MEEKYENA 16
16
Kora Dotani na Abiram Vasalala Kilasha
1Naasa Kora, we mwana wa Ishari, mwana wa Kohati, mwana wa Levi, keepo vandu ando amwi na Dotani na Abiram, wo vana va Eliabu na Oni, mwana wa Peleti, veekee vana va Ruben. 2Nawo, ando amwi na vandu maata va vana va Israeli, vafikye vandu mayana avii na makumi araaru, vasongoru va ironda elyo, vekee vasauwe, vatiri nnduma vakasalala na Mose; 3nawo vakasalala kilasha na Mose na Aron, vakavavia, Eni kimufye ulaalu, ironda yelyi lyoose mmbo lyikee yeele, wo umwi Nndumi Iruva mmbo akee nnang'ani yakwe, nkikyi deny elyi mukee ikurosa mbee ya vandu va Nndumi Iruva? 4Mose ekiita marero yoo kawa si kifulufulu; 5naasa kavia Kora na shila yakwe shoose, Ndesi ngama Nndumi Iruva alooraa ni va-ki vakee vakwe, naveyoora ni unga-u akee mweele na ni mmbi ashekaa kufii nawe, kimba yeto ansauwaa mmbwe yeto ashesembeyaa yoo kufii nawe. 6Taniny kindo kimwi, iboony fiiya #16:6 Fidau:Kyeekorya nri wa nsu ufwaamaa. fyany fya muro yewe Kora na vandu vafo woose, 7vikeny-fo muro, muvike-u ufumba, muvike mbee ya Nndumi Iruva ndesi, naasany, yeto Nndumi Iruva ashensauwaa, we nave mweele, nakyo kifye kwany, yeni vana va Levi. 8Mose kavia Kora, Aranyiny-te, yeni vana va Levi; 9A ndesa mmbo mulollye nkindo kinnywa deny kwany, elyi Iruva wa Israeli alemusauwa irondeny lya Israeli naambo namuwarye kwakwe, naambo munfurukannye, neesalala mbee ya vandu muvarunndye; 10lyingyi kakuvika kufii na vandu vafo wo vana va Levi a mmbo mulanngye iwarya na ukohani nalo? 11Kimmba niindo yewe na shila yafo shoose mmbo mwasalala kilasha na Nndumi Iruva a Aron mmbi kutani mwankunung'unnya? 12Mose karuma Datani na Abiram wo vana va Eliabu vandeendwa nawo vakaamba, Llushaa fo; 13a mmbo kwiishi nkindo kyaangu, yewe iluuta urukeny lwiishwe malela na uki kusheluwaiya kunu kasa? Na ando amwi neekyo vai mmbo kukeekung'anisa deny kuve nniini weeru? 14Nta nkulelweende urukeny lwiishwe malela na uki-fo, nta nkuleluniinga marema a misabibu-fo, a ndesa mmbo kukunndye idosha vandu veru miso? Ekyo llushaa-fo. 15Mose kusua nnu, kafuuya Nndumi Iruva: Kulawarye firaso fyawo-fo, neeny nshilewarya nta nshungu umwi kwawo-fo, nta ivavisa nta nndu umwi nnang'ani yaawo-fo. 16Naasa Mose kavia Kora, Yewe na shila yafo shoose oshony yaa mbee ya Nndumi Iruva ndesi, yewe, nawo, na Aron, 17mwiiboo wo nndu kiiya kyakwe, kyevika ufumba mbee ya Nndumi Iruva fiiya mayana avii na makumi araanu, ewe na Aron na vo nndu nave na kiiya kyakwe. 18Naasa vakaiboo wo nndu na kiiya kyakwe, vakavikafo muro, na ufumba yelo, vakasalala alya mwaangony wa yeema lyeekwanannya, ando amwi na Mose na Aron. 19Naasa Kora keende vandu vakwe vashesalala kilasha nawo alya mwangony wa yeema lyekwanannya, naasa Itumbe lya Nndumi Iruva lyikasha alya mbee ya ironda llya yoose.
