MEEKYENA 6
6
Mavavaso a Ivika Kyaasa
1Naasa Nndumi Iruva karera na Mose, kammbia, 2“Rera na vandu va Israeli kuvavie, Kwakooya nndu nndumi ao nka kalyiiya Iruva mboo, mboo ya ishingo naambo nakuvike mweele mbee ya Nndumi Iruva; 3nalani nta mfinyo ao kindo kinangaafo, nta mura wa nsabibu, nta nalalye sabibu, shiviiri ao shuumu-fo. 4Mikonu yeyo yakwe yeekwilyisa nalalye kindo kyooka na nsabibu-fo nta mbeu ta nsabibu-fo nta makanda a vayo fo.” 5Mikonu myoose ya kyaasa kyakwe, weembe lulapaane nrwe wakwefo, kutani mikonu yeyo yeera, yeyo alevika kyaasa na Nndumi Iruva, na kwiilyise, nare fii takwe tive shaasha, 6mikonu yeyo myoose akwiilyisa kwa Nndumi Iruva nalafike kufii na nndu mfu-fo. 7Nalakureveese kwa ndeye nta kwa maye-fo, nta kwa mwanamaye ao kwa mfwamaye-fo, naakwa vafwa, mashika elyi akwiilyisye kwa Iruva. 8Mikonu myoose yeyo yeekwilyisa, we mmbo akee mweele kwa Nndumi Iruva. 9Na kwakooya nndu moose afwa tiny kufii nawe, kava ntefusu kimaruma kya vayo, llyo ashuutaa nrwe wakwe, noote nrwe nkonu wa mfungare. 10Nkonu wa nyanya neende mbeta ivii, ao mawore avii a mbeta, neenngye nkohani, yoo mwaangony wa yeema yeele, 11na nkohani naserisyen imwi ive kiraso kya ulyamari, na ya kavii kiraso kyemamitwana muro, navike usandi kimaruma kyakwe, mashika mmbo aanga urekwony kimaruma kya mfu, nawe nailyise nrwe wakwe nkonu yeto mweni. 12Nawe narammbikye Nndumi Iruva mikonu yeyo yeekwiilyisa kwakwe, nawe neende ngurana ya suva ya mwaaka umwi kive nkiraso kya urekwa, lyo mikonu yeyo ya mbee nnyisheekyenwaafo, mashika ikwiilyisa llya lyakwe mmbo lyiletefuswa.
13Na ivavaso lya mwiivika-kyaasa llyo elyi, kyeeri mikonu yeyo ya ikwiilyisa lyakwe isiaa, mmbo asheendwaa yoo mwaangony wa yeema yeele, 14nawe naserisye Nndumi Iruva kiraso kyakwe, ngurana ya suva ya mwaaka umwi shisha, ive kiraso kyaimamitwa kya ulyamari na suva ingyi ya mwaaka umwi ive kiraso kya unapwe, 15na kikapu kya mikate ilatiri ntarango, mikate ya nswa mmamiri ikeemiriye na mafura na mikate ilatiri ntarang'o, ikee mivike mafura, na firaso fya vayo fya nswa, na firaso fyakwe fya fyeena. 16Na nkohani naserisye Nndumi Iruva, nawe naserise kiraso kyakwe kya ulyamari, na kiraso kyakwe kyemamitwa na muro; 17nawe asheserisaa suva yeyo ive kiraso kya unapwe kwa Nndumi Iruva, ando amwi na kikapu kya mikate ilatiri ntarang'o, llyo nkohani naserisyeny kiraso kya nswa, na kiraso kyeena. 18Naasa mwivika kyaasa nooteny fii yeto ta ikwiilyisa lyakwe, mwaangony wa yeema lyeekwaananya, numa naute fii yeto, nativike efo murony yeto ukee yoo kwasi ya kiraso kya unapwe. 19Naasa nkohani neepoo urende lwa suva yelo lwakoryo mureny, na nkate umwi ulatiri ntarang'u ashuuta efo kikapuny, na nkate ungyi, navikye mbika kyaasa efo maakony, elyi ammaa yuta nrwe; 20na nkohani ashefivikaa mbee ya Nndumi Iruva; kindo ekyo nkyeele kwa nkohani, ando amwi na kitari, na kisouwa, numa ya yoo mwiivika kyaasa atiri muumu weena mfinyo. 21Yelyo llyo ivavasyo lya mwiivika kyaasa, na lya kiraso kyakwe ashuutyaa Nndumi Iruva kya ikwiilyisa lyakwe, na findo filya ashiidimaa ifiwonisa akee mwiivika kyaasa, niindo kisumani itana kya yiinutya ivavasyo lya ikwiilyisa lyakwe.
Mbora ya Nkohani
22Naasa Nndumi Iruva karera na Mose, kammbia, 23Rera na Aron na vana vakwe, kuvavie, Niindi mushevikyaa vana va Israeli mbora muvavie,
24Nndumi Iruva namusimbe mbora navemuringa;
25Nndumi Iruva nakumikye na kisangu kyakwe, navekusarya
26Nndumi Iruva namwinduye kisangu kyakwe, nakuniinge unapwe.
27Niindo vashevikaa irina lyakwa uve ya vana va Israeli, neeny nshevavikya mbora.
Currently Selected:
MEEKYENA 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
