NEHEMIA 5

Iwonnya vaturi

1Nalyo kukakaafo nkunung'unu nninni wa vandu na vaka vawo kimaruma kya Vayuda, 2mashika elyi valeamba, “Yese na vana veru mmbo lukee veengi; nkyo mmbo lukundye nganu yeelya lukaefo nisha.” 3Na vengise vakaamba, “Yese mmbo lulereka marema eru na misabibu yeeru na mmba teru, naambo luwonise nganu lulashewaawa nsha.” 4Kukavekaafo na vengi vaamba, “Mmbo luleakwa fesa naambo lutae nayo usanu kwa mangyi, luute efo mareminy yoo na misabibu yeeru na mmba teru, naambo lutae nayo nsanu kwa mangyi, luute efo mareminy yoo na misabibu yeyo lulereka. 5Lyo yese na vanavamaye veru miilyi yeeru nkimwi nsi, na vana veru nkimwi na vana vawo-da. Lyo, ate mmbo lukeevika vana veru ushinginy vakava mashinga, nta llukiidimaa yuuka-fo-fo, mashika ulaalu mmbandu vengi vatiri marema eru na misabibu yeeru.” 6Neeny kyeeri ekyo shileeta kiiyo eki kyawo shasukyo nnu deny. 7Naasa shakuvesa shimuni, shapooka isakya na vasongoru na vashilyi, shavavia, “Mmbo mukewarya fya udedemi kwa vandu yeva, wo nndu kwa nndu wakwe, ‘Naasa shasanyirya nkuka wa vandu naambo shirere nawo.’” 8Shavavia, “Yese mmbo lulewouwa vanavamaye veru Vayuda shaasa luleidimaa mmbo valya vekee vakumbe kwa vandu valaishi Iruva. Neeni ulaalu mukakunda ikumba vanavamaye vany, vai muvakumbe luwoore yese luveny?” Nawo vakasyado sau, valaidimi itallwau kindo. 9Naasa sheengera ivavia, “Kindo eki mukeetana nshi kisha-fo. A ndesa yeni mmbo kilamukooye yiindya Iruva weeru, naambo lulasheararwa ni vandu yewo valaishi Iruva vakee vakiduva veru? 10Vai na yeny-da na vanavama na varundi vakwa, lumwaakuye fesa na nganu kikee kya iwonau mbusha? Nyira, lure deny mbony yei ya mbusha. 11Mmbo shamutereva inu yeni viiryeny vandu marema awo, na marema yoo a misabibu, na yoo a ndunda tingi, na mmba tawo kiwo na fesa na mfinyo, na mafura filya fyoose mukee vadedema.” 12Naasa llyo valeamba, “Luvaviiryaa, nta llukiwaryaa kindo kwawo-fo. Shaasa kwaamba neese niindo lutanaa.” Nalyo neeny shavaanga vakohani shavalyisa mboo naambo vasalallye nisha kindo eki vandu yeva vavikya kyaasa vatani indo. 13Shookafo shasisika soori yakwa, shaamba, “Nawe Iruva nasisike nndu moose indo, efo kyeny kwakwe, ao mashoreny akwe, yeto araa nalainutya kyaasa ekyo. Yee nasisikwa indo, nare nalasaayo nkindo.” Nalyo ikwaanu lyoose lyikaamba, “Amen.” Vakaarafuma Nndumi Iruva. Naasa vandu yewo vakeendya kyaasa yekyo.

Utele lwa Nehemia

14Na kubookya kyeeri shilevikwa nshilyi wa Yuda, uka mwaaka wa makumi avii kufike mwaaka wa makumi araru na kavii wa mangyi Artashasta, nnyo myaaka ikumi na ivii, yeny na vandu vakwa llulelya shoonga ilya yeeshisumannyi ya nshilyi wa uruka-fo. 15Kyeendi vashilyi valya veeshisongoye wo mmbo verovya vandu nnu, vakawarya shoonga na mfinyo kwawo fya fesa shiingi, na mashinga awo nawo vakashillya vandu va uruka. Lyo lyeny kimmba sheereiye Iruva nshiletana indo-fo. 16Nkyo na ishora elyi lyeetana isimamba yeny shalyikaya na nrima, nta lluleura marema-fo, Varundi vakwa woose shavavavasya varundye ishora elyo. 17Ando amwi nakyony, Vayuda na vasongoru yewo, vandu iyana na makumi araanu vakava valyaa neeny shoonga kyeeri kyoose, mmwasi ya valya veeshisheyaa wo nkonu. 18Wo nkonu mmbo yeeshishwaa shau imwi, na suva niini irindaru, na nguku, na ando a mikonu ikumi mfinyo wa ngata shive na shive, nta nshilewarya shoonga yeyo ya uruka yeeshisumanyi-fo, mashika elyi vandu yewo vekee varovye nnu ni ushinga. 19Shakutereva woi Iruva wakwa kushikumbwe, kimaruma kya mesha moose yoo shiletanya vandu yeva.

Currently Selected:

NEHEMIA 5: MAS2

Highlight

Copy

Compare