ESRA 10

Ni ishingo yoora vaka nsasando

1Nalyo elyi Esra eefo atarevaa nepara ulyamari indo, kakutuula, si kifulufulu yoo mbee ya mmba ya Iruva womi vaka na vana va Israeli veengyi nnu vakakusanyirya yoo akai, veeshiiyaa nnu. 2Nalyo Shekani mwana wa Yehieli, ni umwi wa vana va Elamu, kavia Esra, “Yese mmbo lulelyamarya Iruva weeru llya luleora vaka veny efo vanduny yewo va uruka elo, lyo luvikye nsia kwiifo kyetana kimaruma kya Israeli. 3Ulaalu luvikye Iruva kyaasa, lulakani na vaka yewo veny, ando amwi na vana vawo, lulatye ekyo lwavavasyo na valya vaindyaa mavavaso a Iruva weeru, lutani indo shaasa mavavaso akwe akai. 4Kyasia kupoony te ni ishora lyafo kulyitani, na ukaari, lukee neewe.”

5Nalyo Esra kakupoo, kalyisa vakohani na vasongoru mboo na Valevi na Israeli woose, vakairikya itana shaasa avavia, vakalya mboo. 6Esra kookany yoo mbee ya mmba ya Iruva, kaanga neefo kiryeny kya Yehohani mwana wa Eliashibu, kalala rony nnyalelya shoonga-fo, nta nani mura-fo, mashika mmbo ekeiya kimaruma vandu va usamirony valetura kikusiryo. 7Vakakapa weele kulya Yuda koose na Yerusalemu naambo valya valeuka usamirony woose vakusanyirye kulya Yerusalemu, 8na nndu ara nalafikafo ando a mikonu iraru kyuuka na ivavaso lya vasongoru na vamiku mmbo ashesokwaa findo fyakwe fyoose, naverauwa na vandu vengyi woose.

9Nalyo womi woose va Yuda na Benyamen vaakakusanyirya kulya Yerusalemu ando a mikonu iraru, nato wekee nkonu makumi avii wa mwiiri wa keenda; nawo vakakaa rembo yoo poo mbateny mbee ya mmba ya Iruva, veereremaa kimaruma kya mbony yeyo, neelyi mmbwa yekee kapa nnu. 10Naasa nkohani Esra kasalala, kavia vandu, “Mmbo mulelyamara elyi muleora vaka veny, mukang'anisa ukasha lwa Israeli. 11Kyasia ulaalu kuryeny mbee ya Nndumi Iruva, Iruva wa vandeye vany, mutani ekyo akunndye, mukurauwe na vandu va uruka elu na mulakani na vaka yewo veny.”

12Llyo ikwaanu lyoose lyikarouwa kwa unyanga uniini deny woose vakaamba, “Shaasa kwaluvia niindo lutanaa.” 13Vakeengera yaamba, “Vandu yeva ni veengyi na mmbwa mmbo yiifo ikapaa, lulashidimaa isalala poo, neelyi nshi ishora lya nkonu umwi-fo ao ivii-da-fo, neese mmbo lulyamarye kiniini-dwa. 14Kyasia vasongoru veru vasalale ando a ikwaanu lyoose, neewo woose efo miriny yeeru varye vaka veny vavangwa vashe kwa kyeeei kikwaani, ando amwi na vamiku na Valeti va wo muri kutani unyafi lwa Iruva luluuke.” 15Nalyo vakairikya woose kuuta Yonatan mwana wa Asaheli, na Isaya, mwana wa Tikwa, wo mmbo vakalema ekyo kyarerwa amwi na Meshulamu na Shabetai, vekee Valevi vakakaa kyaalu kyawo.

16Lyo valya valeuka usamirony vakatana shaasa kilererwa. Nalyo nkohani Esra kasauwa vasongoru va mmba vandeye-awo wo shaasa veekai. Vakavika shila nkonu wa mbee wa mwiiri wa ikumi, vakakaa rembo isununda mbony yeyyo. 17Vakamaa isongosia mbony ta womi yewo woorye vaka veny wikee nkonu wa mbee wa mwiiri wa mbee.

Vomi Vatiri Vaka Veny

18Nnang'ani a vana wa kyuumi va Vakohani yewo veerye vaka veny, kukakooyo-fo vana va Yossua, mwana wa Yosadaki na vana va maye, Maaseya na Elieseri, Yaribu na Gedalia, 19Yeva vakakureeka ilakana na vaka vawo, vakoota na suva ive kiraso kya ukasha lwawo. 20Na vana wa Imeri, ni Hanani na Sebadia, 21Na vana wa Harim ni Maaseiya, Elia, Shemaya Yehieli na Usia. 22Vana wa Pashuri, ni Elioenai, Maaseya, Ishmaili, Netaneli, Yosabadi na Elasa. 23Na va Valevi ni: Yozabadi, Shimei, Kalaiya (ao Kelita), Petahia, Yuda na Eliezeri. 24Na wa Veembi ni Eliashibu. Na va Vesalala ngiriny ni Shalumu, Telemu na Uri. 25Na wa Israelii vana va Paroshi, Ramia, Isia, Malkiya, Miyamini, Eliezeri, Malchiya na Benaiya. 26Na vana va Elam ni Matania, Sekaria, Yehieli, Abdi, Yeremoti na Elia 27Vana va Satu ni, Elioenai, Eliashibu, Matania, Yeremot, Sabadi na Asisa. 28Na vana va Bebai ni Yehohanan, Hanania, Sabai na Atlai. 29Vana va Bani ni Meshulamu, Maluki, Adaya, Yashubi, Sheali na Yeremoti. 30Vana va Pahat-Moabu ni Adna, Kelali, Benaya, Maaseya, Matania, Besaleli, Binui na Manase. 31Na vana va Harim, Elieseri, Ishiya na Malkiya na Shemaya na Shimeoni, 32na Benyaminy, Maluki na Shemaria 33Vana na va Hashum ni Matenai, Matata na Sabadi. Elifaleti Yeremai, Manase na Shimei. 34Vana va Bani ni Maadai na Aramu na Ueli, 35na Benaya na Bedaya na Keluhi, 36na Wania na Meremoti na Eliashibu 37na Matania na Matenai na Yaasu 38Na vana va Binui, ni Shimei, 39na Shelemia, Natan na Adaya 40na Maknadebai na Shashai na Sharai, 41na Asareli, Shelemia, na Shemaria, 42na vana va Shalumu na Amaria na Yosefu, 43vana va Nebo ni Yeieli na Matitia na Sabadi na Sebina na Ido, na Yoeli na Benaya. 44Yewo woose mmbo valeora vaka veny, vaka vawo maata mmbo veetiri vana, vakoombutwa na vana vawo.

Currently Selected:

ESRA 10: MAS2

Highlight

Copy

Compare