20Naasa Nndumi Iruva karera na Mose na Aron, kavavia, 21Kaeny kwaasha na ironda elyi, naambo shivamamite na lyimwi nsi. 22Nawo vakawa si kifulufulu, vakaamba, Ale Iruva, kukee Iruva wa woose vatiri mu, nndu umwi mmbwe atanaa ulyamari neewe kukape ironda lyoose? 23Nndumi Iruva karera na Mose kammbia, 24Rera na ironda elyo kuvavie, Ukeny yoo kufii kwa Kora na Datani na Abiram. 25Naasa Mose kakuboo kaenngya Datani na Abiram na vamiku va Israeli vakansora. 26Karera na ironda elyo kavavia, shamutereva ukeny kufii na meema a vandu yeva varavi, nta mulabaane kindo kyawo na kikava-ki, naambo neeni mulashemamitwa kimaruma kya ulyamari lwawo. 27Naasa vakauka yoo kufii na alya velele, Kora na Dotani na Abiram, taari toose, na Dotani na Abiramu vakasomuka vakasalala yoo mwaangony wa meema awo, na vaka vawo na vana vawo, amwi na vashuku wawo. 28Mose kaamba, Kimaruma kya efi llyo mumanyaa dede Nndumi Iruva aleshiruma, naambo shirunde mashora moose, mashika yeny nshilearunda na nrwe wakwa shimuni-fo. 29Kwakooya vandu yeva vafwa ufu lwa vandu woose, ao kwakooya vataiyo shaasa vengyi vataiyoo, naasany Nndumi Iruva nnyaleshiruma yeny-fo. 30Lyo kwakooya Nndumi Iruva atana kindo kiiya, na sumbai ikantarammbwa kana ivamira ando amwi neewo vakee nawo, vasiiye irineny vekee na muu llyo mushemanyaa sheelyi wo mmbo valemina Nndumi Iruva. 31Naasa llya alemaa irera indo, sumbai yeyo ikee yoo vaselelyi ikarauka, 32ikatarammbwa kana ikavamira, ando amwi na va mmbatawo, na valya woose vekee na Kora. 33Woose neewo vekee nawo vakasokya irininy vekee na muu, uteeri lukavalyikya, vakasarummya vauka alya ikwaanuny lyilya. 34Na Israeli valya vekee kufii nawo vakarishiswa nkiiyo kyawo, vakaamba, Neese lulasheemirwa nsumbai. 35Naasa muro ukauka kwa Nndumi Iruva ukakomba vandu valya mayana avii na makumi araanu valekora ufumba lulya.
Fiyya fya Muro
36Naasa Nndumi Iruva, karera na Mose, kammbia, 37Via Elieseri we mwana wa Nkohani Aron, noote fiiya filya yoo kufii na muro, nandeletya muro eto kwaasha, mashika fyo ni fiiya fyeele; 38fiiya efyo fya vandu yewo valelyamara neekureveesa veni, fyaaluwa five kifiniko kya kitara kyeerasya, mashika elyi valefyeende mbee ya Nndumi Iruva fyo ni fyeele five wende kwa vana va Israeli. 39Naasa Elieseri nkohani kaiboo fidau fiiya fya minya ya arera filya fileserisyou ni valya valerumatwa vakafyeeta fikasongosyo-fo fifiniko fya kitara kyeerasya; 40naambo vana va Israeli vakummbwe, naambo muny nalakee wa ufyari lwa Aron nalaserikye ifumbira nsu mbee ya Nndumi Iruva, nalasheva sha Kora, na ironda lyakwe, shaasa Nndumi Iruva alevia Mose narere nawe.
Aron Akira Vandu
41Kyeendi elyi lya ndesi ironda lyoose lya vana va Israeli lyikakunung'unnya Mose na Aron, vakaamba, “Yeni mmbo mulewaa vandu va Nndumi Iruva.” 42Naasa kyeeri ironda elyo lyilekwaanannya lyisalale kilasha na Mose na Aron vakalola taari ilya ya yeema lyekwanannya, vakalollya ifishi lyilya lyivika-u ifweera, na itumbe lya Nndumi Iruva lyikalollyou. 43Na Mose na Aron vakeenda yoo mbee ya yeema elyo lyaikwanannya. 44Nawe Nndumi Iruva karera na Mose kammbia, 45“Kurauwen na ironda elyo, naambo shivamamite na lyimwi-nsi. Wo vakawa si kufulufulu.” 46Mose kavia Aron, Naasany, tira kiiya kilya kya ikorya ufumba, kuvikefo muro, kweende swany kulya irondeny, kuvavikye usandi, mashika unyafi lwa Nndumi Iruva lwansha, ndwari ya tauni yambooka. 47Naasa Aron katira kiiya ekyo shaasa Mose alemmbia, kaangusya yeenda kulya irondeny nnang'ani yaawo, na ndwari iya ya tauni yemmepooka nnang'ani ya vandu, kaata ufumba lulya kavika usandi kya vandu yewo. 48Kasalala nnang'ani ya yewo valefwa na yewo vekee na muu, naasa ndwari ilya ya tauni ikasalala. 49Naasa valya valewaawa nndwari ya tauni ni vandu fiku ikumi na fiina na mayana mfungare, mmwasi ya valya valefwa kya kilya kya Kora. 50Aron kasora Mose alya mwaangony wa yeema yeele, na ndwari ikamanda.
Currently Selected:
MEEKYENA 16: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
