MEEKYENA 15

Uramba lwa Iniingya Kiraso

1Naasa Nndumi Iruva karera na Mose, kammbia, 2Rera na vana va Israeli, kuvavie, Elyi musheangaa urukeny lwany muveni, elo shimuninga, 3neeni kyeeri mushekundaa iserisya Nndumi Iruva firaso fyaikora na muro, kwakooya n'kiraso kyeemamita na muro, ao kiraso kyeshishwa, kikee kya kyaasa, ao kiraso kya ikunda, ao kya sukukuu tany tikee shivavasye, naambo muvikye Nndumi Iruva nrungo nsha, wa ng'umbe ao suva, 4llyo yeto asheningyaa Nndumi Iruva kiraso kya nswa, kyenga kya ikumi kya kibaba ya nswa mmamiri ukee nsasande na mafura; 5na mfinyo uve kiraso kya ina, kideesyo ando amwi na kiraso kyeemamitwa ao kiraso kyeeshishwa, kimaruma kya wo ngurana ya suva. 6Ao kimaruma kya suva, mmbo kushedeesyaa kiraso kya nswa fyenga fivii fya ikumi ukee nsasande na mafura maangu; 7na kya kiraso kyeena mmbo musheendee mfinyo nato uve nrungo nsha kwa Nndumi Iruva. 8Na kyeeri kushedesyaa shau ive kiraso kyekora na muro, ao kiraso kyeeshishwa, ao kiraso kya kyaasa, ao kiraso kya unapwe; 9llyo kusheninngyaa ando amwi, kiraso kya nswa kibaba kimwi kya nswa mmamiri ukeensasande na mafura kyenga kya shuba. 10Kusheserisya-u na shuba imwi ya mfinyo nkyo kiraso kya kyeena, na kiraso kyeekora na muro kyanrungo nsha vesenya Nndumi Iruva. 11Niindo kishetanwaa kwa wo ng'umbe, ao suva, ao kwa wo ngurana ya suva, ao ngurana ya ndafu. 12Shaasa yeekyena lyikai lya efyo mushedeesyaa, niindo mushetanaa kya fyoose, shaasa yeekyena lyawo lyikai. 13Vana vany woose mmbo vashetanaa indo, mwiserisyaa Nndumi Iruva firaso five nrungo nsha kwakwe. 14Na kwakooya kwiifo muny kwany, ao nndu ungi akee neeni, nawe kakunda iserisya Nndumi Iruva kiraso, shaasa yeni mwatana, nawe natane indo. 15Yoo irondeny yelyo, ivavaso mmbo lyivaa lyimwi kwany na kwa muny akee kwany, llyo ivavaso lya llung'anu kwa marika any moose, shaasa mukai yeni na muny nakae indo kwa Nndumi Iruva. 16Mmbo lyivaa ivavaso lyimwi nsi kwany na kwa muny akee kwany.

17Naasa Nndumi Iruva karera na Mose, kammbia, 18Rera na vana va Israeli, kuvavie, kyeeri musheangaa uruka elo nkemurwaa, 19elyi mushelyaa shoonga efo urukeny elo, mmbo musheserisyaa Nndumi Iruva kiraso kya yiiboo. 20Kyeeri musongosyaa nkate, nkate wa mmbee wa fimu fya mbee mmbo mushutaa kiraso yekyo yoo nndeny nkweni. 21Nswa wany wa mbee mmbo musheninngyaa Nndumi Iruva ni kiraso kya iipoo, kya marika any moose.

22Neelyi mushelyamaraa, mufishe mavavaso a Nndumi Iruva yoo alevavasya Mose, 23yoo moose Nndumi Iruva aleaninngya Mose, kipookya llya Nndumi Iruva alevavasya, na marika any elyi numa, 24kwakooya ni urekwa lwatanwa nndu nalaishi, nta ironda elyo lyilaishi, llyo ironda lyisheutaa ngashe ya shau ive kiraso kyeekora na muro, kive nrungo nsha usenyi Nndumi Iruva, ando amwi na kiraso kya nswa, kiraso kyeena, shaasa ivavasyo lyikai, na ndafu imwi ive kiraso kya ulyamari. 25na nkohani navike usandi kimaruma kya ironda lyoose lya vana va Israeli, nawo vafwaayo, elyi lwekee ulyamari lwawo na vameende firaso fyawo, kiraso kyeeserisya Nndumi Iruva na muro, na kiraso kyawo kya ulyamari vakeenngye Nndumi Iruva kimaruma kya urekwa lwawo; 26na ironda lyoose lya vana va Israeli mmbo lyisaryoo, na muny, mashika, kindo ekyo mmbo kiletanwa valaishi.

27Lyingyi, kwakooya nndu atana ulyamari nalakusarye, llyo asheende mburu ya savana ya mwaaka umwi ive kiraso kya ulyamari. 28Nawe nkohani navike usandi kimaruma kya nndu yeto alelyamara, elyi atana ulyamari nalaishi, naambo navikywa usandi, nawone isarywa. 29Ivavaso mmbo lyivaa lyimwi nsi kwa yeto mwilyamara kulore eeshi, kwa yeto awonikye kwany, na muny. 30Lyo nndu atana kindo eeshi, kava muny kyeny ao muny, yeto mmbo aarara Nndumi Iruva nawe mmbo avikwaa kwaasha na vandu vakwe. 31Mashika elyi aimmbwa irero lya Nndumi Iruva, nefisha mavavasyo akwe, nndu yeto navikwa kwaasha, urekwa lwakwe lunkaye.

Nndu Efisha Ivavaso lya Sabato

32Naasa kyeeri ekyo vana va Israeli vakee kulya kasa, vakalollya nndu ekesana ngwi nkonu wa sabato. 33Yewo valelollya eesanaa ngwi vakamweende kwa Mose na Aron, na mbee ya vandu woose. 34Nawo vakambika kifingyon, mashika elyi kilanderumbuwa kilya atannywa. 35Nndumi Iruva kavia Mose, Nndu yeto nkuti nawaawa, ironda lyoose lyinkabe na mawe kutani afwa. 36Naasa ironda elyo lyikanrwa kipoo ya ulale, vakankaba na mawe kafwa, shaasa Nndumi Iruva alevavasya Mose.

Ngata Kikwaani Inunuta Mise Yefo Makeduny a Soori

37Naasa Nndumi Iruva karera na Mose kammbia, 38Rera na vana va Israeli kuvavie vasongosie mise efo makeduny a masara awo marika moose, vavike mise eyo efo masareny awo marika awo moose ta fwana ya samawati, 39mise eyo muilole mukummbwe mavavasyo a Nndumi Iruva neeyatana, na lyingyi mulasheenyanyaka-fo mwilatyaa makusaro any muveni, shaasa mwekee llya mbee mwitanaa uravi lwany lwa utuusi; 40naambo mukummbwe neelatya mavavaso akwa, muveva veele kwa Iruva waany. 41Ni yeny Nndumi Iruva, Iruva waany shilemuuta kulya Misri, naambo shive Iruva waany, Ni yeny Nndumi Iruva shikee Iruva waany.

Currently Selected:

MEEKYENA 15: MAS2

Highlight

Compare

Copy