FIIYO 5
5
Vatereva ilyillywa
1Woi Nndumi Iruva kummbwa filya filelukooya.
Lulle shaasa lwansuka.
2Masaa eru mmbo akee maakony a vandu veny,
nawo nyefo mmba teeru vakai.
3Vande veru mmbo valewaawa mmisa
vama veru vakarewa-u vaka va ding'u.
4Mmbo lukeyuura mura weena,
na ngwi-da.
5Mmbo lwammaraa lwishumbutwaa sha mishungu
na ngamula, lulashimuyaa.
6Naambo lukye muu,
mmbo lulendetereva shoonga kulya Misri na Siria.
7Vande veru mmbo valelyamara lyo mmbakiiyo ulaalu-fo,
lukalya ukiva yese ando awo.
8Yewo veelushillya mmbekee ni mashinga,
lyo nta nkwiifo mwilwauwa maakony awo-fo.
9Misa mmbo akerua-rua kunu myuungony, yeeru,
lukakaa nrengeny lwiisomukaa inderuuya shoonga.
10Shaa mmbo yalweengye lukaya muro,
mwiili moose ukaya,
11Naakwa ni vaka veru yaa Sioni kweni mmbo valekeeafinywa.
Na kunu Yudaya koose vana veruu va kyika vakaafinywa womi.
12Vasongoru veru mmbo valekamarwa vakavanikwa,
na vamiku veru nta valaindyo.
13Vasoro veru vakaitikywa isa nganu sha mashinga,
vana veru va kyuumi vakasinga-singa veerye mario a ngwi
14Vandu veru vakuu mmbakekyiidima iimuya yoo ngiriny ya mwi-fo.
nta vandu veru vakoo mmbakeekyikapa finanda-fo.
15Kweru ifura llyikiishiwa-fo,
na mbasa teru tikaaluka kiiyo.
16Woshiny lweru,
elyi luletana ulyamari, lwanreta ureto lweru.
17Ai mirima yeeru mmbo yamfwa deny.
Misoru mmbo yammbwaa miso eru.
18Mashika ifumbu lya Sioni mmbo lyanrewa-u lyikalyamarika,
na mabarwe mfo ammallwa kweeka,
19lyo ewe Nndumi Iruva kukee mangyi llung'anu,
mmbo kushillya kuleefo umando.
20A nkyiki elyi kulelura kifye indo?
A nkyikyi kulalukumbwe lyingi?
21Luviire-dwa woi Nndumi Iruva, luviire na kwafo-dwa!
Luviirye itumbe llya lya mbee.
22A mmbo kwalulema llung'anu?
A mmbo unyafi lwafo lulatiri umando?
Currently Selected:
FIIYO 5: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
