MEEKYENA 24
24
1Naasa Balaamu ekilollya mmbo kisennyi Nndumi Iruva, ivikya Vaisraeli Mbora, nnyaleenda sha yoo mapokyony-fo, inderuuya usavi fo kya indi kaenda na kasa. 2Balaamu kalollya Israeli vekee ufyari kwi ufyari, mumuyo wa Iruva ukansheya. 3Kasongosya fyaaso kaongwa,
Yeny Balaamu wa Beori shaamba indi,
Yeto ekee mfinge miso aamba ule,
4Yeto mwiita marero a Iruva, Kavelollya myoorye yakwe
awe kifulufulu katarambuwa miso.
5A ando afo eekaa mmbo asennyi inda, Woi Yakobo?
Na mmba tafo woi Israeli!
6Akavaka fyaandaa fikee fyaalale,
Sha irema lyikee mbai ya mura
Akavaka miri ikee mivaaye ni Nndumi Iruva muni
Sha firevellya fikee mbai ya mura
7Mura mmbo usheishwaa neeirikya si
Neevaaya mbeu tawo ando aiyo mura mwiingyi
Na mangyi waawo naitikiswa ngota Agagi
Na umangyi lwakwe lurumishwa.
8Iruva mmbo alensaamisa amuuta Misri,
Eetiri finya sha finya ya mboo.
Mmbo ashemiraa vandu va masanga yewo vakee vakiduva vakwe
Navefishafisha mafua awo
Navaase na mife yakwe.
9Mmbo alemalallya sau sha miiso ilele,
sha miiso ya kyika, mbovi akaryaa iimmatwa?
Yeto mwikuvikya mbora navikyo mbora
Neeto mwiikudenga nadengwa.
10Unyafi lwa Balaki lukarwa kimaruma kya Balaamu, Balaki kakakaba makofi, kavia Balaamu, “Mmbo shilekuvaanga kusheekye idenga vakiduva vakwa, lyo yewe mmbo kwammbavikya mbora kararu sele. 11Naasa ulaalu ruuya ando kwa yoovya, mmbo shenkunda ikuniinga wiindi uniini, lyo Nndumi Iruva ankwiima wiindi.”
12Balaamu kavia Balaki, “A yeny shilevia-se varumi vafo valya kuleshirummya sheelyi,” 13naakwa Balaki ashiniinga mmba yiishwe fesa na sahabu nshishidimaa yiimmbwa irero lya Nndumi Iruva, Iruva yekyo areraa nkyo neeny shikyaambaa.
Kisuku kya Ifurumya kya Balaamu
14Naasany, ulaalu mmbo nkeesora vandu vakwa, na ulaalu ra shikuvie findo vandu yeva vashetannyaa vandu vafo yoo mafurummyony.
15Kasongosia lyingyi kyaaso kyakwe, kaamba,
Balaamu mwana wa Beori aamba indi,
Yeto alesikywa miso aamba,
16Yeto mwiita marero a Iruva, neemanya urango lwa yeto akee uwe ya fyoose
yeto ansukuyo mbony ta muni findo fyoose.
Kwakooya amwiinndya dede mmbo antarambuwa miso,
17Shilollye, yeto ashaa lyo nshi ulaalu-fo,
shikenlola, lyo nyakee kufii-fo,
Nyinyiri ishefumaa kwa Yakobo
Na mbiiri ya umangyi ishesalalaa yuuka kwa Israeli,
Nayo mmbo ishekabakabaa vasongoru va Moabu,
Neefishafisha vana vatiri kusu-kusu.
18Edomu nawe asheturaa umangyi
Seiri nayo ivaa umangyi, mmbo vekee vakiduva vakwe
Elyi Israeli vashetanaa fya wiidimi
19Mwishillya mmbo asheukaa kwa Yakobo
Nashemamita yewo vasherewaa efo muriny.
20Naasa llyo kalola Vaameleki, nawo kavavia fyaaso efi kaamba,
Vaameleki vekee vandu va mbee
Lyo mmbo vashefurummyaa na urumato.
21Naasa Baalamu karera kya Mkeni, kasongosya kyaaso kyakwe, kaamba-le; Kwafo ni ando a wiidimi, sha kifuri kikee mbombony ya iwe
22Lyo yeni Vakeni mmbo musherumatwaa,
mmbo mushipowaa mifungo mbaashuri kufike indi?
23Kasongosya kyaaso kyakwe kaamba,
Oshiny lwao mmbovi eto akkyaa kyeeri Iruva, asheinutyaa findo efyo?
24Mashika ngalava tisheshaa tyuuka mbai ya yeeve kwa Kitimu
Tishesaveesa Vaasuri ando amwi na Eberi, nawe narumatwa
25Naasa Balaamu kakwiiboo, kawuya ando akwe, na Balaki kakweete.
Currently Selected:
MEEKYENA 24: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
