FYAASO 8
8
Uvaango lwa urango usha
1Aranyiny! Urango usha akevaanga!
Urango akelyeesa unyanga lwakwe!
2Uwe ando a kidooro kufii na shia,
Ando a shia ya ntana mmbu ando akuvikye.
3Kufii na ando mwaango wa yaanga muriny,
Ando vandu vaangaa nangu akeevaanga na unyanga waasha,
4“Eni vandu woose, shamuvaanga yeny!
Unyanga lwakwa n kimaruma kyany vandu va vandu.
5Eni matondo! Kufundeny iva na urango.
Aranyiny na nshushwa eni varung'ani.
6Aranyiny, mashika kindo shamuvia ni kindo kyaantu;
Firomuny kyakwa kushukaa-fo ufundo usha.
7Kana kyakwa nkishaamba dede sheni
Kindo kyeesi nshikisuuye muny wakwa.
8Kana kyakwa nkashaambaa marero a dede sheni.
Ulembi ni kindo kyeesi firomuny fyakwa.
9Kwa nndu eeshi wo kindo kya sa,
Kwa nndu atiri urango fyoose ni fya songosiny.
10Sauwa ufundo lwakwa ando a fesa,
Na irammbwa mbony ando a saabu shisha.
11Yeny urango usha shitiri uuru uniini ngota wo kindo kisha.
Nta kindo kyimwi kiisha kishiidimaa ivakaniswa na yeny-fo.
12Yeny urango usha shitiri umanyo.
Shitiri urango na utele.
13Iindya Iruva Llimmbi ni isswa wo kindo kiravi.
Shisuuye umbafu, ukushobi na mikaaye mikasha.
14Shitiri widimi lwa iikimba na urango usha;
Shitiri umanyo na shitiri finya.
15Kwi ngarami yakwa vamangyi mmbo vashillyaa,
Vashilyi vakarummbwa kya usumanu.
16Kwi ngarami yakwa vateteri vakashillya,
Vaniini na vashilyi va songosiny.
17Shikundaa valya vashikundye.
Valya vashiruuya na usau vakashiwonisa.
18Usimba na usuri n kwakwa fikaa.
Masaa a llung'anu na fyeelya.
19Ndunda takwa n shimamiri ngota saabu shisha,
Mbusha yakwa ikailanya fesa shiingyi!
20Nsheendaa shieny ya usumanu,
Sha sora shia ya songosiny.
21Yeny mmbwe shaallwaa yewo vashikundye masimba,
Shaishura shapu mbeshe ta yewo veshikunda.
22Nndumi Iruva mmbo eshuumba mapokyony a mashora akwe,
Elyo kasha nnu kulaore kweifo nta kyindo kyimwi.
23Mmbo sheetanwa mapookyony a fyeeri,
Shevekaafo kulaore ulana lwemmbeiyo.
24Mmbo shewonika kulaore yeeve iniini lyenkaafo,
Kulaore soka tenruta mira.
25Kulaore mafumbu emuumbwa,
Na fidooro isalala ando avayo, yeny shevekaa-fo
26Kulaore Iruva emmuumba ulana na minda yakwe,
Nta mbekye ta mbee ta kiluulyi kya ulana.
27Sheifo kyeeri evika-u ngina
Na uringiti uwe ya yeeve.
28Kyeeri etumarisa mafishi iruveeu,
Kyeeri eallwa soka ta yeeve shitumari.
29Kyeeri evikya yeeve nnyanu wa vayo,
Mura wa vayo ulakillye ivavaso lyakwe,
Kyeeri evika uvasha lwa ulana,
30Llyo shekee nawe sha mfuru nrango.
Shaveva ifura lyakwe wo nkonu,
Shafurya mbee yakwe llung'anu.
31Shefurya ulana na yewo vekee-fo,
Na isennywa ikaa ando amwi na vandu!
32Naasa, vanakwa, shaaranyiny,
Ngoma valyaa valatya shia takwa.
33Aranyiny ufundo muwonise urango usha.
Nta mulalemi-fo.
34Ngoma nndu mwiarannya,
Yeto asindaa wo nkonu mbengyeny kwakwa,
Alalaa shoovi mwangony kwakwa!
35Yeto ashiwonisaa yeny awonaa muu
Ankoya isarywa ni Nndumi Iruva.
36Yeto mwishimina akuvavisaa we muni.
Woose vashisuuye mmbo vakundye ufu.”
Currently Selected:
FYAASO 8: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
