VAFILIPI 1
1
1Ni yeny Paulo na Timoteo, lukee mashinga a Kristo Yesu, lwamureiya yeni veele va Kristo Yesu mukee Filipi ando amwi na vesalallya siri na vatarami va vayo. 2Isarya lyimukaye na urilalyi luukye kwa Iruva Nde na kwa Nndumi Yesu Kristo.
Paulo aterevya Vafilipi
3Wo kyeeri shamukumbwa yeni mmbo nkeyaana Iruva. 4Wo nkonu shavemuterevya yeni shiiterevaa na ifura, 5kimaruma kya wiitanu lwany ivambisa Nrumi ya Nsia, uka nkonu ulya wa mbee na kufike inu. 6Na kindo shivikye nsia ni ekyi, sheelyi yeto alepooka ishora elyo isha indo efo miriminy yaany nkuti nashelyiinutya kufike nkonu yeto wa Kristo Yesu. 7Na shaasa kivekee kuti yakwa shimukusarye kya efyo fyoose, mashika yeni mmbo mukee kunu nriminy wakwa, kimmba kyeeri kya ikaa lyakwa kifingyony neefo ishoreny elyo lya ikureekya Nrumi ya Nsia na iivangisa, yeni moose mmbo muleakana neeny isarya elyi. 8Mashika na Iruva ni nkureekyi wakwa shaasa shitirwa ni nsia kimaruma kyany yeni moose shikee na nrima wa Yesu Kristo. 9Na kiterewo kyakwa nkyo ekyi, ikunda lyany lyeengere ing'ana nnu mwikee na waarya na umanyo loose; 10muwarye yefyo fikee fisha, naambo mutire mirima myaa, ilatiri ivara, kufike nkonu yeto wa Kristo. 11Indo muvekaa-fo mwiishwe ndunda ta usumanu kyeendwa ni Yesu Kristo, kya itumbe na nnduma wa Iruva.
Ikaa na Kristo
12Lyo vana vama vakwa, mmbo shikundye mumanyi sheelyi filya fyoose fileshikooya mmbo fileenda indo mmwasi kyeendwa ni ikwaanisa Nrumi ya Nsia. 13Naakwa ni ifingwa lyakwa mmbo lyilekoora paa kwi Kristo, vasikari vakalollya, na vandu vengyi-da. 14Na veengyi va yewo vakusirye Nndumi, kyeeri vakeekaariswa kyeendwa ni ifingwa lyakwa, vakeengera ikaarya yaamba irero lya Iruva kulaiyoo weerei. 15Mashika kwiifo vengyi vakeevambisa mbony ta Kristo kimaruma kya uriingyi na ukasha; na vengyi lyo kyikee kya usha. 16Wo mmbo vakeyaamba Kristo na ukundi, veishi sheelyi yeny mmbo shikee nsauwe naambo shikureekye Nrumi ya Nsia; 17kyaindi kwiifo yewo vakeamba Kristo na uriingyi kilakee kya nrima mwaa, naambo vafumbute ngatara ta ifingwa lyakwa. 18A-kyamaany-kyi? Lyo na kyikava inda, kwakooya nkwa ntambo, ao kwakooya ni kya dede, lyo Kristo akee yaambawa tupu, nkyo neeny shitirwa ni nsia, na sheengere ifura. 19Mashika shiishi shamanya efyo mmbo fisheshiwuiyaa five ukiro kwakwa, kyeendwa ni fiterewo fyany neesimbwa Mumuyo wa Yesu Kristo; 20shaasa sheevikye nsia deny, na ilanga, sheelyi nshiwonaa isuka-fo, indi shiishi na nshusshwa wo nkonu, na ulaalu-da Kristo nkuti nawoni iitikiswa mwiiliny wakwa, kwakooya shikee na muu ao kwakooya shifiiye. 21Mashika kyakwa yeny ikaa na muu ni Kristo na ifwa ni mbusha. 22Lyo kwakooya ikaa na muu shikee indi na mwiili ni ndunda ta mashora akwa, naasa ekyo nsauwaa nshikiishi-fo. 23Mmbo shikee nsisirye yoo nnang'ani ya findo fivii, mmbo shilangye yeenda shindekaa na Kristo, mashika mmbo kyevaa kyisha mmwasi. 24Neekaa na mwiili mmbo lyikee isha mmwasi lyo kimaruma kyany. 25Neeny shambikya efyo nsia, shiishi sheelyi mmbo nkaa-u na yaakana neeni, naambo mukooye yeengera ifura efo kikusiryony; 26naambo mweengere ifura mukee na Kristo Yesu kimaruma kyakwa kyeendwa ni ishekaa neeni lyingyi.
27Llyo mikaaye yaany ive shaasa kiisumanyi Nrumi ya Nsia ya Kristo. Naambo kwakooya shasha neemulollya, yeni, ao kwakooya shilaiyo, shikooye iita mbony tany, sheelyi mmbo muselelyi shumu mwikee na nrima umwi nsi, mwiikapannyaa iirikyo lya Nrumi ya Nsia. 28Mure mulairyaa vakiduva vany kya kindo kyoose, kwa yewo ni wende lulollyo paa lweereka, lyo kwany yeni ni ukiro yelo luukye kwa Iruva. 29Mashika mmbo muleniingyo kimaruma kya Kristo, nshi naambo mumwiirikye-da-fo, ni ando amwi neelyiswa ukyiva kimaruma kyakwe; 30mwiikee na fira ilya sheni muleilollya kwakwa, na iita sheelyi shikeekapana fika ulaalu.
Currently Selected:
VAFILIPI 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
