NAHUMU 1
1
1Irero lya Nndumi Iruva kya Ninavi. Kyitabu kya mbony Nahumu wa Elkoshi elollya.
Nyashi ya Iruva kimaruma kya Ninavi
2Nndumi Iruva muni matorito ni Iruva atiri kyififi na mwiitaiyya kiduva,
Nndumi Iruva ataiiyaa kiduva eeshwe nyashi;
Nndumi Iruva nyataiiyaa kiduva vakiduva vakwe,
Nyafumbaa ngoo kyuumu kyimaruma kya vakiduva vakwe.
3Nndumi Iruva anyaashikaa uviny-fo ra na elyi atiri ngala,
Nawe nnyareelya varavi-fo.
Ando Nndumi Iruva airaa mmbo kishee-u kitita-si na uraato,
na mafishi ni kyiluulyi kya marende akwe.
4Mmbo akyeemya yeeve nayo ika-umya,
We mmbo aumisyaa mira myoose.
Mbata ta Bashani na ifummbu lya Karmeli fikaumya,
Fivaro fya Lebanoni fikanaa.
5Mafumbu nnyareremaa mbee yakwe,
Nakwaa ni fidooro nfyeekaa,
Uruka lukareka mbee yakwe,
Ulana na findo fyoose fyiifo.
6A mmbo-vi ashiidimaa ikweesa na ngoo ya Nndumi Iruva?
Mmbo-vi ashiidimaa isisirya unyaasi lwa nyashi yakwe?
We mmbo apuswaa nyashi yakwe ikaaka sha muro,
Mmbo ipaparaa naakwa mmawe a ngyina.
7Nndumi Iruva mmbo akee nsaari,
We ni turuve kyeeri kya ukyiva.
We mmbo eeshi yewo varishyaa uringyi lwakwe.
8Indi; na yeeka lya mamwiingyi a mura,
mmbo amamitaa na lyimwi vakiishi vakwe;
na irishya vakiduva vakwe kutani vaoloka ireeminy.
9A nkyama-kyi mwavikkya Nndumi Iruva?
We mmbo amumamitaa
Nta nkiduva vakwe umwi ashiidimaa isiika kavii-fo.
10Mmbo vamamitwaa sha usaka lwa miinga
Sha mare moomu amamikye
11A kwafo yewe aleukase-fo nndu kavika kyama kya Nndumi Iruva
Kavika kyama kya wongo?
12Nndumi Iruva aamba ule,
“Naakwa vatira finya na iingyifwa,
Mmbo vatuulwaa-si na imamitwa.
Ra na elyi shemmulyisa ukiva yeni vandu vakwa,
Nshikyivalyisaa ukyiva lyingyi-fo.
13Ulaalu mmbo shifishaa yookyi yakwe singony-tany,
Na mise vamufingye nayo mmbo shisheifisha-fishaa.”
14Nndumi Iruva ammuuta ivavaso lyikwaani neeni mmbo avia Ninavi ule,
“Nkukyiwonisaa vana vesendwa na irina lyafo-fo.
Mafwanu afo a ipasha na a yeetwa mmbo shiafisha-fishaa,
yefo mmba ya maruva yoo afo.”
Yeny mmbo shishekusumyaa kifu kyafo,
Mashika nkukee nkasha deny.
15Lola; uwe ya mafumbu ngyayo ta nndu:
akeeyeende mbony shisha,
Ni nrumi akapaa weele lwa unapwe
Kummbweny mikonu yaany miniini yeni vandu va Yuda,
Inuutyeny fyaasa fyany fya pya,
naambo vandu vakasha valakyivaidime lyingyi,
Vamaa imamitwa woose deny.
Currently Selected:
NAHUMU 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
