NEHEMIA 6

Vakiduva va Nehemia

1Naasa, kyeeri Sambalati na Tobia na Geshemu na vakiduva veru valevio sheelyi lwantana isimamba nta kulakiifoo ando kwarewau, (na kyikava nta llwembika myaango ya ngiri). 2Sambalat na Geshemu vakaruma nrumi kwakwa yaamba, “Osho lushekwaananya kulya kyaandany kya Ono,” vai naambo vandeshikaba. 3Neeny shaviira nrumi shavavia, “Mmbo shitiri ishora yuumu. A mmbo mashora asalalaa shaambe mmbo shasha neefo mukai?” 4Nawo vakashirikya nrumi yei kaana sele, neeny shiiraa shilerouwa indo indo. 5Naasa Sambalat karuma ishinga lyakwe lyimwi, lya karaanu, eerye barua. 6Nayo mmbo ikeeshireiye indi, “Mmbo kiishiwa ulaniny koose, nawe Geshemu niindo-da aveishi, sheelyi yewe na Vayuda mmbo mukundye ilema ushilyi lwiiyoo, nkyo kilemweengye mukatana isimamba yeto, naambo kuvashillye yewe, niindo kiishiwa. 7Neewe kwavika vanabii naambo vakuvie mbony efo Yerusalemu, vakuvie kwiifo mangyi kunu Yuda.” Naasa mangyi nkuti nandevio mbony yeti Oshony, “Naambo lusherera luvavii.” 8Nalyo shanrumya nrumi, shambia, “Nkwiifo kindo lulentana kivakye yekyo kwaamba-fo, nnyewe kumuni-da kwakunda yaamba indo.” 9Yewo woose vakeerera mmbo vakelweerese, naambo lulemwa irunda mashora yaa. Kyeendi lyo ulaalu mmbo shikaaryaa mmwasi.

10Shandefika kwa Shemaya mwana wa Delaya, mwana wa Mehetabeli ekee mfinge, kaamba, “Lundekwaananya kulya mmba ya Iruva, lundevika myaango ya vayo, mashika vakeshekuwaa, mmbo vashaa kwiikee kio.” 11Neeny shambia, “A yeny nshiidimaa irisha? A yeto ni vi, kwakooya ni nndu sha yeny, nasheanga neefo mmba ya Iruva nasheovya fo, nshishendaa-fo.” 12Naasa shamanya nshi nkisuku wa Iruva yeto-fo, mmbo alekurerya kyesheerese. Ni Tobia na Sambalati tishi valembika naambe indo. 13Mmbo alerumwa-da nashesheerese, naambo shilyamare, naambo valyamare irina lyakwe. 14Woi Iruva wakwa, lola Tobia yeu na Sanbalat shaasa vakeetana, na nnabii nka yeto Noadia, neewo vengi veekundye isheerese.

Umando lwa Mashora

15Nalyo isimamba yeto ukamarisyo itano nkonu makumi avii na karaanu wa mwiiri wa Eluli, Mashora yoo mmbo aleiboo mikonu makumi araanu na ivii. 16Vakiduva veru vekiita ando amwi na valya valuringitye valaishi Iruva, woose vakairyaa vakafwa nrima deny, vakamanya ni Iruva muni alelusalallya. 17Fyeeri filya vasongoru va Yuda vakeengye Tobia barua shiingyi. 18Mashika kweifo vandu veengi va Yuda vemmuvikya kyaasa, mashika elyi ekee nkwe wa Shekania mwana wa Ara, na mwana wa Yehohanani akee mwana wakwe mmbo eerye mfu wa Meshulamu wa Berekia. 19Nawo vakashoongoya meshaa Tobia, navo vakavembia mbony takwa. Tobia nawe kashirikya barua teesheerese.

Currently Selected:

NEHEMIA 6: MAS2

Highlight

Copy

Compare