NEHEMIA 1

1Yeti ni mbony ta Nehemia mwana wa Hakalia na filya aleidima itana.

Shaasa Nehemia atinnyo Yerusalemu.

Mmbo wekee mwiiri uvaangwaa Kisleu, mwaaka wa makumi avii, shiikee alya turuveny ya Shushani. 2Umwi wa vanavamaye vakwa avaangwaa Hanani, kasha ariani na vandu vengi-da valeuka kulya Yuda, llyo yeny shilevavesa mbony ta Vayuda valya valesaafo, valya valenka ushingeny Babilony, na kya muri weru wa Yerusalemu. 3Vakashivia, “Valya valekia vakawuya kulya urukeny lweru mmbo vakee ukiveny uniini nnu, nawo mmbo vakeelolwa ngata mmbandu valya vavaringitye, na isimamba wa Yerusalemu mmbo ufikye-fikye wo ando, na ngiri ta vayo mmbo tilekorwa.” 4Shikiita indo, shasokya rembo shaiya, shakaa kiiyony ando a mikonu mive, shakootoya shiiterevaa Iruva wa Iruveeu, 5shambia, “Mmbo shakutereva-dwa, Woi Iruva wa iruveeu, kukee Iruva mwiitorya, findo fyoose, kweeresye, kwaveva Iruva mwiiringa fyaasa fyafo na ilyilya lyafo kwa yewo vakutirye vyo vakaringa mavavaso afo, 6woi mbee, sheevetya kuri kafo, na miso afo atarambuke, kwaaranyi kyeerero kya kishinga kyafo, shaasa shikekufuuya kio na nsanyiny, kimaruma kya vana va Israeli vakee vasero vafo, neelyi shikeekunyiisa kimaruma kya ulyamari lwawo, valekulyamarya, yee yeny na vandu vakwa mmbo lulekulyamarya. 7Mmbo lulekulyamarya keengi nnu deny, nta lulalatye mavavaso afo, na usumanu lwafo, shaasa kulevavasya nsero wafo, Mose. 8Mmbo shakutereva kukumbwe shaasa kulerera na Mose, nsero wafo, llya kulembia, ‘Mukalyamara mmbo nshemunyanyatyaa efo masangeny engi. 9Lyo mukanshiwuiya, muvetira mavavaso akwa, vandu yewo vafo naakwa vannyanyaka vakafika fishingony fya ulana, mmbo nshevaumbyaase, shivaviire fika ando yoo shilevasauya vasheindyau irina lyakwa.’

10“Kyasia yewo ni vandu vafo vakaveva vasero vafo, kulevawouwa na woko lwafo lwa finya na wiidimi wiingi. 11Woi Nndumi Iruva shakutereva-dwa, kusheevetye kuri kafo, kwaaranyi fiterewo fya nsero wafo, na fya yewo valangye yiindya irina lyafo, Mmbo shakutereva nnu-dwa, kushiidimisye yeny nsero wafo, naambo na mangyi yeu nashiirikye.” (Mashika yeny mmbo shekee mwiiraiya wa mangyi.)

Currently Selected:

NEHEMIA 1: MAS2

Highlight

Copy

Compare