasongoru mmbo valekusangirya vakashirera.
Lyo nsero wafo mmbo ashesoongyaa kya mavavaso afo.
24Irero lyafo llyo ifura lyakwa;
Na lya veeshilosha
Kya iindya mavavaso a Nndumi
25Yeny mmbo shiwarani na uteri;
Shiviirya muu na irero lyafo.
26Mmbo shilekoongoya mbony takwa.
Shiloshaany mavavaso afo.
27Shoora shia ya kiloshyo kyafo,
Neeny shisoongye kya mashora afo.
28Yeny shimuni mmbo sheeka sha muuya;
Shiniinga finya na irero lyafo.
29Shuuta efo shieny ya wongo;
Irero lyafo lyisheengye isarya lyafo.
30Mmbo shilesauwa shia shisha;
Shavevika usumanu lwafo mbee yakwa.
31Mmbo shiriani na irero lyafo.
Woi Nndumi Iruva kulashire shisuke!
32Mmbo nshaangusyaa isora mavavaso afo,
Elyi kusheauwaa nrima wakwa.
Kiterevo kya imanyissyo
33Woi Nndumi Iruva shilosha mavavaso afo,
Neeny nshearingaa fika mafurumyony.
34Shoora mavavaso afo;
Yee, nshearinga na nrima moose.
35Shiteterya shieny ya mavavaso afo,
Mashika yo ishisennyi.
36Orisa nrima wakwa ulollya irero lyafo;
Ulasheelollya lango ta ulana!
37Orisa miso akwa alalole findo firavi,
Shiniinga muu shieny yafo.
38Vangisya nsero wafo efo kyaaseny kyafo,
Ekyo kya ikwiindya yewe.
39Shuuta nkunung'unu ulavaa;
Mashika usumanu lwafo llo usha.
40Yeny mbo shilangye irero lyafo!
Shiviirya muu na usumanu lwafo.
Ivika nsia mavavaso a Nndumi
41Woi Nndumi Iruva, ulyilyi lwafo lushisheye,
Yee, ukiro yelo kulevika kyaasa
42Neeny llyo nsherouwaa yeto mwiishikumba,
Kimmba shivikye irero lyafo nsia
43Sheekya naambo shirere dede yafo,
Mashika nsia vakwa mmbo ukee yefo mavavasony afo llung'anu.
44Kyeeri kyoose mmbo nshesoraa mavavaso afo
Yee, llung'anu na llung'anu.
45Neeny mmbo nshesalala yoo kutiri mwaanya,
Mashika elyi shankulosha kwafo,
46Irero lyafo mmbo nshelyoongoyaa vamangyi,
Nta nshilyiiryaa son-fo.
47Neeny mmbo nshekyesaa nnu neefyo kuvavasye!
Elyi shifikundye!
48Mavavaso afo yoo shaakundye mmbo nshefuraa nangu.
Shiswaangye kya mavavaso afo.
Ukaari lukee mavavasony a Nndumi
49Kummbwa kyaasa kulevikya nsero wafo,
Mashika ni yewe kuleshivika nsia.
50Ekyo nkyo kyashiviirya muu ngatareny takwa;
Kyaasa kyafo nkyo kyashiirya muu.
51Yewo va kiila mmbo valeshimina nnu,
Lyo shilare irero lyafo.
52Woi Nndumi Iruva, mmbo shakumbwa irero lyafo kikashiviirya muu;
53Mmbo shatirwa ni unyafi kyeendwa ni yewo valaishi usumanu,
Yewo vareeye irero lyafo.
54Mavavaso afo akava nng'u nkeyiimba nkonu simu
Naakwa nkyeeri shikee muny kundo kweny.
55Naakwa nnyelyi shilele shakukumbwa yewe,
Shalatya irero lyafo woi Nndumi Iruva.
56Irero lyafo lyika va llyo masaa akwa:
Uleke mavavasony a Nndumi
57Nndumi Iruva mmbwe waavi lwakwa!
Mmbo nsheindya irero lyakwe!
58Mmbo shilekutereva na nrima moose kushifwaaye.
Kushilyillye shaasa kushivikye kyaasa.
59Mmbo nshesoongyaa asore efyo kuvavasye,
60Mmbo shileangusya isora mavavaso afo,
61Yewo valakee va usumanu vakashaavika nafiwoye,
Lyo shilarekyo irero lyafo.
62Mmbo nshekwaana naakwa ni kio nnang'ani
Kimaruma kya usumanu lwafo.
