NEHEMIA 11

Kya Vandu Valekaa Yerusalemu

1Nalyo vasongoru vakakaa kulya Yerusalemu. Vandu vakakaba kura isauwa wo ufyari nndu umwi efo vanduny ikumi nashekaa Yerusalemu, neewo keenda vakae miriny yeyo ingi. 2Naasa vandu vakafura kya vengi valekuuta wo veni ikaa Yerusalemu. 3Na yeva mmbo vaniini va myuungo yewe valekaa Yerusalemu, neefo miriny ingi ya Yuda wo nndu kakukaya kyeny kwakwe, Vaisraeli, vakohani. Valevi, na Vanetini, na valya vekee mashinga a Solomon. 4Na vana vengi va Yuda vakakaa Yerusalemu, na maata va Benyaminy. Vana va Yuda, Ataya mwana wa Usia wa Sekaria, Mwana wa Amaria, Shefatia, na Mahalaleli, ni va ufyari lwa Yuda mwana wa Peresi. 5Maaseiya mwana wa Baruki akee nshuku wa Kolhosen. Vengi va ufyari lwawo ni Hazaia, Adaya, Joyaribu na Sakaria, na nkuu waawo n mwana wa Yuda, we Shela. 6Yewo vaukye kwa Peresi ni vandu 468 valekaa Yerusalemu. 7Valya va ufyari lwa Benyaminy ni: Salu mwana wa Meshulam, nshuku wa Yoedi. Vengi ni Pedaiya Kolaiya, Maaseiya, Itieli, na Yeshaya. 8Gabai na Salai ni va mmba ya Salu. Va ufyari lwa Benyaminy valekaa Yerusalemu ni 928. 9Yoeli mwana wa Sikri, kava nsongoru waawo, na Yuda mwana wa Hasanua kava wa kavii efo ushilyiny lwa muri. 10Vakohani: Yedaya mwana wa Yoyaribu, na Yakin, 11Seraya mwana wa Hilkia kava nshuku wa Meshulan. Vakuu vakwe ni Sadoki, Meraiyot na Ahitubu, nlya ekee Nkohani nniini. 12Woose vekee vandu 822 veerundya Mmba ya Iruva. Adaya mwana wa Yeroham akee nshuku wa Pelalia. Vakuu vakwe ni Amsi, Zekaria, Pashuri, na Malkiya. 13Woose ni vandu 242 wo vekee vasongoru va mmba. Amashisai mwana wa Asareli akee nshuku wa Ahsai. Vakuu vakwe ni Meshilemoti na Imeri. 14Mmbo kweefo vandu 128 va ufyari elu vekee vasikari. Nsongoru waawo ni Sabdieli 15Valevi: Shemaiya, mwana wa Hashubu, akee nshuku wa Asrikau. Vakuu vakwe ni Hashabia na Buni. 16Shabetai na Yozabadi, wo ni Valevi veekallya mashora a efo boo ya mmba ya Iruva. 17Matania, mwana wa Mika, nawe ni nshuku wa Sabdi, wa ufyari lwa Asafu. We mmbo ekee nteteri wa veembi va mmba ya Iruva, veembi va fiimbo fya yaana Iruva. Bakibukia mmbo ekee mweeki wa Matania. Abda mwana wa Shamua na nshuku wa Galal waufyari lwa Yedutum. 18Woose ni vandu 284, Valevi valekaa Yerusalemu. 19Varingi va ngiri ta muri: Akubu, Talmoni na vana vamaye vawo veeringi ngirin, woose vakava vandu 172. 20Na vaisraeli yewo vengi, vakohani na Valevi vakakaa miriny ya Yuda, wo nndu kwakwe. 21Lyo wo Vaneteni vakakaa Ofeli na uwe ya vayo ni Siha na Gishpa.

22Na nniini wa Valevi va Yerusalemu ni Usi, mwana wa Bani mwana wa Hashabia, wa Matania, wa Mika va ufyari lwa Asafu llo lwa veembi, vakasalallya ishora lya mmba ya Iruva. 23Kimmba mangyi eeniingye veembi vavaso iroo lyeelatya wo nkonu. 24Nawe Petahia mwana wa Meshebeseli wa ufyari lwa Sera wa Yuda, ekee nngari wa mangyi mwiikallya findo fyoose.

Vandu Vakee Miriny Miniini na Minnywa

25Na vandu va Yuda vakakaa efo mareminy na fyuungony, mfyo Kiriat-arba, Diboni na fyuungo fya vayo, na Yekabseeli; 26na Yeshua na Molada, na Bet-peleti, 27na Hazar shuali, na Beer-sheba, 28na Siklag, na Mekona, 29na kulya Enrimoni, na Sora na Yarmut 30Sanoa na Adulamu, Lakishi na marema a vayo na Azeka, wo muri na fyuungo fya vayo, vakakaa bookya Beer-sheba fika imungo lya Hinomu.

31Na vana va Benyaminy wo vakakaa Geba, na Mikmashi, na Aiya na Bet-eli. 32Anatoti, Nobu, Anania, 33Hazori, Rama, Gitaimu, 34Hadidi, Seboimu, Nebalati. 35Lodi na Ono, na imungony lya Vakarashi. 36Na Valevi vengi mmbo vekaa Yuda, na vengyi vakakaa Benyaminy

Currently Selected:

NEHEMIA 11: MAS2

Highlight

Copy

Compare