MEEKYENA 21
21
Vaisraeli Vavinga Vakanaani
1Naasa Mkanaani we mangyi ya Aradi wa taari ya Negebu, keeta sheelyi Vaisireeli mmbo valesha na shia ya Atarimu, naasa keeboo fira indekabana na Vaisreeli, katira-fo mifungwa. 2Naasa Vaisraeli vakatereva Nndumi Iruva naambo navavike maakony awo valyamare na miri yaawo deny. 3Naasa Nndumi Iruva kairikya, kavika Vakanaani maakony a Vaisraeli, vakavamamita wo na miri yaawo, llyo ando yoo kulefishyo Horma.
Shoka ya Arera
4Vaisraeli vakauka alya ifumbuny lya Hori veesoraa shia ya mbai ya yeeve lya Shamu, varingitye uruka lwa Vaedomu, nawo vakafwa nrima, vakeereya shia yeyo. 5Vandu vakakunung'unnya Iruva na Mose vakaamba, “A nkyikyi elyi muleluuta kulya Misri lushefiiya kunu kasa? Mashika nkwiifo shoonga-fo, nta mura neese mmbo lwansukyo nshoonga yei shifwafwa.” 6Naasa Nndumi Iruva ekiita indo karuma shoka ta muro tikamaara vandu nnu nawo vakafwa vandu veengyi. 7Naasa vandu vakasora Mose vakammbia, “Lulelyamara nnu elyi lulekunung'unnya Iruva neewe lwakutereva kuluterevye kwa Nndumi Iruva naluute shoka eti.” Naasa Mose kavaterevya. 8Nndumi Iruva kavia Mose, Songosia shoka ya minya ya arera, kuivanike uve ya nri, na nndu ammaarwa n'shoka kailola, nakie. 9Naasa Mose kasongosya shoka yeyo, kaivanika kirii-u, na nndu emmarwa n'shoka llya alelola shoka yei ya arera, kakyia.
Kyaaro Kutani Vaafukya Imungo lya Moabu
10Naasa vana va Israeli vakaiboo kyaaro vakafika Oboti vakamannya-u ulale. 11Kuukau vakafika Iye-abarimu, mfo kasa ka Moabu, taari ya ngama. 12Kuuka-u vakafika imungony lya Seredi. 13Kuuka yoo vakafika kwakulya Arnoni kasa komu, nng'u nnyanuny wa Vaamori mashika Arnoni na Moabu mmbo tifiitani; 14Nkyo kimaruma efo kyitabuny kya fira ta vandu va Nndumi Iruva kukareiyo,
Vahebi kulya Sufa, na imungo lya Arnoni, 15na waanga lwa mamungo yoo, yooloka na Ari, kufike Moabu. 16Kuuka-u vakafika Beeri, nng'u kirori kya mura kilya Nndumi Iruva alevavasya Mose nasanyirye-u vandu avaninnngye-u mura.
17Na Vaisraeli vakeemba kiimbo eki,
Ruka mura ewe kirori, kiimbyeny,
18Kirori kikee kisume ni vamangyi
Vaniini va vandu vakakisuma na milo yaawo.
Kuuka yoo kasa eko vakafika Matana; 19Kuuka-u vakeenda Nahalieli, kuukau vakafika Bamoti; 20Kuukau Bamoti vakafika imungo lya Moabu, alya uwe ya kidooro kya Pisga, taari ya kasa.
Mangyi Sihon na Ogu Vavingwa
(Nku 2:26–3:11)
21Naasa Vaisraeli vakaruma varumi kwa mangyi ya Vaamori avangwaa Sihoni, vandemmbia, 22Luniinge muumu lwiire efo urukeny lwafo, llushaanngyaa lwiire efo maremeny-fo, nta efo misabibuny-fo, nta llunaa mura wa firori fyan-fo, mmbo lusoraa shia yeyo shiniini, lwiire putu. 23Lyo nta Sihoni nnyaleirikya Vaisraeli veere urukeny lwakwe-fo, kyeendi mmbo alesangirya vandu vakwe vandekabana na Vaisraeli yoo kasa eko, kafika Yahasa, kakabannya-u na Vaisraeli. 24Vaisraeli vakavakaba nnu, vakashillya uruka lwawo, pookya mura wa Arnoni fika mura wa Yaboki, kufike uruka lwa vana va Amoni mashika wo veetiri finya nnu. 25Vana va Israeli vakatira miri yeyo myoose. 26Kimmba Heshboni mmbo weekee muri wa mangyi Sihoni wa Vaamori ulya ekeekabana na mangyi ya Moabu ulya eesongoye, kansoka uruka lwakwe loose, fika mura wa Arnoni. 27Nkyo kimaruma yevo varera fyaaso vakaamba,
“Oshony na Heshboni, Muri wa Sihoni utanwa na yiikarwa;” 28Mashika muro mmbo uleuka Heshboni Kipalapala kya muro kikauka muriny wa Sihoni, ukalya Ari ya Moabu. Vamangyi va ando aniini kwa Arnoni. 29Oshin lwafo yewe Moabu! Mukeesarumya, yeni vandu va maruva Kemoshi mmbo kwallwa vana vakwe vakava nerishiswa kwaasha, Na vefu vakwe vaipowa ushingeny, Sihoni we mangyi ya Vaamori. 30Heshboni ukarumatwa fika Diboni, Lukavarumata lukakooya Nofa, kufii na Medeba. 31Naasa nkyo Vaisraeli vakakaa urukeny lwa Vaamori. 32Naasa Mose karuma vandu va sa urukeny lwa Yazeri, vakandetira miri yaawo vakoombuta-fo Vaamori yewo veefo. 33Numa vakasora shia ya Bashan nawe Ogu mangyi ya Bashani kakunda ikabana na Vaisraeli kulya Edrei, we na vandu vakwe woose. 34Kyasia Nndumi Iruva kavia Mose, “Kulamwiiryee-fo, mashika mmbo shamma immbika maakony afo, we na vandu vakwe woose, na uruka lwakwe, neewe mmbo kushentannyaa shaasa kuletannya Sihoni we mangyi ya Vaamori, ulya eekee Heshboni.” 35Vakakaba mangyi yeyo na vana vakwe, na vandu vakwe woose, valasaare-u nta nndu umwi, llyo vakashillyany uruka lwakwe.
Currently Selected:
MEEKYENA 21: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
