MEEKYENA 22
22
Mangyi wa Moabu Andevaanga Balaamu
1Naasa vana va Israeli vakeeboo kyaaro, vakandemannya ulale kulya fyaandeeny fya Moabu kwakulya ya Yordan kufii na Yeriko. 2Naasa Balaki mwana wa Sipori kamanya findo fyoose filya Vaisraeli valentannya Vaamori. 3Vamoabu vakeereya Vaisraeli nnu deny mashika elyi vekee ironda iniini, Vamoabu vakasavaa nnu kimaruma kya Vaisraeli. 4Vamoabu vakavia vamiku va Vamidian “ulaalu itorito elyi lya vandu mmbo vamamitaa findo fyoose lufilollye, shaasa ng'umbe yamira mooro wa mbuveny.” Naasa Balaki we mwana wa Sipori ekee mangyi ya Moabu kyeeri kilya, 5Karuma vandu kwa Balaamu we mwana wa Beori, nandefika Petori mbai ya mura nandemmbaanga, neemmbia, “Llate, yaa kwiiyo vandu vaukye Misri, vakee veengyi vakatana vasikya-si, vakashekaa yoo usanguny lwakwa. 6Shakutereva oshoony, kusheekye idenga vandu yeva, mashika mmbo vatiri finya ngota yese. Kulakooye lushiidimaa ivakaba, luwoombute wooke urukeny lwakwa, mashika shiishi sheelyi yeto kwammukunndya mbora mmbo avikyoo mbora, neeto kwammudenga kava n-denge.” 7Vandu vasongoru va Moabu na va Midian vakeenda vakawarya isekye lya waanga maakon avo, vakasora Balaamu, vakammbia mbony ta Balaki. 8Kavavia, keeny nyaa kio ekyi, neeny shimurouwe ekyo kishukaa kwa Nndumi Iruva, vasongoru yewo va Moabu vakalalau. 9Naasa Iruva kasheya Balaamu kammbesa, “Ni va ki yeva kukee nawo kunu?” 10Balaamu karouwa Iruva kammbia, Balaki wa Sipori we mangyi ya Moabu mmbo avaruma kwakwa kaammba, 11Vai kwiifo vandu valeuka Misri, veengyi nnu, naasa oshoony kusheekye idenga vandu yeva, kulakooye shishiidimaa ikabana nawo shivafuni kunu. 12Iruva kavia Balaamu, “Kuleende nawo-fo, nta kulashedenga vandu yeva-fo, mashika ni vandu vavikye mbora.” 13Balaamu kakwiipoo ngama, kavia vasongoru va Balaki, kweengyeny kyeny kwany, mashika Nndumi Iruva mmbo alelema ishininga muunu yeenda neeni. 14Vasongoru valya vakawuiya Balaki, vakammbia, “Balaamu mmbo alema isha ando amwi neese.”
15Llyo Balaki aleruma vandu vaniini lya kavii, veelanyi valya kwa wiingyi na nnduma, 16Vakakooya Balaamu, vakammbia, “Balaki mwana wa Sipori mmbo akuvia indi,” Mmbo shakutereva nnu deny kulaimwa n'kindo nta kimwi-fo kikwiimi kulasheesha, 17mmbo nshekuniinga wiindi uniini nnu, shikuniinge wo kindo kushiterevaa; Oshoony-dwa kusheekye idenga vandu yeva. 18Balaamu kavia vasonguru yewo va Balaki, “Balaki naakwa ashiniinga mmba yiishwe fesa na sahabu shabu, nshishidimaa ikillya irero lya Nndumi Iruva akee Iruva wakwa-fo-te, nta nshilyinyiisaa ao ilyeengerya-fo. 19Naasa ulaalu shakutereva, Laleny-te yaa inu, shivese Nndumi Iruva ekyo akunndye mmwaasi.” 20Iruva karouwa Balaamu kio kammbia, kimmba vandu yeva vankusheya-se ishekuvaanga enda nawo, lyo ekyo shikuviaa nkyoo kyeeni kukitanaa. 21Balaamu kakuboo elyi lya ndesi, kadeesya nshungu wakwe, kasora vasongoru yewo va Moabu.
