VAEFESO 6
6
Kya vana na vandeye
1Yeni vana, indyeny vamiku vany kimaruma kya Nndumi, mashika elu llo usumanu. 2Indya nde wafo na maae wafo, ivavaso elyi llyo lya mbee lyitiri kyaasa. 3Kuwoni ngoma, kuwoni suku shifumbutu yaa ulaniny. 4Na yeni vande va vana, mulatavise vana vany, kyaindi valeleny vang'ani veetiri vio vaveringa mavavaso a Nndumi.
Kya mashinga na vanndumi vawo
5Na yeni varundi va vandu, indyeny vanndumi vany yewo va yaa ulaniny mwiireiye neereremya-u, mwiikunyiisye nriminy, kimwi sha iindya Kristo muni. 6Nshi sha wiindi lulollyo na miso lwa vandu vakeekukundisa kwa vandu-fo, kyaindi muve sha mashinga a Kristo, mutani findo fisenyi Iruva na nrima umwi nsi; 7mwikee na nrima nsha sheelyi mukeerunndya Iruva na kilave sheelyi nkya vandu-da-fo. 8Mwiimanyaa sheelyi wo kindo kisha nndu atana mmbo ashekitawaa ni Nndumi evirywaa ekyo kyeni, kwava ishinga ao nndu lleke. 9Na yeni vanndumi va vandu, kyevetanyiny varundi vany efyo fyeni, nta mulavatavise ao ivamatwa, mwiimanyaa sheelyi Nndumi yeto waawo na waany ni yeto umwi wa iruveeu, nawe nnyatiri ikunndya-fo.
Fira ya nrima
10Na kyingi-se, engereny iva vakaari mukee na Nndumi na wiidimi lwa finya yakwe. 11Raeny fisha fyoose fya Iruva, mwiidimi ivinga mitambo ya Satana. 12Mashika fira lutiri yekapana nshi ya samu na mwiili-fo, ni fira yekapana na ngyumangyi na finya, na vaniini veshillya efo ireeminy, na ya matorito a mimuyo mikasha ulaniny lwa mumuyo. 13Kimmba ni indo ipoony fisha fyoose fya Iruva, naambo mwiidimi ikapana na uravi, na mukammaa iinutya fyoose musalaleny. 14Kyasia kwiipony shu, muveraa dede, neeraa kyisha kiringaa mbafu kya usumanu. 15Na marende any nakudeesye yeenda sere indeamba Nrumi ya Nsia yeyo ishendee urilalyi. 16Mmwasi ya fyoose mwiipoo ngao yaany nnyo kikusiryo, nayo nnyo imwekyaa irummya mife yeyo ya muro ya yeto nravi. 17Na lyingyi muvewarya wende lwa ukiro na usu lwa Mumuyo llo irero lya Iruva; 18na fiterewo na fyeerero fyoose mwiiterevaa wo kyeeri mukee na Mumuyo, muvelala shoovi kya efyo mwiiterevyaa veele woose. 19Kiwo neeny da muveshiterevya, naambo shiidimi irera nisha, na yoongwa kyama ekyo kya Nrumi ya Nsia shikee na ukaari. 20Mashika nkimaruma kya efyo shilevaangwa shive nrumi kutani shafingwa, kutani shawona ukaari lweerera shaasa kishikooye irera.
Fiidikiro fyemarisya
21Naasa neeni mukooye imanya mbony takwa, shaasa shiifo, Tikiko mwanama nkunde, nndundi nsaari wa Nndumi, yeto mmbo ashemuviaa mbony toose. 22Nawe mmbo shikeenruma kwany kimaruma kya vayo namuvie mbony teru, navemuviirya muu.
23Siri ikae na urilalyi na ukundi, ando amwi na kikusiryo, kyiluukya kwa Iruva Nde na kwa Nndumi Yesu Kristo. 24Isarya lyikae woose yewo vakunndye Nndumi weeru Yesu Kristo kyikee kya dede.
Currently Selected:
VAEFESO 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
