Valevi 1
1
Firaso Fyeekora Fyoose
1Nndumi Iruva kavaanga Mose, karera nawe ekee alya yeemeny lyeekwaanannya, kammbya, 2rera na vana va Israeli kuvavie indi, kyeeri nndu wa kwany ashuutyaa Nndumi Iruva firaso, mmbo ashuuta irondeny lya findo fyakwe fyeevikya, mfyo ng'umbe, moonri na mburu.
3Kwakooya kiraso akeeiniingya nndu nkyeemamita na muro, mmbo asauwaa shau shisha efo irondeny lyakwe ilatiri mbese; neende yoo mwaangony wa yeema, naambo awonise mbora yuuka kwa Nndumi Iruva. 4Naasa neekere woko lwakwe yoo nrony wa kiraso ekyo kyeekora na muro; nayo yiirikyo kimaruma kyakwe, kive kya usandi kwakwe. 5Nawe mmbo asheshishaa ng'umbe yeyo yoo mbee ya Nndumi Iruva. Na vakohani vana va Aron, vasembere samu yeyo, vaifwallye taari toose ta kitara kya-irasya ekyo kyiikee yoo mwaangony wa yeema elyo. 6Nawo narumbwe fyenga fyenga. 7Naasa vana va Nkohani Aron, vavike muro yoo kitareny kyeerasya, na yaala ngwi uwe ya muro, 8lyo vana va Aron, mmbo vakohani, vaale fyenga fyilya fya nyama yoo uwe ando amwi na nrwe na mafura a vayo, vavike yoo uwe ya ngwi na muro yeto yoo kitareny kyeerasya; 9kyeendi maala a vayo na marende, nafisangye na mura, na nkohani mmbo shefirumataa na muro fyoose yoo kitareny ekyo, llyo fyava kiraso kyeekora na muro, ni kiraso kyeeserisya murony, kitiri nrungo nsha usenyi kwa Nndumi Iruva.
10Na findo fyakwe fya pya kwakooya mmbo fyauka efo irondeny lya moonri ao lya mburu five kiraso kyeekora na muro naniingye ekyo kya kyuumi kilatiri teve. 11Nawe mmbo asheishishyaa yoo taari ya ndoo ya kitara kyeerasya usanguny lwa Nndumi na vana yewo va Aron wa Makuhani valetye samu ya vayo yoo uwe ya kitara ekyo taari toose. 12Na numa ya vayo nairumbwe fyenga ando amwi na nrwe wa vayo, na mafura a vayo; nawe nkohani nafyaale yoo uwe ya ngwi yeto tikee uwe ya muro ukee uwe ya kitara kyerasya; 13kyeendi lyo maala a vayo na marende a vayo, nafisangye na mura, nawe nkohani mmbo ashefiserisaau neefimamita na muro yoo uwe ya kitara ekyo, ni kiraso kyeekora na muro, kiraso kyeserisya Nndumi Iruva na muro, kitiri nrungo nsha usenyi kwa Nndumi Iruva.
14Na findo fyakwe fya pya efyo asheutyaa Nndumi Iruva five kiraso kyemamita na muro, kwankooya n-ndeye, mmbo asheendee mbeta ao fivana fya mbuku. 15Nkuhani nafyeende na yoo kitareny kyeerasya nafimushwe njwaa, neefimamita na muro yoo kitareny, lyo samu ya vayo naishoshotye efo mbai ya kitara ekyo; 16naawo mmbo asheutaafo maala a vayo nashefyeerya yoo ifuny taari ya ngama ya kitara, 17numa nakibare nnang'ani na maaru alasheeuutwaa-fo-fo, lyo nalabare five fibarwe fivii-fo, llyony nkohani nafikore na muro yoo kitareny uwe ya ngwi na muro, nkyo kiraso kyeemaamita na muro, kyeeserisya Nndumi Iruva na muro kitiri nrungo nsha kwa Nndumi Iruva.
Currently Selected:
Valevi 1: MAS2
Highlight
Share
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