63Yeny mmbo nsangi neewo vakeekwiinndya
Na valya vakeesora mavavaso afo.
64Ulana mmbo lwallyollya ilyillya lyafo woi Ndumi Iruva;
Shiloshaany mavavaso afo.
Finya ikee mavavasony a Nndumi
65Nsero wafo mmbo kulentannya mesha,
Shaasa kulembia, Woi Nndumi Iruva
66Neeny shilyimya urango;
Naambo shiirikye mavavaso afo.
67Mmbo sheerekye shiilyisswa ukiva,
Lyo ulaalu shammirikya irero lyafo.
68Yewe mmbo kukee nsha mwiitana mesha;
Shilosha mavavaso afo.
69Vandu va kiila mmbo valeshivikya ureeree,
Lyo yeny mmbo shisoraa irero lyafo na nrima wakwa moose.
70Mirima yaawo ikabong'a,
Lyo yeny shakyesa na irero lyafo.
71Mmbo kilesenya nnu llya shilekabwa,
Naambo shuuteu ikulosha kwafo.
72Irero lyafo niisha nnu kwakwa yeny
Ngota saabu na fesa fiku.
Usumanu lukee mavavasony a Nndumi
73Maako afo nng'u aleshuumba.
Shiloshaany mavavaso afo
74Yewo veekwiinndya vashilollye vasennyo,
Elyi shalanga irero lyafo.
75Shiishi sheelyi shia tafo nta usumanu;
Woi Nndumi Iruva kwashikaba kya usumanu.
76Mmbo shakuteeva isarya lyafo lyishiviirye muu,
Shaasa kulevikya nsero wafo kyaasa.
77Isarya lyafo lyishisheye shiwuiyo muu,
Mavavaso afo nng'u ifura lyakwa.
78Yewo vakiila vaone isuka, mashika elyi; valyeshifingya wongo.
Lyo yeny mbo nswaangyaa irerro lyafo.
79Veekwiindya vashiwuiye
Nawo vamanye irero lyafo.
80Nrima wakwa nato ukaariswa ni mavavaso afo;
Naambo shilasheesuka.
Kiterevo kya Ukiro
81Mmbo shauwa ifura kutani elyi nshewonisaa ukiro lwfo;
Mmbo shilevereya irero lyafo.
82Miso akwa nangu akaaraa evereyaa ilollya kyaasa kyafo.
Shishaambaa, A niindii kusheshiviiryaa muu?
83Mashika mmbo shileva sha mboloko ya mfinyo ikee nsunyi.
Lyo nshilerekyo mavavaso afo-fo.
84A suku ta nsero wafo ni yiinga?
A niindii kushootyaa yewo vakeshirishya uvingo?
85Vandu va kiila mmbo valeshireiya misoori
Vallatyaa mavavaso afo.
86Mavavaso afo moose mmesha.
Mmbo vashirishya ruu, shaauwa-dwa.
87Nkinnywa vekeeshuuta yaa ulaniny,
Lyo shilare irero lyafo,
88shiviirya muu na isarya lyafo;
Neeny mmbo nshekwiryaa na irero lyafo
Kikusiryo efo Mavavasony a Nndumi
89Irero lyafo mmbo lyishekau woi Nndumi Iruva fika llung'anu,
Lyikavikywa ukureeki kulya iruveeu.
90Usaari lwafo mmbo luiyoo llung'anu na llung'anu.
91Irero lyafo lyakasaleesau findo fyoose fika inu,
Naambo fyoose fikurundye yewe.
92Irero lyafo lyive lyileva ifura lyako,
Mmbo sherekyaa efo ukiveny lwakwa.
93Fika llung'anu nshisherekyoo mavavaso afo-fo,
Mashika nng'u kwashiviirya nangu muu.
94Shikira mmbee, elyi shikee wafo!
Kimmba shankulosha mavavaso afo.
95Varavi mbo vashivereye naambo vashirumate,
Mmbo nsheswaangyaa irero lyafo.
96Mesha moose ashemandaa,
Lyo irero lyafo llyimandaafo.
Ikunda Mavavasony a Nndumi
97Mavavaso afo mmbo ashisennyi nnu deny!
Nngu nshaasongyaa nkonu simu
98Mavavaso afo mbo ashirangusaa ngota vakiduva vakwa,
Nang'u mmbo shaatiri mikonu myoose.
99Mmbo shitiri urango ngota veelosha vakwa woose,
Mashika ufundo lwafo llyo lukeeshirangusa.
