FYAASO 9
9
Urango usha na urung'ani
1Urango usha ansongosya mmba yakwe,
Mmba itiri ngo mfungare.
2Ashisha fyeelya,
Andesya fyeena,
Kaala mesa yakwe.
3Anruma mashinga akwe a kyika efo miriny.
Va vaange vandu efo fidoroony.
4“Yeto wo moose akee ntondo nashe yaa!”
Na yeto wo moose akee nrung'ani kammbia:
5“Osho, kulye shoonga,
Kuni na wari shilerika.
6Lakana na utondo kukooye muu;
Sora shia ya urango.”
7Mwiallwa nndu wa kiila mmbo awonisa firumu.
Mwisakira nndu nkasha mmbo afurumya ivaviswa.
8Kulaikyimbe nndu atiri kiila-fo mmbo akuswaa;
Ikimba nndu nrango nawe akukundaa.
9Losha nndu nrango nawe asheengeraa iva nrango.
Losha nndu nsaari nawe asheengeraa irangwa.
10Iinndya Nndumi Iruva nlo uvasha lwa urango usha.
Na imanya yeto mweele ni iwonisa urango.
11Kwa ngarami yakwa yeny urango usha mikonu yafo isheengerekaa
Kusheengerywa myaaka miingi muny wafo.
12Kwakooya kutiri urango usha llukuvesya yewe kumuni.
Kwa ipala oshiny llwafo kumuni.
13Nka nrung'ani atiri ngula.
Nnyeeshi kindo-fo nta nnyasuka-fo.
14Nyakaa rembo mwaangon wa mmba yakwe,
Kavika kitima kyakwe ando a uwe yoo muriny.
15Kavaanga vandu vashiraa shia
Veendaa mashoreny awo:
16“Yeto akee itondo ashe yaa,”
Na yeto akee nrung'ani kammbia,
17“Mura wa unyinyi urolaa deny;
Nkate ulyiwaa kirisi ukee nsha nnu.”
18Indi ntondo nneeshi sheelyi ni vandu vafiiye-fo
Veny vakwe vakee kwa varumu.
Currently Selected:
FYAASO 9: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
