MEEKYENA 5
5
Vandu vatefusu
1Naasa Nndumi Iruva karera na Mose, kammbia, 2Vavasya vana va Israeli vante efo ulaleny wo nndu atirwa niivave, na wo nndu akeeyuukwa ni usa, neeto akee ntefusu kimmba ampaana nnying'a; 3vasomuteny poo woose, womi na vaka, muvaute efo ulaleny, naambo valashetefusa efo ulaleny, mashika nng'u nkai. 4Vana va Israeli vakatana indo vakavasomuta-fo woose, shaasa Nndumi Iruva alevavasya Mose niindo vana va Israeli valetana.
Ikurya ulyamari na usari
5Naasa Nndumi Iruva karera na Mose, kammbia, 6Via vana va Israeli, Kyeeri nndu nndumi ao nka atanaa ulyamari lukaangura kikusirye kyakwe kwa Nndumi Iruva na nndu yeto kava nravi; 7llyo vashekuryaa ulyamari lwawo valelutana, nawe nataa kya urekwa lwakwe, neengeryeu na kyenga kya karaanu, neeninngya yeto alellyamarya. 8Lyo kwankooya nndu yeto nalatiri vandu vakwaani nawe, nantaiyaa ekyo kya urekwa, kilya kisheniingywa kwa Nndumi Iruva kya urekwa elo lwakwe mmbo kivaa kya nkohani, ando amwi na suva ya usandi, isheva ya usandi kimaruma kyakwe. 9Na wo kiraso kya mmwasi, kya findo fyeele fya vana va Israeli, vashesirisyaa nkohani, mbo ivaa yakwe. 10Na lyingyi findo fyoose fikeefyute firaso, mfya nkohani, kindo kyoose nndu aniingyaa nkohani kive kyakwe.
Mwaandu wa nka ntuusi arenngya mmi wakwe
11Naasa Nndumi Iruva karera na Mose, kammbia, 12Rera na vana va Israeli kuvavie, Kwakooya nka wa nndu eera mbai kalyamarya mmi, 13na nndu ungyi kalala nawe kya utuusi, na mmi wakwe nalamanyi, kyikava kindo kya kirika, na nka yeto kava ntefusu, nta kulakaefo nndu amanya, nta nnyaaramwa-fo; 14na mmi wakwe katirwa nkififi, katirya nka kififi, na nka yeto kava ntefusu, ao kwakooya atira nrima wa kififi, katirya nka kififi, nawe nalatire utefusu nka yeto; 15llyo nndu yeto asheipoo nka wakwe, neende nawe kwa nkohani, naende kiraso kimaruma kyakwe, nkyo kyenga kya ikumi kya bakuri ya nswa nalavike mafura yoo uwe-fo, nta ubani-fo; mashika nkiraso kya nswa kimaruma kya kififi, nkiraso kya nswa kyeekummbwa uravi. 16Naasa nkohani mmbo ashendee nka yeto na yoo kufii yoo mbee ya Nndumi Iruva 17naasa nkohani neepoo mura mweele ukee kiiyeny kya uteeri; naasa nkohani neepoo uteri lukee yoo si efo ulaleny, navike efo mureny yeto; 18nawe nkohani asheelelisaa fiita nka yeto neemmbika mbee ya Nndumi Iruva, naasa nanniingye kiraso ekyo kya nswa kyeekumbura, nkyo kiraso kya nswa kyakififi, nawe nkohani natire mura yeto uvavaa usheendee kidengo efo wokony lwakwe; 19naasa nkohani nalyiseny nka yeto mboo, nammbie, kwakooya kulaore nndu nndumi alelala neewe, ao kwakooya kulaore kulerenga isora kirinda, lyo kukee si ya mmi wafo, mura yeu uvavaa ulakuvavise-fo; 20lyo kwankooya kulenrenga, kukee si ya mmi wafo, kwava ntefusu, na nndu alelala neewe nalakee mmi wafo; 21llyo nkohani ashelyisaa nka yeto mboo deny, nambie marero yaa Nndumi Iruva nakwaallwe kidengo na aboo kwa vandu vafo elyi Nndumi Iruva akwaallwe kyuumba, neekufumbisa ndeu; 22na mura weende kidengo usaame ndewuny yafo, ukufumbise ndeu, neekufirisa kinama; nka yeto neerikye, Amen, Amen. 23Numa nkohani nareiye fidengo efyo kyitabuny, neefyaangata na mura ulya uvavaa; 24naasa noore nka yeto mura yeu uvava utiri kidengo, na mura yeto weende kidengo umwaange waalashike iva kivawo. 25Naasa nkohani nawaryeny kiraso ekyo kya nswa kya kififi, yuuka wokony lwa nka yeto, nairinyise mbee ya Nndumi Iruva na yiiserisya alya kitareny kyeerasya; 26naasa nkohani neebo ng'unde imwi ya kiraso kya nswa, kive kindo kyeekumbwa kwakwe, na yuukorya yoo kitareny, kyairasya numa narite nka yeto mura yeto. 27Naasa kammaa inrita mura yeto, llyo kivaany sheelyi mmbo alerengya mmi, mura yeto wa kidengo umwaange, umbavye neemfumbisa nden, na kinama kyakwe ifirika, nawe nave kidengo kwa vandu vakwe. 28Lyo kwakooya nka yeto nalakee ntefusu, nalekwa, needime yiira vana. 29Elyi llyo ivavasyo lya kififi kya Nndumi Iruva, elyi nka arenga kakuvika utefusu; 30ao, kwakooya nrima wa kififi waanga nndu nndumi, katirya nka wakwe kififi, llyo ashevikaa nka yeto kwa Nndumi Iruva, nkonu ashentanyaa efyo fyoose. 31Na nndumi yeto nnyatiri ukashafo, ni nka yeto ashiiboo urekwa lwakwe.
Currently Selected:
MEEKYENA 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