100Mmbo shitiri urango shailanya vamiku,
Mashika elyi shitiri ufundo lwafo.
101Shakwiisa shilasore shia shiravi,
Naambo shiindye irero lyafo.
102Nshilekaa kwaasha na usumanu lwafo-fo,
Mashika ni yewe kumuni kuleshilosha.
103Ufundo lwafo mmbo lurolaa nnu kwakwa,
Ngota wukyi
104Ufundo lwafo mmbo lwashiniinga urango;
Nkyo kimaruma shisuuye shia toose shiravi.
Saa Mavavasony a Nndumi
105Irero lyafo ntaa marendeny akwa,
Na sa shieny yakwa.
106Mmbo shilelya mboo neeny shiinutye:
Shiringe efyo fya usumanu lwafo.
107Mmbo shikeellyise nnu ukiva;
Woi Nndumi Iruva shiviirya muu na irero lyafo.
108Woi Nndumi Iruva, warya firaso fyakwa
Kuveshilosha usumanu lwafo.
109Mmbo shikee nrengeny kyeeri kyoose,
Lyo shilerekyo irero lyafo-fo
110Varavi mmbo valeshivikya misoori,
Lyo shilare shia ya ufundo lwafo.
111Irero lyafo lyikava llyo dingu yakwa llung'anu;
Mashika llyo lyashivangyisa nrima.
112Na nrima wakwa shauvika efyo irerony lyafo,
Kyeeri kyoose yee fika llung'anu.
Uringi efo Mavavasony a Nndumi
113Yewo vatirwa nyinyira mmbo shivasuuye,
Lyo irero lyafo shalyikunda.
114Yewe mmbo kukee ngawo yakwa;
Irero lyafo mmbo shilyivereye.
115Yeni veetana maravi, ukeny kwakwa,
Shiwarani na mavavaso a Iruva wakwa.
116Shivangisya efo fyaadeny fyafo, shikie muu,
Nta kulashire shisuke shikuvikye nsia shimuni.
117Shitarama naambo shikae kipwa;
Shiloleny mavavaso afo kyeeri kyoose.
118Mmbo kwalema woose yewo vashiimbwaa mavavaso afo.
Mashika mmbo wooka mitambo ya wongo.
119Varavi mmbo kavauta sha mamburu;
Nkyo kimaruma shakunda irero lyafo!
120Mmbo nkekureremya shikwiinndyaa;
Wiindi Mavavasony a Nndumi
121Mmbo shatana ekyo kikee kisha na kya usumanu,
Woi mbee kulashireeye yewo vakeeshifota-fo.
122Salallya nsero wafo nawone mesha.
Yewo varavi valasheeshifota!
123Miso akwa mmbo anaraa eevereyaa ukiro lwafo,
Na kyaasa kya usumanu lwafo
124Ora nsero wafo isarya lyafo;
Kushiloshe na mavavaso afo.
125Shoora sheelyi mmbo shikee nsero wafo;
Shiidimi iwaannya irero lyafo nisha.
126Fyeeri fyamfika fya Nndumi Iruva irunda mashora akwe,
Mashika elyi valeimbwa mavavaso afo.
127Nkyo kimaruma shakunda mavavaso afo
Ngota saabu, yee ngota saabu shisha.
128Mashika shilollye ufundo lwafo shaasa lurye mesha.
Neeny shasua shia toose ta uravi.
Lango ya Iindya Mavavaso a Nndumi
129Ufundo lwafo mmbo lwiilanyi fyoose.
Nkyo kyeengye nrima wakwa ukalulanga.
130Yoongwa irero lyafo mmba lyeende sa;
Na yoora yewo valaishi kindo.
131Kimmba shilekunda mavavaso afo,
Nkyo shatarambwa kana shiloshe vengi.
132Shiindukya mmbee, kushisarye,
Shaasa kikooye veekunda irero lyafo.
133Shisumanisa efo irerony lyafo,
Uravi lulasheshillya
134Shiwouwa efo uraviny lwa vandu;
Shiware na irero lyafo.
135Induya nsero wafo kisangu kyafo;
Kulloshe mavavaso afo.
136Miso akwa mmbo akeepuswa misoru
Mashika elyi valakeelatya mavavaso afo.
Usumanu efo Mavavasony
137Nndumi Iruva ni yewe kumuni wa usumanu,
Na mirumbuye yafo ni ya usumanu.
138Mmbo kulevavarya irero lyafo kya usumanu,
na usha deny.
