FYAASO 26
26
1Wiindi nndu nrung'ani aniingwa llumwekyaa-fo,
Nsha laura ya kyaamwi kyeeri kya mwi ao mmbwa kyeeri kya iiluula.
2Sha ikolowiru ao kishakweere fikeerummbuka filashiimuyaa,
Naakiwo kidengo kilasumani nkikooya nndu-fo.
3Ngowa ya frasi, kyoove kwa nshungu,
Na mbiiri kwa mungo wa nrung'ani!
4Kularouwe nndu nrung'ani kirung'ani kulashe immbaka.
5Rouwa nrung'ani kisumani na urung'ani lwakwe,
Naambo nalasheekulollya mmbo atiri urango usha mmwasi.
6Iruma nndu nrung'ani rumi,
Ni kyimwi sha ikumanya urende ao ikuruuyya ukyiva.
7Fyaaso kaninyy ka nrung'ani,
Ni kyimwi sha marende a kitongororo.
8Iniinga nrung'ani wiindi,
Nikyimwi sheefingya iwe ukoveny lwa yeera.
9Nrung'ani akee kwiita irera fyaaso
Nsha nnangwa akekuuta mwiinga wonkony.
10Nndu aniinga nrung'ani ao nnangwa mashora a weesi
Nsha mwiasa mife ashaasa wo nndu.
11Nrung'ani awuuiyaa urung'ani lwakwe wo sa,
Ni kyimwi na kite kilyaa uraako lwa vayo.
12Kulollye nndu yeto akulollye atiri urango usha?
Nshakuvia nrung'ani ni kyeni ngota we.
13Nndu nroko mmbo aamba, “Efo poo kwiifo miiso;
Nshiidimaa yeenda-u-fo.
14Sheelyi iboo lyikwindukkyaa yoo malungony a vayo;
Ni kiwo nndu nroko uwe ya kitara kyakwe.
15Nndu nroko mmbo avikaa woko ndeeveny wa shoonga
Indi n nashiidimaa iipo naroe kaniny-fo.
16Ndu nroko mmbo akulollya sheelyi nyatiri urango usha,
Ngota vandu mfungare vaidimaa irouwa kwa urango.
17Mwikwiita mwaanduny ulakwaany nawe
Nkyimwi na nndu atiraa maarwi a kite kikeira.
18Sha nsukwa atavanyaa muro ao mife ya ufu,
19Niindo akee nndu aretaa nndu wa nnyanu,
Numa kaamba, “Mmbo shekee mwesa-da.”
20Kulaifo ngwi muro mmbo urumikaa,
Kulaifo mwiiaya mwaandu mmbo usyaa.
21Sheelyi makaa ao ngwi tiviirwaa murony
Ni indo mwisakkya aoswa mwaandu.
22Marero a mwirera vandu vengyi mmbo avakkye nteera
Mbushoo lokaa kutani wafika ndewuny.
23Sha woyo lushope lukawarama,
Ni indo akai marero mesha atiri ntambo.
24Nndu asuuye mmbo asurumaa isswa lyakwe na marero mesha,
Kya indi nnyatiri ntambo nriminy wakwe.
25Karera nisha kulamwiirikkye-fo,
Nriminy wakwe mmbo kwiishwe ntambo.
26Ashiidimaa isuruma ngoo yakwe,
Indi ntambo wakwe mweesi ushemanyikaa kwa vandu woose.
27Mwisumya uroe ishombo, ashewaa-fo we muni;
Mwibiringita iwe lyiishemmbuyyaa we muni.
28Mwirera wongo mmbo assuye yewo akee vavavisa,
Nawe mwilelemba mmbo aendee umamito.”
Currently Selected:
FYAASO 26: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