Balaamu na Nshungu Wakwe
22Iruva karwaayoon unyafi nkiki elyi aleenda nawe, nkyo unyafi lwa Iruva lukarwa, nkiki elyi eenda nawo, nsu wa Nndumi Iruva kakukikisa shia, naambo namwiimi. Mmbo eesaammye nshungu veriani na varundi vakwe vavii. 23Nshungu ulya ukalollya ekakato nsu wa Nndumi Iruva akukikisye asalalyi yoo shia, atiri usu efo wokony lwakwe, ammeeludeesya imanya, nshungu ukarevekya mbai, ukeenda maremeny. Balaamu kakaba nshungu naambo uwuye shia. 24Naasa nsu wa Nndumi Iruva kasalala ando kwa kyaanda, nnang'ani ya misabibu, taari toose kukee kufinge. 25Nshungu ulya ukalollya nsu wa Nndumi Iruva, ukakusindikya efo uvareny ukasirya Balaamu urende lwakwe, llyo Balaamu aleukaba lya kavii. 26Nsu ulya wa Nndumi Iruva kasembeya na mbee, kandesalala ando kwa nko nsiise kulaifo mwaanya wa iinduka. 27Nshungu ulya ukalollya nsu wa Nndumi Iruva nato ukalala si, Balaamu katirwa ni unyafi, kakaba nshungu na nsenngye ulya wakwe. 28Nndumi Iruva katarammbwa kana ka nshungu ulya, ukavia Balaamu, Ekyo shalyamara nkyoki kwanshikaba kararu sele? 29Naasa Balaamu kavia nshungu, “Nnyelyi kwashimina, kukooye sheetiri usu wokony lwakwa mmbo sheekuwaa ulaalu indi.” 30Naasa nshungu ukavia Balaamu, A kwiishi nshikee nshungu wafo kwanshisaama fyeeri efi fyoose? Mmbo shilenkutannya lyingyi indo ndesa? Kammbia, “Oode” 31Naasa Nndumi Iruva katarammbwa Balaamu miso, kalollya nsu wa Nndumi Iruva eesalelyi yoo shia, noosu wokony lwakwe aludeesye imanya nalo, keenyika nrwe kawa si kifulufulu. 32Nsu wa Nndumi Iruva, kavia Balaamu, A nkyiki elyi kwankaba nshungu yeu kararu sele? Kwiishi, yeny mmbo shasha naambo shikwirikise, mashika shia yafo nnyoorokye mbee ya kwafo, 33llya nshungu washilollya ukaindukya mbai kararu sele, mashika nshungu yeu ure ulawuya mbai mmbo sheekuwaa yewe, shiureu na muu. 34Naasa Balaamu kavia nsu wa Nndumi Iruva, “Mmbo shallyamara mashika elyi shalemwa imanya mmbo kukee shia nambo kushiviire; naasany kwakooya kwamiiswa mmbo shiwuyany.” 35Nsu wa Nndumi Iruva kavia Balaamu, kweenngye na vandu yeva, lyo ekyo nkuviaa nkyo kushaambaa, Naasa Balaamu kakweengya na vaniini va Balaki.
Balaki Aambya Balaamu
36Kyeeri Balaki aleeta sheelyi Balaamu akeesha kandemwaambya alya muriny wa Moabu, ufiitani na Arnoni nnyanu va efo mbai ya nnyanu eto, 37Balaki kavia Balaamu, A nkyelola shaasa shileruma vandu kwafo na iitika nnu naambo kushe kwakwa, nkyiki kulelema isha. A ndesa mmbo shilashiidimaa ikuniinga wiindi uniini? 38Balaamu kavia Balaki, “Ekaka-u shanshany. A yeny mmbo shitiri wiidimi-ki lwa itana kindo kyoose. Ekyo Iruva ashiningaa lyo nkyo nkireraa.” 39Balaamu keenda na Balaki vakafika Kiriati-husoti, 40Kashisha ng'umbe na mashonri karwaaya Balaamu na vasongoru valya eeriani nawo.
Kisuku kya mbee kya Balaamu
41Kwiikikya Balaki keeboo Balaamu kandensaamisa ando eerasya kwa Baali, nafo kalollya-fo vandu veengyi.
Currently Selected:
MEEKYENA 22: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