139Mmbo shilekuvinisa shimuni shawa,
Mashika veetuuro vakwa mmbo valera irero lyafo
140Irero lyafo llyitiri nnduma nnu;
Nawe nsero wafo kalyilanga
141Mmbo shamirwa elyi shikee n-du,
Nalyo nta nshirekyoo ufundo lwafo-fo
142Usumanu lwafo llwa llunanu,
Nalyo irero lyafo lyikava dede
143Ngatara na ukiva mmbo filesisheya,
Mavavaso afo ni ifura lyakwa.
144Usumanu lwa irero lyafo llwa llung'anu,
Shoora mbee, shikie muu.
Kiterevo kya Ukiro
145shiirika Woi Nndumi Iruva elyi shikuvaanga na nrima wakwa moose!
Neeny mmbo ntiraa mavavaso afo.
146Mmbo shakuvaanga kushikire,
Neeny shitire irero lyafo.
147Mmbo shatereva ngarami yafo kulore kwankya;
Shavevereya irero lyafo na nsia.
148Mmbo shilala rembo,
Shikusarye fyaasa fyafo
149Kyeendwa niisarya lyafo aranya unyanga lwakwa;
Kushiviirye muu na irero lyafo, Woi Ndumi Iruva.
150Yewo vashisuye vansha kufii neeny;
Vakakaa kwaasha na irero lyafo
151Lyo yewe Nndumi Iruva kukee kufii neeny,
Na irero lyafo ni dede.
152Uka mabookyony mmbo shilemanya mmbo kuvikyeu
Irero lyafo lyikaeu fika llung'anu.
Ilalakya weeki
153Nkyelolaukiva lwakwa kushikire,
Mashika nshilerekyo irero lyafo-fo.
154Shikabannya kushiwouwe!
Kushikire muu shaasa kyaasa kyafo kikai
155Yewo valakee va usumanu mmbawonisaa ukiro-fo,
Mashika mmbakeelola irero lyafo-fo
156Isarya lyafo ni yiingi, woi Nndumi Iruva;
Kushivirye muu na irero lyafo.
157Veeshisora ni veengi vashirumate,
Lyo nshilekaa kwaasha na irero lyafo-fo.
158Mmbo shilelola veetana fya kiila shasukyo deny,
Mashika mmbalelatya irero lyafo-fo.
159Nkyelola shaasa shikundye ufundo lwafo.
Kushiviirye muu kya ilyillya lyafo woi nndumi Iruva.
160Irero lyafo lyoose mmbo lyikee isha,
Na mirumbuye yafo ya usumanu nnya llung'anu.
Kyaasa kya Mavavaso a Nndumi
161Vasongoru mmbo valeshivavisa kya ruu
Lyo nrima wakwa ukatirwa ni usau na marero afo.
162Mmbo nkefura na kyaasa kyafo
Shava sha nndu atiri mifungwa miingi.
163Mmbo shisuuye wongo,
Na irero lyafo shalyikunda.
164Mmbo nkeekurumisha ka mfungare wo nkonu
Kimaruma kya usumanu lwafo.
165Yewo valangye irero lyafo mmbo vaitye ufoo nriminy
Nta nkwiifo kiveengyee nsiindara-fo.
166Mmbo shambereya nnu ukiro lwafo,
Woi Nndumi Iruva, shasora mavavaso afo.
167Nrima wakwa mmbo ulesora irero lwafo,
Shalyikunda nnu.
168Mmbo shilesora ufundo lwafo na irero lyafo,
Mashika mbony takwa toose mmbo kutiishi.
Kiterevo kya Itarama
169Kiiyo kyakwa kikufikye, woi Nndumi Iruva;
Kushore shia na irero lyafo.
170Kiterewo kyakwa kikukooye;
Kushikire kiinani na kyaasa kyafo.
171Kana kyakwa kakurumishe,
Mashika kwanshilosha irero lyafo.
172Ulumi lwakwa lurumishe fyaasa fyafo,
Mashika mavavaso afo ni usumanu.
173Orrwa woko lwafo kusheekye,
Mashika shansauwa ufundo lwafo.
174Mmbo shilangye ukiro lwafo, woi Nndumi Iruva,
Na irero lyafo llyo ifura lyakwa.
175Shiniinga ikaa na muu naambo shikurumishe,
Irero lyafo lyishivikye ngarami.
176Mmbo shileraa-raa sha yoonri lyilatiri mwiisi;
Ruuya nsero wafo mashika shilera irero lyafo-fo.
Currently Selected:
SABURI 119: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
