SABURI 109
109
Kimaruma kya nndu atiri ngatara
1Woi Iruva shikee ikwaarafuma kulamalallye-fo,
2Mashika vandu varavi mmba shitarambuya kana
Kana kya nndu akee nsumanu, kya ntambo.
Mmbo varera neeny na ulumi lwa wongo.
3Ee-da, mmbo vakee irera meesi uwe yakwa,
Na ishisisya kulaifo kimaruma.
4Yeny mmbo shilevakunda, wo vakashikumba
Llyo yeny shilevaterevya.
5Mmbo vashitaa makasha ando a mesha,
Na isswa ando a ikunda.
6Nniinge mwirummbwa mwaandu akee nnyaasi.
Na mwinkumba wakwe nanrwee kwa mwirummbwa mwaandu.
7Erumbuywaa mwaandu nkooywa atiri ukasha,
Na itereva lyakwe lyekenwa ni ukasha lyingyi-da.
8Suku takwe tive shaangu;
Nndu ungyi neepo mashora akwe.
9Vana vakwe varewa ngwera,
Na nka wakwe ave nka wa ding'u.
10Vana vakwe varwe-rwe veterevaa shoonga;
Shoonga yaawo iwonike kwaasha na kyeny kwawo.
11Mwimmbesa siye, nansoke masaa akwe moose,
Na veny veepoo umasi lwakwe.
12Kulawonika nndu allyilya-fo;
Ao ivavara lyakwe yewo vakee vare ngwera-fo.
13Ngyeeri yakwe irumatwa.
Irina lyakwe lyivekyeko irikeny lya kavii
14Ukasha lwa vandeye lukumbuwa usanguny lwa Nndumi Iruva;
Na ulyamari lwa maye lulasangywa-fo.
15Five usanguny lwa Nndumi Iruva llung'anu,
ikumbuwa lyawo lyireke kunu ulaniny
16Mashika nnalekummbwa ilyillya-fo;
indi mmbo aleumbuta mfwafwa na mwiting'wa
Kumande kava nndu afiyye nrima.
17Alekunda idenga vandu;
Nakyo kimmbuiye we muni.
Nnyalekunda ivakya mbora-fo;
Ekyo kyikakaa kwaasha nawe.
18Mmbo aleraa kidengo kyikava sha soori yakwe,
Kidengo kyikamwaanga ngoony,
Kyikamporisa sha mura,
Na lyingyi kyikamwaanga mafueny sha muungo.
19Kyimmbiiye indo kwakwe sha soori eto araa;
Lyingi kyinringitye sha uruumu llung'anu.
20Llo weesi lwa vakyiduva vakwa uka kwa Nndumi Iruva
Na kwa yewo vakee ishifingya makasha muuny wakwa.
21Na Yewe Iruva, Nndumi Iruva kushitanyi kyiinani,
Mashika ilyillya lyafo ni isha, kushikyire,
22Mashika yeny ni mfwafwa na mwaanguye,
Shavaviswa kumande efo nnang'ani a ngoo yakwa.
23Nshikeira sha kirishe kyikeeirumika;
Mmbo shikee ivivitwa sha nre.
24Ndi takwa mmbo tammba shinana kimaruma kya itereva na ikootoya,
Shasaa-u mafwa meni.
25Mmbo shammba kindo kya iteendwa mmbo;
Vakanshilollya mmbo vasisika mirwe yaawo.
26Woi Nndumi Iruva, Iruva wakwa sheekya!
Kushikyire kyiinani na ilyillya lyafo.
27Nawo vakumanyi sheelyi mmbo kukee woko lwakwa,
Nndumi Iruva, Nyewe kuletana efyo.
28Wo vadenge, indi Yewe kushivikye mbora,
Yewo vakeshisisa vakasutwa!
Indi yeny nndundi wafo shifuraa!
29Vakyiduva vakwa vaaluwa kyinyala;
Varee usutu lwawo sha soori ya ikusikya.
30Nndumi Iruva, mmbo shikwaana na kana kyakwa,
Ee-da mmbo shikwaarafumaa nnang'ani a ikwaanu.
31Mashika we mmbo akapannya nkyiva,
Kankira kyeeri arumbuyo mwaandu.
Currently Selected:
SABURI 109: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
