FYAASO 27
27
1Kulakushoppye ndesi,
Nkwiishi nkyoki kishutikaa inu kufike ndesi-fo
2Ra vandu vengyi vakuitikise;
Ngota kana kafo kumuni!
3Iwe ni iroo na nsanga kiwo,
Indi ngusana ya nrung'ani nshiroo kikailanya.
4Ngoo ni uriiti na unyafi llumamitaa,
Indi mmbi ashiidimaa ilimba kififi?
5Nngwaana nndu mwikuikimba vanduny,
Ngota mwisuruma ukundi!
6Usakiro lwa mbuya lloora waarya
indi kimimindo kya nkiduva ni ulembi.
7Nndu awuti naakwaa ni ukyi mmbo aulemaa,
Indi nndu atirwa n shaa, kindo kivavaa kwakwe nkirolaa.
8Nndu arekkye kwaasha na kwakwe,
Nsha ndeye irekkye kwaasha na kifuri kya vayo.
9Mafura na mfwaamu wavayo mmbo usennyaa nrima,
Indi ukiva llurandwa nrima.
10Kularekkyo mbuya tafo nta va ndeye wafo.
Kwambwoywa nni renga kularishye kwa mwana mau,
Ni kyeni nndu wa nnyanu akee kufii ngota mwanamaye wa nndu akee kwaasha.
11Tira urango usha mwanakwa,
kweengye nrima wakwa ifura!
Na yeny nshituraa kyerouwa mwishiutya uvingo-fo.
12Nndu nrango mmbo alollya renga kaiyama
Indi ntondo we nnyeenda ree kavavyo.
13Nndu kavika kyaasa mbee yafo kakuvika ando a muny, ipoo isara lyakwe;
Kuti we nataa siye ando akwe.
14Nndu ashiidikiraa nndu wakwe wa nnyanu na unyanga waasha ngama,
Kimanyike sheelyi mmbo anndenga!
15Nka wa kyooronye wo nkonu
Nkyimwi sha marony a mmbwa ashoolokaa lyimwi lyimwi kyeeri kya mmbwa.
16Insiika ni kyimwi na isiika urato,
Ao itira mafura na woko.
17Minya mmbo innwaa minya,
Naaki-wo nndu mmbo aloshwaa ni nndu ungyi.
18Mwiremya nri wa ndunda mmbo alyee ndunda,
Mwifurukannya nndumi wakwe mmbo aniingwaa wiindi.
19Shaasa kukulollyaa kisangu kyafo mureny,
Ni indo kukwiishi kumuni nriminy.
20Kwa vafu na umamito mfiwuraa tusu-fo,
Nnaakiwo miso a vandu nnyawuura-fo.
21Usha lwa fesa ao saabu mmbo lweeswaa na muro,
Na nndu mmbo eswaa mmashora akwe.
22Naakwa kwakappya nndu nrung'ani kyuuriny amwi na meemba,
Urung'ani lwakwe llummukaa-fo.
23Lola nisha ironda lyafo,
Kulle nisha findo fyafo feevikkya,
24Mashika usimba llukaa llung'anu-fo,
Nta ureto llukaa ngyeeri toose-fo.
25Kwammaa iruuna usaka na isangyirya,
Uta mare fidoorony kyeeri usaka lukemmya lyingyi,
26Moonri mmbo akuniinga ruu ta isongosya soori,
Suvana nato kukumbaa kuure minda;
27Tifye ikuniinga malela a kuffye yewe na va mmba yafo,
Na fishinga fyafo.
Currently Selected:
FYAASO 27: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
